অধ্যায় 53

53.1

বৃহদশ্ব উবাচ
সা নমস্কৃত্য দেবেভ্যঃ প্রহস্য নলমব্রবীৎ
প্রণয়স্ব যথাশ্রদ্ধং রাজন্কিং করবাণি তে

অহং চৈব হি যচ্চান্যন্মমাস্তি বসু কিংচন
সর্বং তত্তব বিশ্রব্ধং কুরু প্রণয়মীশ্বর

হংসানাং বচনং যত্তত্তন্মাং দহতি পার্থিব
ত্বত্কৃতে হি ময়া বীর রাজানঃ সংনিপাতিতাঃ

যদি চেদ্ভজমানাং মাং প্রত্যাখ্যাস্যসি মানদ
বিষমগ্নিং জলং রজ্জুমাস্থাস্যে তব কারণাৎ

এবমুক্তস্তু বৈদর্ভ্যা নলস্তাং প্রত্যুবাচ হ
তিষ্ঠত্সু লোকপালেষু কথং মানুষমিচ্ছসি

যেষামহং লোককৃতামীশ্বরাণাং মহাত্মনাম্
ন পাদরজসা তুল্যো মনস্তে তেষু বর্ততাম্

বিপ্রিয়ং হ্যাচরন্মর্ত্যো দেবানাং মৃত্যুমৃচ্ছতি
ত্রাহি মামনবদ্যাঙ্গি বরয়স্ব সুরোত্তমান্

ততো বাষ্পকলাং বাচং দময়ন্তী শুচিস্মিতা
প্রব্যাহরন্তী শনকৈর্নলং রাজানমব্রবীৎ

অস্ত্যুপায়ো ময়া দৃষ্টো নিরপায়ো নরেশ্বর
যেন দোষো ন ভবিতা তব রাজন্কথংচন

ত্বং চৈব হি নরশ্রেষ্ঠ দেবাশ্চাগ্নিপুরোগমাঃ
আয়ান্তু সহিতাঃ সর্বে মম যত্র স্বয়ংবরঃ

ততোঽহং লোকপালানাং সংনিধৌ ত্বাং নরেশ্বর
বরয়িষ্যে নরব্যাঘ্র নৈবং দোষো ভবিষ্যতি

এবমুক্তস্তু বৈদর্ভ্যা নলো রাজা বিশাং পতে
আজগাম পুনস্তত্র যত্র দেবাঃ সমাগতাঃ

তমপশ্যংস্তথায়ান্তং লোকপালাঃ সহেশ্বরাঃ
দৃষ্ট্বা চৈনং ততোঽপৃচ্ছন্বৃত্তান্তং সর্বমেব তৎ

দেবা ঊচুঃ
কচ্চিদ্দৃষ্টা ত্বয়া রাজন্দময়ন্তী শুচিস্মিতা
কিমব্রবীচ্চ নঃ সর্বান্বদ ভূমিপতেঽনঘ

নল উবাচ
ভবদ্ভিরহমাদিষ্টো দময়ন্ত্যা নিবেশনম্
প্রবিষ্টঃ সুমহাকক্ষ্যং দণ্ডিভিঃ স্থবিরৈর্বৃতম্

প্রবিশন্তং চ মাং তত্র ন কশ্চিদ্দৃষ্টবান্নরঃ
ঋতে তাং পার্থিবসুতাং ভবতামেব তেজসা

সখ্যশ্চাস্যা ময়া দৃষ্টাস্তাভিশ্চাপ্যুপলক্ষিতঃ
বিস্মিতাশ্চাভবন্দৃষ্ট্বা সর্বা মাং বিবুধেশ্বরাঃ

বর্ণ্যমানেষু চ ময়া ভবত্সু রুচিরাননা
মামেব গতসংকল্পা বৃণীতে সুরসত্তমাঃ

অব্রবীচ্চৈব মাং বালা আয়ান্তু সহিতাঃ সুরাঃ
ত্বয়া সহ নরশ্রেষ্ঠ মম যত্র স্বয়ংবরঃ

তেষামহং সংনিধৌ ত্বাং বরয়িষ্যে নরোত্তম
এবং তব মহাবাহো দোষো ন ভবিতেতি হ

এতাবদেব বিবুধা যথাবৃত্তমুদাহৃতম্
ময়াশেষং প্রমাণং তু ভবন্তস্ত্রিদশেশ্বরাঃ