Utshovঅধ্যায় 52
52.1
বৃহদশ্ব উবাচ
তেভ্যঃ প্রতিজ্ঞায় নলঃ করিষ্য ইতি ভারত
অথৈনান্পরিপপ্রচ্ছ কৃতাঞ্জলিরবস্থিতঃ
52.2
কে বৈ ভবন্তঃ কশ্চাসৌ যস্যাহং দূত ঈপ্সিতঃ
কিং চ তত্র ময়া কার্যং কথয়ধ্বং যথাতথম্
52.3
এবমুক্তে নৈষধেন মঘবান্প্রত্যভাষত
অমরান্বৈ নিবোধাস্মান্দময়ন্ত্যর্থমাগতান্
52.4
অহমিন্দ্রোঽয়মগ্নিশ্চ তথৈবায়মপাংপতিঃ
শরীরান্তকরো নৄণাং যমোঽয়মপি পার্থিব
52.5
স বৈ ত্বমাগতানস্মান্দময়ন্ত্যৈ নিবেদয়
লোকপালাঃ সহেন্দ্রাস্ত্বাং সমায়ান্তি দিদৃক্ষবঃ
52.6
প্রাপ্তুমিচ্ছন্তি দেবাস্ত্বাং শক্রোঽগ্নির্বরুণো যমঃ
তেষামন্যতমং দেবং পতিত্বে বরয়স্ব হ
52.7
এবমুক্তঃ স শক্রেণ নলঃ প্রাঞ্জলিরব্রবীৎ
একার্থসমবেতং মাং ন প্রেষয়িতুমর্হথ
52.8
দেবা ঊচুঃ
করিষ্য ইতি সংশ্রুত্য পূর্বমস্মাসু নৈষধ
ন করিষ্যসি কস্মাত্ত্বং ব্রজ নৈষধ মাচিরম্
52.9
বৃহদশ্ব উবাচ
এবমুক্তঃ স দেবৈস্তৈর্নৈষধঃ পুনরব্রবীৎ
সুরক্ষিতানি বেশ্মানি প্রবেষ্টুং কথমুত্সহে
52.10
প্রবেক্ষ্যসীতি তং শক্রঃ পুনরেবাভ্যভাষত
জগাম স তথেত্যুক্ত্বা দময়ন্ত্যা নিবেশনম্
52.11
দদর্শ তত্র বৈদর্ভীং সখীগণসমাবৃতাম্
দেদীপ্যমানাং বপুষা শ্রিয়া চ বরবর্ণিনীম্
52.12
অতীব সুকুমারাঙ্গীং তনুমধ্যাং সুলোচনাম্
আক্ষিপন্তীমিব চ ভাঃ শশিনঃ স্বেন তেজসা
52.13
তস্য দৃষ্ট্বৈব ববৃধে কামস্তাং চারুহাসিনীম্
সত্যং চিকীর্ষমাণস্তু ধারয়ামাস হৃচ্ছয়ম্
52.14
ততস্তা নৈষধং দৃষ্ট্বা সংভ্রান্তাঃ পরমাঙ্গনাঃ
আসনেভ্যঃ সমুত্পেতুস্তেজসা তস্য ধর্ষিতাঃ
52.15
প্রশশংসুশ্চ সুপ্রীতা নলং তা বিস্ময়ান্বিতাঃ
ন চৈনমভ্যভাষন্ত মনোভিস্ত্বভ্যচিন্তয়ন্
52.16
অহো রূপমহো কান্তিরহো ধৈর্যং মহাত্মনঃ
কোঽয়ং দেবো নু যক্ষো নু গন্ধর্বো নু ভবিষ্যতি
52.17
ন ত্বেনং শক্নুবন্তি স্ম ব্যাহর্তুমপি কিংচন
তেজসা ধর্ষিতাঃ সর্বা লজ্জাবত্যো বরাঙ্গনাঃ
52.18
অথৈনং স্ময়মানেব স্মিতপূর্বাভিভাষিণী
দময়ন্তী নলং বীরমভ্যভাষত বিস্মিতা
52.19
কস্ত্বং সর্বানবদ্যাঙ্গ মম হৃচ্ছয়বর্ধন
প্রাপ্তোঽস্যমরবদ্বীর জ্ঞাতুমিচ্ছামি তেঽনঘ
52.20
কথমাগমনং চেহ কথং চাসি ন লক্ষিতঃ
সুরক্ষিতং হি মে বেশ্ম রাজা চৈবোগ্রশাসনঃ
52.21
এবমুক্তস্তু বৈদর্ভ্যা নলস্তাং প্রত্যুবাচ হ
নলং মাং বিদ্ধি কল্যাণি দেবদূতমিহাগতম্
52.22
দেবাস্ত্বাং প্রাপ্তুমিচ্ছন্তি শক্রোঽগ্নির্বরুণো যমঃ
তেষামন্যতমং দেবং পতিং বরয় শোভনে
52.23
তেষামেব প্রভাবেন প্রবিষ্টোঽহমলক্ষিতঃ
প্রবিশন্তং হি মাং কশ্চিন্নাপশ্যন্নাপ্যবারয়ৎ
52.24
এতদর্থমহং ভদ্রে প্রেষিতঃ সুরসত্তমৈঃ
এতচ্ছ্রুত্বা শুভে বুদ্ধিং প্রকুরুষ্ব যথেচ্ছসি