Utshovঅধ্যায় 59
59.1
নল উবাচ
যথা রাজ্যং পিতুস্তে তত্তথা মম ন সংশয়ঃ
ন তু তত্র গমিষ্যামি বিষমস্থঃ কথংচন
59.2
কথং সমৃদ্ধো গত্বাহং তব হর্ষবিবর্ধনঃ
পরিদ্যূনো গমিষ্যামি তব শোকবিবর্ধনঃ
59.3
বৃহদশ্ব উবাচ
ইতি ব্রুবন্নলো রাজা দময়ন্তীং পুনঃ পুনঃ
সান্ত্বয়ামাস কল্যাণীং বাসসোঽর্ধেন সংবৃতাম্
59.4
তাবেকবস্ত্রসংবীতাবটমানাবিতস্ততঃ
ক্ষুত্পিপাসাপরিশ্রান্তৌ সভাং কাংচিদুপেয়তুঃ
59.5
তাং সভামুপসংপ্রাপ্য তদা স নিষধাধিপঃ
বৈদর্ভ্যা সহিতো রাজা নিষসাদ মহীতলে
59.6
স বৈ বিবস্ত্রো মলিনো বিকচঃ পাংসুগুণ্ঠিতঃ
দময়ন্ত্যা সহ শ্রান্তঃ সুষ্বাপ ধরণীতলে
59.7
দময়ন্ত্যপি কল্যাণী নিদ্রয়াপহৃতা ততঃ
সহসা দুঃখমাসাদ্য সুকুমারী তপস্বিনী
59.8
সুপ্তায়াং দময়ন্ত্যাং তু নলো রাজা বিশাং পতে
শোকোন্মথিতচিত্তাত্মা ন স্ম শেতে যথা পুরা
59.9
স তদ্রাজ্যাপহরণং সুহৃত্ত্যাগং চ সর্বশঃ
বনে চ তং পরিধ্বংসং প্রেক্ষ্য চিন্তামুপেয়িবান্
59.10
কিং নু মে স্যাদিদং কৃত্বা কিং নু মে স্যাদকুর্বতঃ
কিং নু মে মরণং শ্রেয়ঃ পরিত্যাগো জনস্য বা
59.11
মামিয়ং হ্যনুরক্তেদং দুঃখমাপ্নোতি মত্কৃতে
মদ্বিহীনা ত্বিয়ং গচ্ছেত্কদাচিত্স্বজনং প্রতি
59.12
ময়া নিঃসংশয়ং দুঃখমিয়ং প্রাপ্স্যত্যনুত্তমা
উত্সর্গে সংশয়ঃ স্যাত্তু বিন্দেতাপি সুখং ক্বচিৎ
59.13
স বিনিশ্চিত্য বহুধা বিচার্য চ পুনঃ পুনঃ
উত্সর্গেঽমন্যত শ্রেয়ো দময়ন্ত্যা নরাধিপঃ
59.14
সোঽবস্ত্রতামাত্মনশ্চ তস্যাশ্চাপ্যেকবস্ত্রতাম্
চিন্তয়িত্বাধ্যগাদ্রাজা বস্ত্রার্ধস্যাবকর্তনম্
59.15
কথং বাসো বিকর্তেয়ং ন চ বুধ্যেত মে প্রিয়া
চিন্ত্যৈবং নৈষধো রাজা সভাং পর্যচরত্তদা
59.16
পরিধাবন্নথ নল ইতশ্চেতশ্চ ভারত
আসসাদ সভোদ্দেশে বিকোশং খড্গমুত্তমম্
59.17
তেনার্ধং বাসসশ্ছিত্ত্বা নিবস্য চ পরংতপঃ
সুপ্তামুত্সৃজ্য বৈদর্ভীং প্রাদ্রবদ্গতচেতনঃ
59.18
ততো নিবদ্ধহৃদয়ঃ পুনরাগম্য তাং সভাম্
দময়ন্তীং তথা দৃষ্ট্বা রুরোদ নিষধাধিপঃ
59.19
যাং ন বায়ুর্ন চাদিত্যঃ পুরা পশ্যতি মে প্রিয়াম্
সেয়মদ্য সভামধ্যে শেতে ভূমাবনাথবৎ
59.20
ইয়ং বস্ত্রাবকর্তেন সংবীতা চারুহাসিনী
উন্মত্তেব বরারোহা কথং বুদ্ধ্বা ভবিষ্যতি
59.21
কথমেকা সতী ভৈমী ময়া বিরহিতা শুভা
চরিষ্যতি বনে ঘোরে মৃগব্যালনিষেবিতে
59.22
গত্বা গত্বা নলো রাজা পুনরেতি সভাং মুহুঃ
আকৃষ্যমাণঃ কলিনা সৌহৃদেনাপকৃষ্যতে
59.23
দ্বিধেব হৃদয়ং তস্য দুঃখিতস্যাভবত্তদা
দোলেব মুহুরায়াতি যাতি চৈব সভাং মুহুঃ
59.24
সোঽপকৃষ্টস্তু কলিনা মোহিতঃ প্রাদ্রবন্নলঃ
সুপ্তামুত্সৃজ্য তাং ভার্যাং বিলপ্য করুণং বহু
59.25
নষ্টাত্মা কলিনা স্পৃষ্টস্তত্তদ্বিগণয়ন্নৃপঃ
জগামৈব বনে শূন্যে ভার্যামুত্সৃজ্য দুঃখিতঃ