অধ্যায় 55

55.1

বৃহদশ্ব উবাচ
বৃতে তু নৈষধে ভৈম্যা লোকপালা মহৌজসঃ
যান্তো দদৃশুরায়ান্তং দ্বাপরং কলিনা সহ

অথাব্রবীত্কলিং শক্রঃ সংপ্রেক্ষ্য বলবৃত্রহা
দ্বাপরেণ সহায়েন কলে ব্রূহি ক্ব যাস্যসি

ততোঽব্রবীত্কলিঃ শক্রং দময়ন্ত্যাঃ স্বয়ংবরম্
গত্বাহং বরয়িষ্যে তাং মনো হি মম তদ্গতম্

তমব্রবীত্প্রহস্যেন্দ্রো নির্বৃত্তঃ স স্বয়ংবরঃ
বৃতস্তয়া নলো রাজা পতিরস্মত্সমীপতঃ

এবমুক্তস্তু শক্রেণ কলিঃ কোপসমন্বিতঃ
দেবানামন্ত্র্য তান্সর্বানুবাচেদং বচস্তদা

দেবানাং মানুষং মধ্যে যত্সা পতিমবিন্দত
ননু তস্যা ভবেন্ন্যায্যং বিপুলং দণ্ডধারণম্

এবমুক্তে তু কলিনা প্রত্যূচুস্তে দিবৌকসঃ
অস্মাভিঃ সমনুজ্ঞাতো দময়ন্ত্যা নলো বৃতঃ

কশ্চ সর্বগুণোপেতং নাশ্রয়েত নলং নৃপম্
যো বেদ ধর্মানখিলান্যথাবচ্চরিতব্রতঃ

যস্মিন্সত্যং ধৃতির্দানং তপঃ শৌচং দমঃ শমঃ
ধ্রুবাণি পুরুষব্যাঘ্রে লোকপালসমে নৃপে

আত্মানং স শপেন্মূঢো হন্যাচ্চাত্মানমাত্মনা
এবংগুণং নলং যো বৈ কাময়েচ্ছপিতুং কলে

কৃচ্ছ্রে স নরকে মজ্জেদগাধে বিপুলেঽপ্লবে
এবমুক্ত্বা কলিং দেবা দ্বাপরং চ দিবং যয়ুঃ

ততো গতেষু দেবেষু কলির্দ্বাপরমব্রবীৎ
সংহর্তুং নোত্সহে কোপং নলে বত্স্যামি দ্বাপর

ভ্রংশয়িষ্যামি তং রাজ্যান্ন ভৈম্যা সহ রংস্যতে
ত্বমপ্যক্ষান্সমাবিশ্য কর্তুং সাহায্যমর্হসি