Utshovঅধ্যায় 51
51.1
বৃহদশ্ব উবাচ
দময়ন্তী তু তচ্ছ্রুত্বা বচো হংসস্য ভারত
তদা প্রভৃতি নস্বস্থা নলং প্রতি বভূব সা
51.2
ততশ্চিন্তাপরা দীনা বিবর্ণবদনা কৃশা
বভূব দময়ন্তী তু নিঃশ্বাসপরমা তদা
51.3
ঊর্ধ্বদৃষ্টির্ধ্যানপরা বভূবোন্মত্তদর্শনা
ন শয্যাসনভোগেষু রতিং বিন্দতি কর্হিচিৎ
51.4
ন নক্তং ন দিবা শেতে হা হেতি বদতী মুহুঃ
তামস্বস্থাং তদাকারাং সখ্যস্তা জজ্ঞুরিঙ্গিতৈঃ
51.5
ততো বিদর্ভপতয়ে দময়ন্ত্যাঃ সখীগণঃ
ন্যবেদয়ত নস্বস্থাং দময়ন্তীং নরেশ্বর
51.6
তচ্ছ্রুত্বা নৃপতির্ভীমো দময়ন্তীসখীগণাৎ
চিন্তয়ামাস তত্কার্যং সুমহত্স্বাং সুতাং প্রতি
51.7
স সমীক্ষ্য মহীপালঃ স্বাং সুতাং প্রাপ্তয়ৌবনাম্
অপশ্যদাত্মনঃ কার্যং দময়ন্ত্যাঃ স্বয়ংবরম্
51.8
স সংনিপাতয়ামাস মহীপালান্বিশাং পতে
অনুভূয়তাময়ং বীরাঃ স্বয়ংবর ইতি প্রভো
51.9
শ্রুত্বা তু পার্থিবাঃ সর্বে দময়ন্ত্যাঃ স্বয়ংবরম্
অভিজগ্মুস্তদা ভীমং রাজানো ভীমশাসনাৎ
51.10
হস্ত্যশ্বরথঘোষেণ নাদয়ন্তো বসুংধরাম্
বিচিত্রমাল্যাভরণৈর্বলৈর্দৃশ্যৈঃ স্বলংকৃতৈঃ
51.11
এতস্মিন্নেব কালে তু পুরাণাবৃষিসত্তমৌ
অটমানৌ মহাত্মানাবিন্দ্রলোকমিতো গতৌ
51.12
নারদঃ পর্বতশ্চৈব মহাত্মানৌ মহাব্রতৌ
দেবরাজস্য ভবনং বিবিশাতে সুপূজিতৌ
51.13
তাবর্চিত্বা সহস্রাক্ষস্ততঃ কুশলমব্যয়ম্
পপ্রচ্ছানাময়ং চাপি তয়োঃ সর্বগতং বিভুঃ
51.14
নারদ উবাচ
আবয়োঃ কুশলং দেব সর্বত্রগতমীশ্বর
লোকে চ মঘবন্কৃত্স্নে নৃপাঃ কুশলিনো বিভো
51.15
বৃহদশ্ব উবাচ
নারদস্য বচঃ শ্রুত্বা পপ্রচ্ছ বলবৃত্রহা
ধর্মজ্ঞাঃ পৃথিবীপালাস্ত্যক্তজীবিতয়োধিনঃ
51.16
শস্ত্রেণ নিধনং কালে যে গচ্ছন্ত্যপরাঙ্মুখাঃ
অয়ং লোকোঽক্ষয়স্তেষাং যথৈব মম কামধুক্
51.17
ক্ব নু তে ক্ষত্রিয়াঃ শূরা ন হি পশ্যামি তানহম্
আগচ্ছতো মহীপালানতিথীন্দয়িতান্মম
51.18
এবমুক্তস্তু শক্রেণ নারদঃ প্রত্যভাষত
শৃণু মে ভগবন্যেন ন দৃশ্যন্তে মহীক্ষিতঃ
51.19
বিদর্ভরাজদুহিতা দময়ন্তীতি বিশ্রুতা
রূপেণ সমতিক্রান্তা পৃথিব্যাং সর্বয়োষিতঃ
51.20
তস্যাঃ স্বয়ংবরঃ শক্র ভবিতা নচিরাদিব
তত্র গচ্ছন্তি রাজানো রাজপুত্রাশ্চ সর্বশঃ
51.21
তাং রত্নভূতাং লোকস্য প্রার্থয়ন্তো মহীক্ষিতঃ
কাঙ্ক্ষন্তি স্ম বিশেষেণ বলবৃত্রনিষূদন
51.22
এতস্মিন্কথ্যমানে তু লোকপালাশ্চ সাগ্নিকাঃ
আজগ্মুর্দেবরাজস্য সমীপমমরোত্তমাঃ
51.23
ততস্তচ্ছুশ্রুবুঃ সর্বে নারদস্য বচো মহৎ
শ্রুত্বা চৈবাব্রুবন্হৃষ্টা গচ্ছামো বয়মপ্যুত
51.24
ততঃ সর্বে মহারাজ সগণাঃ সহবাহনাঃ
বিদর্ভানভিতো জগ্মুর্যত্র সর্বে মহীক্ষিতঃ
51.25
নলোঽপি রাজা কৌন্তেয় শ্রুত্বা রাজ্ঞাং সমাগমম্
অভ্যগচ্ছদদীনাত্মা দময়ন্তীমনুব্রতঃ
51.26
অথ দেবাঃ পথি নলং দদৃশুর্ভূতলে স্থিতম্
সাক্ষাদিব স্থিতং মূর্ত্যা মন্মথং রূপসংপদা
51.27
তং দৃষ্ট্বা লোকপালাস্তে ভ্রাজমানং যথা রবিম্
তস্থুর্বিগতসংকল্পা বিস্মিতা রূপসংপদা
51.28
ততোঽন্তরিক্ষে বিষ্টভ্য বিমানানি দিবৌকসঃ
অব্রুবন্নৈষধং রাজন্নবতীর্য নভস্তলাৎ
51.29
ভো ভো নৈষধ রাজেন্দ্র নল সত্যব্রতো ভবান্
অস্মাকং কুরু সাহায্যং দূতো ভব নরোত্তম