Utshovঅধ্যায় 54
54.1
বৃহদশ্ব উবাচ
অথ কালে শুভে প্রাপ্তে তিথৌ পুণ্যে ক্ষণে তথা
আজুহাব মহীপালান্ভীমো রাজা স্বয়ংবরে
54.2
তচ্ছ্রুত্বা পৃথিবীপালাঃ সর্বে হৃচ্ছয়পীডিতাঃ
ত্বরিতাঃ সমুপাজগ্মুর্দময়ন্তীমভীপ্সবঃ
54.3
কনকস্তম্ভরুচিরং তোরণেন বিরাজিতম্
বিবিশুস্তে মহারঙ্গং নৃপাঃ সিংহা ইবাচলম্
54.4
তত্রাসনেষু বিবিধেষ্বাসীনাঃ পৃথিবীক্ষিতঃ
সুরভিস্রগ্ধরাঃ সর্বে সুমৃষ্টমণিকুণ্ডলাঃ
54.5
তাং রাজসমিতিং পূর্ণাং নাগৈর্ভোগবতীমিব
সংপূর্ণাং পুরুষব্যাঘ্রৈর্ব্যাঘ্রৈর্গিরিগুহামিব
54.6
তত্র স্ম পীনা দৃশ্যন্তে বাহবঃ পরিঘোপমাঃ
আকারবন্তঃ সুশ্লক্ষ্ণাঃ পঞ্চশীর্ষা ইবোরগাঃ
54.7
সুকেশান্তানি চারূণি সুনাসানি শুভানি চ
মুখানি রাজ্ঞাং শোভন্তে নক্ষত্রাণি যথা দিবি
54.8
দময়ন্তী ততো রঙ্গং প্রবিবেশ শুভাননা
মুষ্ণন্তী প্রভয়া রাজ্ঞাং চক্ষূংষি চ মনাংসি চ
54.9
তস্যা গাত্রেষু পতিতা তেষাং দৃষ্টির্মহাত্মনাম্
তত্র তত্রৈব সক্তাভূন্ন চচাল চ পশ্যতাম্
54.10
ততঃ সংকীর্ত্যমানেষু রাজ্ঞাং নামসু ভারত
দদর্শ ভৈমী পুরুষান্পঞ্চ তুল্যাকৃতীনিব
54.11
তান্সমীক্ষ্য ততঃ সর্বান্নির্বিশেষাকৃতীন্স্থিতান্
সংদেহাদথ বৈদর্ভী নাভ্যজানান্নলং নৃপম্
যং যং হি দদৃশে তেষাং তং তং মেনে নলং নৃপম্
54.12
সা চিন্তয়ন্তী বুদ্ধ্যাথ তর্কয়ামাস ভামিনী
কথং নু দেবাঞ্জানীয়াং কথং বিদ্যাং নলং নৃপম্
54.13
এবং সংচিন্তয়ন্তী সা বৈদর্ভী ভৃশদুঃখিতা
শ্রুতানি দেবলিঙ্গানি চিন্তয়ামাস ভারত
54.14
দেবানাং যানি লিঙ্গানি স্থবিরেভ্যঃ শ্রুতানি মে
তানীহ তিষ্ঠতাং ভূমাবেকস্যাপি ন লক্ষয়ে
54.15
সা বিনিশ্চিত্য বহুধা বিচার্য চ পুনঃ পুনঃ
শরণং প্রতি দেবানাং প্রাপ্তকালমমন্যত
54.16
বাচা চ মনসা চৈব নমস্কারং প্রয়ুজ্য সা
দেবেভ্যঃ প্রাঞ্জলির্ভূত্বা বেপমানেদমব্রবীৎ
54.17
হংসানাং বচনং শ্রুত্বা যথা মে নৈষধো বৃতঃ
পতিত্বে তেন সত্যেন দেবাস্তং প্রদিশন্তু মে
54.18
বাচা চ মনসা চৈব যথা নাভিচরাম্যহম্
তেন সত্যেন বিবুধাস্তমেব প্রদিশন্তু মে
54.19
যথা দেবৈঃ স মে ভর্তা বিহিতো নিষধাধিপঃ
তেন সত্যেন মে দেবাস্তমেব প্রদিশন্তু মে
54.20
স্বং চৈব রূপং পুষ্যন্তু লোকপালাঃ সহেশ্বরাঃ
যথাহমভিজানীয়াং পুণ্যশ্লোকং নরাধিপম্
54.21
নিশম্য দময়ন্ত্যাস্তত্করুণং পরিদেবিতম্
নিশ্চয়ং পরমং তথ্যমনুরাগং চ নৈষধে
54.22
মনোবিশুদ্ধিং বুদ্ধিং চ ভক্তিং রাগং চ ভারত
যথোক্তং চক্রিরে দেবাঃ সামর্থ্যং লিঙ্গধারণে
54.23
সাপশ্যদ্বিবুধান্সর্বানস্বেদান্স্তব্ধলোচনান্
হৃষিতস্রগ্রজোহীনান্স্থিতানস্পৃশতঃ ক্ষিতিম্
54.24
ছায়াদ্বিতীয়ো ম্লানস্রগ্রজঃস্বেদসমন্বিতঃ
ভূমিষ্ঠো নৈষধশ্চৈব নিমেষেণ চ সূচিতঃ
54.25
সা সমীক্ষ্য ততো দেবান্পুণ্যশ্লোকং চ ভারত
নৈষধং বরয়ামাস ভৈমী ধর্মেণ ভারত
54.26
বিলজ্জমানা বস্ত্রান্তে জগ্রাহায়তলোচনা
স্কন্ধদেশেঽসৃজচ্চাস্য স্রজং পরমশোভনাম্
বরয়ামাস চৈবৈনং পতিত্বে বরবর্ণিনী
54.27
ততো হা হেতি সহসা শব্দো মুক্তো নরাধিপৈঃ
দেবৈর্মহর্ষিভিশ্চৈব সাধু সাধ্বিতি ভারত
বিস্মিতৈরীরিতঃ শব্দঃ প্রশংসদ্ভির্নলং নৃপম্
54.28
বৃতে তু নৈষধে ভৈম্যা লোকপালা মহৌজসঃ
প্রহৃষ্টমনসঃ সর্বে নলায়াষ্টৌ বরান্দদুঃ
54.29
প্রত্যক্ষদর্শনং যজ্ঞে গতিং চানুত্তমাং শুভাম্
নৈষধায় দদৌ শক্রঃ প্রীয়মাণঃ শচীপতিঃ
54.30
অগ্নিরাত্মভবং প্রাদাদ্যত্র বাঞ্ছতি নৈষধঃ
লোকানাত্মপ্রভাংশ্চৈব দদৌ তস্মৈ হুতাশনঃ
54.31
যমস্ত্বন্নরসং প্রাদাদ্ধর্মে চ পরমাং স্থিতিম্
অপাংপতিরপাং ভাবং যত্র বাঞ্ছতি নৈষধঃ
54.32
স্রজং চোত্তমগন্ধাঢ্যাং সর্বে চ মিথুনং দদুঃ
বরানেবং প্রদায়াস্য দেবাস্তে ত্রিদিবং গতাঃ
54.33
পার্থিবাশ্চানুভূয়াস্যা বিবাহং বিস্ময়ান্বিতাঃ
দময়ন্ত্যাঃ প্রমুদিতাঃ প্রতিজগ্মুর্যথাগতম্
54.34
অবাপ্য নারীরত্নং তত্পুণ্যশ্লোকোঽপি পার্থিবঃ
রেমে সহ তয়া রাজা শচ্যেব বলবৃত্রহা
54.35
অতীব মুদিতো রাজা ভ্রাজমানোংঽশুমানিব
অরঞ্জয়ত্প্রজা বীরো ধর্মেণ পরিপালয়ন্
54.36
ঈজে চাপ্যশ্বমেধেন যয়াতিরিব নাহুষঃ
অন্যৈশ্চ ক্রতুভির্ধীমান্বহুভিশ্চাপ্তদক্ষিণৈঃ
54.37
পুনশ্চ রমণীয়েষু বনেষূপবনেষু চ
দময়ন্ত্যা সহ নলো বিজহারামরোপমঃ
54.38
এবং স যজমানশ্চ বিহরংশ্চ নরাধিপঃ
ররক্ষ বসুসংপূর্ণাং বসুধাং বসুধাধিপঃ