অধ্যায় 56

56.1

বৃহদশ্ব উবাচ
এবং স সময়ং কৃত্বা দ্বাপরেণ কলিঃ সহ
আজগাম ততস্তত্র যত্র রাজা স নৈষধঃ

স নিত্যমন্তরপ্রেক্ষী নিষধেষ্ববসচ্চিরম্
অথাস্য দ্বাদশে বর্ষে দদর্শ কলিরন্তরম্

কৃত্বা মূত্রমুপস্পৃশ্য সংধ্যামাস্তে স্ম নৈষধঃ
অকৃত্বা পাদয়োঃ শৌচং তত্রৈনং কলিরাবিশৎ

স সমাবিশ্য তু নলং সমীপং পুষ্করস্য হ
গত্বা পুষ্করমাহেদমেহি দীব্য নলেন বৈ

অক্ষদ্যূতে নলং জেতা ভবান্হি সহিতো ময়া
নিষধান্প্রতিপদ্যস্ব জিত্বা রাজন্নলং নৃপম্

এবমুক্তস্তু কলিনা পুষ্করো নলমভ্যয়াৎ
কলিশ্চৈব বৃষো ভূত্বা গবাং পুষ্করমভ্যয়াৎ

আসাদ্য তু নলং বীরং পুষ্করঃ পরবীরহা
দীব্যাবেত্যব্রবীদ্ভ্রাতা বৃষেণেতি মুহুর্মুহুঃ

ন চক্ষমে ততো রাজা সমাহ্বানং মহামনাঃ
বৈদর্ভ্যাঃ প্রেক্ষমাণায়াঃ পণকালমমন্যত

হিরণ্যস্য সুবর্ণস্য যানয়ুগ্যস্য বাসসাম্
আবিষ্টঃ কলিনা দ্যূতে জীয়তে স্ম নলস্তদা

তমক্ষমদসংমত্তং সুহৃদাং ন তু কশ্চন
নিবারণেঽভবচ্ছক্তো দীব্যমানমচেতসম্

ততঃ পৌরজনঃ সর্বো মন্ত্রিভিঃ সহ ভারত
রাজানং দ্রষ্টুমাগচ্ছন্নিবারয়িতুমাতুরম্

ততঃ সূত উপাগম্য দময়ন্ত্যৈ ন্যবেদয়ৎ
এষ পৌরজনঃ সর্বো দ্বারি তিষ্ঠতি কার্যবান্

নিবেদ্যতাং নৈষধায় সর্বাঃ প্রকৃতয়ঃ স্থিতাঃ
অমৃষ্যমাণা ব্যসনং রাজ্ঞো ধর্মার্থদর্শিনঃ

ততঃ সা বাষ্পকলয়া বাচা দুঃখেন কর্শিতা
উবাচ নৈষধং ভৈমী শোকোপহতচেতনা

রাজন্পৌরজনো দ্বারি ত্বাং দিদৃক্ষুরবস্থিতঃ
মন্ত্রিভিঃ সহিতঃ সর্বৈ রাজভক্তিপুরস্কৃতঃ
তং দ্রষ্টুমর্হসীত্যেবং পুনঃ পুনরভাষত

তাং তথা রুচিরাপাঙ্গীং বিলপন্তীং সুমধ্যমাম্
আবিষ্টঃ কলিনা রাজা নাভ্যভাষত কিংচন

ততস্তে মন্ত্রিণঃ সর্বে তে চৈব পুরবাসিনঃ
নায়মস্তীতি দুঃখার্তা ব্রীডিতা জগ্মুরালয়ান্

তথা তদভবদ্দ্যূতং পুষ্করস্য নলস্য চ
যুধিষ্ঠির বহূন্মাসান্পুণ্যশ্লোকস্ত্বজীয়ত