অধ্যায় 57

57.1

বৃহদশ্ব উবাচ
দময়ন্তী ততো দৃষ্ট্বা পুণ্যশ্লোকং নরাধিপম্
উন্মত্তবদনুন্মত্তা দেবনে গতচেতসম্

ভয়শোকসমাবিষ্টা রাজন্ভীমসুতা ততঃ
চিন্তয়ামাস তত্কার্যং সুমহত্পার্থিবং প্রতি

সা শঙ্কমানা তত্পাপং চিকীর্ষন্তী চ তত্প্রিয়ম্
নলং চ হৃতসর্বস্বমুপলভ্যেদমব্রবীৎ

বৃহত্সেনে ব্রজামাত্যানানায্য নলশাসনাৎ
আচক্ষ্ব যদ্ধৃতং দ্রব্যমবশিষ্টং চ যদ্বসু

ততস্তে মন্ত্রিণঃ সর্বে বিজ্ঞায় নলশাসনম্
অপি নো ভাগধেয়ং স্যাদিত্যুক্ত্বা পুনরাব্রজন্

তাস্তু সর্বাঃ প্রকৃতয়ো দ্বিতীয়ং সমুপস্থিতাঃ
ন্যবেদয়দ্ভীমসুতা ন চ তত্প্রত্যনন্দত

বাক্যমপ্রতিনন্দন্তং ভর্তারমভিবীক্ষ্য সা
দময়ন্তী পুনর্বেশ্ম ব্রীডিতা প্রবিবেশ হ

নিশম্য সততং চাক্ষান্পুণ্যশ্লোকপরাঙ্মুখান্
নলং চ হৃতসর্বস্বং ধাত্রীং পুনরুবাচ হ

বৃহত্সেনে পুনর্গচ্ছ বার্ষ্ণেয়ং নলশাসনাৎ
সূতমানয় কল্যাণি মহত্কার্যমুপস্থিতম্

বৃহত্সেনা তু তচ্ছ্রুত্বা দময়ন্ত্যাঃ প্রভাষিতম্
বার্ষ্ণেয়মানয়ামাস পুরুষৈরাপ্তকারিভিঃ

বার্ষ্ণেয়ং তু ততো ভৈমী সান্ত্বয়ঞ্শ্লক্ষ্ণয়া গিরা
উবাচ দেশকালজ্ঞা প্রাপ্তকালমনিন্দিতা

জানীষে ত্বং যথা রাজা সম্যগ্বৃত্তঃ সদা ত্বয়ি
তস্য ত্বং বিষমস্থস্য সাহায্যং কর্তুমর্হসি

যথা যথা হি নৃপতিঃ পুষ্করেণেহ জীয়তে
তথা তথাস্য দ্যূতে বৈ রাগো ভূয়োঽভিবর্ধতে

যথা চ পুষ্করস্যাক্ষা বর্তন্তে বশবর্তিনঃ
তথা বিপর্যয়শ্চাপি নলস্যাক্ষেষু দৃশ্যতে

সুহৃত্স্বজনবাক্যানি যথাবন্ন শৃণোতি চ
নূনং মন্যে ন শেষোঽস্তি নৈষধস্য মহাত্মনঃ

যত্র মে বচনং রাজা নাভিনন্দতি মোহিতঃ
শরণং ত্বাং প্রপন্নাস্মি সারথে কুরু মদ্বচঃ
ন হি মে শুধ্যতে ভাবঃ কদাচিদ্বিনশেদিতি

নলস্য দয়িতানশ্বান্যোজয়িত্বা মহাজবান্
ইদমারোপ্য মিথুনং কুণ্ডিনং যাতুমর্হসি

মম জ্ঞাতিষু নিক্ষিপ্য দারকৌ স্যন্দনং তথা
অশ্বাংশ্চৈতান্যথাকামং বস বান্যত্র গচ্ছ বা

দময়ন্ত্যাস্তু তদ্বাক্যং বার্ষ্ণেয়ো নলসারথিঃ
ন্যবেদয়দশেষেণ নলামাত্যেষু মুখ্যশঃ

তৈঃ সমেত্য বিনিশ্চিত্য সোঽনুজ্ঞাতো মহীপতে
যয়ৌ মিথুনমারোপ্য বিদর্ভাংস্তেন বাহিনা

হয়াংস্তত্র বিনিক্ষিপ্য সূতো রথবরং চ তম্
ইন্দ্রসেনাং চ তাং কন্যামিন্দ্রসেনং চ বালকম্

আমন্ত্র্য ভীমং রাজানমার্তঃ শোচন্নলং নৃপম্
অটমানস্ততোঽয়োধ্যাং জগাম নগরীং তদা

ঋতুপর্ণং স রাজানমুপতস্থে সুদুঃখিতঃ
ভৃতিং চোপয়য়ৌ তস্য সারথ্যেন মহীপতে