Utshovঅধ্যায় 58
58.1
বৃহদশ্ব উবাচ
ততস্তু যাতে বার্ষ্ণেয়ে পুণ্যশ্লোকস্য দীব্যতঃ
পুষ্করেণ হৃতং রাজ্যং যচ্চান্যদ্বসু কিংচন
58.2
হৃতরাজ্যং নলং রাজন্প্রহসন্পুষ্করোঽব্রবীৎ
দ্যূতং প্রবর্ততাং ভূয়ঃ প্রতিপাণোঽস্তি কস্তব
58.3
শিষ্টা তে দময়ন্ত্যেকা সর্বমন্যদ্ধৃতং ময়া
দময়ন্ত্যাঃ পণঃ সাধু বর্ততাং যদি মন্যসে
58.4
পুষ্করেণৈবমুক্তস্য পুণ্যশ্লোকস্য মন্যুনা
ব্যদীর্যতেব হৃদয়ং ন চৈনং কিংচিদব্রবীৎ
58.5
ততঃ পুষ্করমালোক্য নলঃ পরমমন্যুমান্
উত্সৃজ্য সর্বগাত্রেভ্যো ভূষণানি মহায়শাঃ
58.6
একবাসা অসংবীতঃ সুহৃচ্ছোকবিবর্ধনঃ
নিশ্চক্রাম তদা রাজা ত্যক্ত্বা সুবিপুলাং শ্রিয়ম্
58.7
দময়ন্ত্যেকবস্ত্রা তং গচ্ছন্তং পৃষ্ঠতোঽন্বিয়াৎ
স তয়া বাহ্যতঃ সার্ধং ত্রিরাত্রং নৈষধোঽবসৎ
58.8
পুষ্করস্তু মহারাজ ঘোষয়ামাস বৈ পুরে
নলে যঃ সম্যগাতিষ্ঠেত্স গচ্ছেদ্বধ্যতাং মম
58.9
পুষ্করস্য তু বাক্যেন তস্য বিদ্বেষণেন চ
পৌরা ন তস্মিন্সত্কারং কৃতবন্তো যুধিষ্ঠির
58.10
স তথা নগরাভ্যাশে সত্কারার্হো ন সত্কৃতঃ
ত্রিরাত্রমুষিতো রাজা জলমাত্রেণ বর্তয়ন্
58.11
ক্ষুধা সংপীড্যমানস্তু নলো বহুতিথেঽহনি
অপশ্যচ্ছকুনান্কাংশ্চিদ্ধিরণ্যসদৃশচ্ছদান্
58.12
স চিন্তয়ামাস তদা নিষধাধিপতির্বলী
অস্তি ভক্ষো মমাদ্যায়ং বসু চেদং ভবিষ্যতি
58.13
ততস্তানন্তরীয়েণ বাসসা সমবাস্তৃণোৎ
তস্যান্তরীয়মাদায় জগ্মুঃ সর্বে বিহায়সা
58.14
উত্পতন্তঃ খগাস্তে তু বাক্যমাহুস্তদা নলম্
দৃষ্ট্বা দিগ্বাসসং ভূমৌ স্থিতং দীনমধোমুখম্
58.15
বয়মক্ষাঃ সুদুর্বুদ্ধে তব বাসো জিহীর্ষবঃ
আগতা ন হি নঃ প্রীতিঃ সবাসসি গতে ত্বয়ি
58.16
তান্সমীক্ষ্য গতানক্ষানাত্মানং চ বিবাসসম্
পুণ্যশ্লোকস্ততো রাজা দময়ন্তীমথাব্রবীৎ
58.17
যেষাং প্রকোপাদৈশ্বর্যাত্প্রচ্যুতোঽহমনিন্দিতে
প্রাণয়াত্রাং ন বিন্দে চ দুঃখিতঃ ক্ষুধয়ার্দিতঃ
58.18
যেষাং কৃতে ন সত্কারমকুর্বন্ময়ি নৈষধাঃ
ত ইমে শকুনা ভূত্বা বাসোঽপ্যপহরন্তি মে
58.19
বৈষম্যং পরমং প্রাপ্তো দুঃখিতো গতচেতনঃ
ভর্তা তেঽহং নিবোধেদং বচনং হিতমাত্মনঃ
58.20
এতে গচ্ছন্তি বহবঃ পন্থানো দক্ষিণাপথম্
অবন্তীমৃক্ষবন্তং চ সমতিক্রম্য পর্বতম্
58.21
এষ বিন্ধ্যো মহাশৈলঃ পয়োষ্ণী চ সমুদ্রগা
আশ্রমাশ্চ মহর্ষীণামমী পুষ্পফলান্বিতাঃ
58.22
এষ পন্থা বিদর্ভাণাময়ং গচ্ছতি কোসলান্
অতঃ পরং চ দেশোঽয়ং দক্ষিণে দক্ষিণাপথঃ
58.23
ততঃ সা বাষ্পকলয়া বাচা দুঃখেন কর্শিতা
উবাচ দময়ন্তী তং নৈষধং করুণং বচঃ
58.24
উদ্বেপতে মে হৃদয়ং সীদন্ত্যঙ্গানি সর্বশঃ
তব পার্থিব সংকল্পং চিন্তয়ন্ত্যাঃ পুনঃ পুনঃ
58.25
হৃতরাজ্যং হৃতধনং বিবস্ত্রং ক্ষুচ্ছ্রমান্বিতম্
কথমুত্সৃজ্য গচ্ছেয়মহং ত্বাং বিজনে বনে
58.26
শ্রান্তস্য তে ক্ষুধার্তস্য চিন্তয়ানস্য তত্সুখম্
বনে ঘোরে মহারাজ নাশয়িষ্যামি তে ক্লমম্
58.27
ন চ ভার্যাসমং কিংচিদ্বিদ্যতে ভিষজাং মতম্
ঔষধং সর্বদুঃখেষু সত্যমেতদ্ব্রবীমি তে
58.28
নল উবাচ
এবমেতদ্যথাত্থ ত্বং দময়ন্তি সুমধ্যমে
নাস্তি ভার্যাসমং মিত্রং নরস্যার্তস্য ভেষজম্
58.29
ন চাহং ত্যক্তুকামস্ত্বাং কিমর্থং ভীরু শঙ্কসে
ত্যজেয়মহমাত্মানং ন ত্বেব ত্বামনিন্দিতে
58.30
দময়ন্ত্যুবাচ
যদি মাং ত্বং মহারাজ ন বিহাতুমিহেচ্ছসি
তত্কিমর্থং বিদর্ভাণাং পন্থাঃ সমুপদিশ্যতে
58.31
অবৈমি চাহং নৃপতে ন ত্বং মাং ত্যক্তুমর্হসি
চেতসা ত্বপকৃষ্টেন মাং ত্যজেথা মহাপতে
58.32
পন্থানং হি মমাভীক্ষ্ণমাখ্যাসি নরসত্তম
অতোনিমিত্তং শোকং মে বর্ধয়স্যমরপ্রভ
58.33
যদি চায়মভিপ্রায়স্তব রাজন্ব্রজেদিতি
সহিতাবেব গচ্ছাবো বিদর্ভান্যদি মন্যসে
58.34
বিদর্ভরাজস্তত্র ত্বাং পূজয়িষ্যতি মানদ
তেন ত্বং পূজিতো রাজন্সুখং বত্স্যসি নো গৃহে