Utshovঅধ্যায় 50
50.1
বৃহদশ্ব উবাচ
আসীদ্রাজা নলো নাম বীরসেনসুতো বলী
উপপন্নো গুণৈরিষ্টৈ রূপবানশ্বকোবিদঃ
50.2
অতিষ্ঠন্মনুজেন্দ্রাণাং মূর্ধ্নি দেবপতির্যথা
উপর্যুপরি সর্বেষামাদিত্য ইব তেজসা
50.3
ব্রহ্মণ্যো বেদবিচ্ছূরো নিষধেষু মহীপতিঃ
অক্ষপ্রিয়ঃ সত্যবাদী মহানক্ষৌহিণীপতিঃ
50.4
ঈপ্সিতো বরনারীণামুদারঃ সংয়তেন্দ্রিয়ঃ
রক্ষিতা ধন্বিনাং শ্রেষ্ঠঃ সাক্ষাদিব মনুঃ স্বয়ম্
50.5
তথৈবাসীদ্বিদর্ভেষু ভীমো ভীমপরাক্রমঃ
শূরঃ সর্বগুণৈর্যুক্তঃ প্রজাকামঃ স চাপ্রজঃ
50.6
স প্রজার্থে পরং যত্নমকরোত্সুসমাহিতঃ
তমভ্যগচ্ছদ্ব্রহ্মর্ষির্দমনো নাম ভারত
50.7
তং স ভীমঃ প্রজাকামস্তোষয়ামাস ধর্মবিৎ
মহিষ্যা সহ রাজেন্দ্র সত্কারেণ সুবর্চসম্
50.8
তস্মৈ প্রসন্নো দমনঃ সভার্যায় বরং দদৌ
কন্যারত্নং কুমারাংশ্চ ত্রীনুদারান্মহায়শাঃ
50.9
দময়ন্তীং দমং দান্তং দমনং চ সুবর্চসম্
উপপন্নান্গুণৈঃ সর্বৈর্ভীমান্ভীমপরাক্রমান্
50.10
দময়ন্তী তু রূপেণ তেজসা যশসা শ্রিয়া
সৌভাগ্যেন চ লোকেষু যশঃ প্রাপ সুমধ্যমা
50.11
অথ তাং বয়সি প্রাপ্তে দাসীনাং সমলংকৃতম্
শতং সখীনাং চ তথা পর্যুপাস্তে শচীমিব
50.12
তত্র স্ম ভ্রাজতে ভৈমী সর্বাভরণভূষিতা
সখীমধ্যেঽনবদ্যাঙ্গী বিদ্যুত্সৌদামিনী যথা
অতীব রূপসংপন্না শ্রীরিবায়তলোচনা
50.13
ন দেবেষু ন যক্ষেষু তাদৃগ্রূপবতী ক্বচিৎ
মানুষেষ্বপি চান্যেষু দৃষ্টপূর্বা ন চ শ্রুতা
চিত্তপ্রমাথিনী বালা দেবানামপি সুন্দরী
50.14
নলশ্চ নরশার্দূলো রূপেণাপ্রতিমো ভুবি
কন্দর্প ইব রূপেণ মূর্তিমানভবত্স্বয়ম্
50.15
তস্যাঃ সমীপে তু নলং প্রশশংসুঃ কুতূহলাৎ
নৈষধস্য সমীপে তু দময়ন্তীং পুনঃ পুনঃ
50.16
তয়োরদৃষ্টকামোঽভূচ্ছৃণ্বতোঃ সততং গুণান্
অন্যোন্যং প্রতি কৌন্তেয় স ব্যবর্ধত হৃচ্ছয়ঃ
50.17
অশক্নুবন্নলঃ কামং তদা ধারয়িতুং হৃদা
অন্তঃপুরসমীপস্থে বন আস্তে রহোগতঃ
50.18
স দদর্শ তদা হংসাঞ্জাতরূপপরিচ্ছদান্
বনে বিচরতাং তেষামেকং জগ্রাহ পক্ষিণম্
50.19
ততোঽন্তরিক্ষগো বাচং ব্যাজহার তদা নলম্
ন হন্তব্যোঽস্মি তে রাজন্করিষ্যামি হি তে প্রিয়ম্
50.20
দময়ন্তীসকাশে ত্বাং কথয়িষ্যামি নৈষধ
যথা ত্বদন্যং পুরুষং ন সা মংস্যতি কর্হিচিৎ
50.21
এবমুক্তস্ততো হংসমুত্সসর্জ মহীপতিঃ
তে তু হংসাঃ সমুত্পত্য বিদর্ভানগমংস্ততঃ
50.22
বিদর্ভনগরীং গত্বা দময়ন্ত্যাস্তদান্তিকে
নিপেতুস্তে গরুত্মন্তঃ সা দদর্শাথ তান্খগান্
50.23
সা তানদ্ভুতরূপান্বৈ দৃষ্ট্বা সখিগণাবৃতা
হৃষ্টা গ্রহীতুং খগমাংস্ত্বরমাণোপচক্রমে
50.24
অথ হংসা বিসসৃপুঃ সর্বতঃ প্রমদাবনে
একৈকশস্ততঃ কন্যাস্তান্হংসান্সমুপাদ্রবন্
50.25
দময়ন্তী তু যং হংসং সমুপাধাবদন্তিকে
স মানুষীং গিরং কৃত্বা দময়ন্তীমথাব্রবীৎ
50.26
দময়ন্তি নলো নাম নিষধেষু মহীপতিঃ
অশ্বিনোঃ সদৃশো রূপে ন সমাস্তস্য মানুষাঃ
50.27
তস্য বৈ যদি ভার্যা ত্বং ভবেথা বরবর্ণিনি
সফলং তে ভবেজ্জন্ম রূপং চেদং সুমধ্যমে
50.28
বয়ং হি দেবগন্ধর্বমনুষ্যোরগরাক্ষসান্
দৃষ্টবন্তো ন চাস্মাভির্দৃষ্টপূর্বস্তথাবিধঃ
50.29
ত্বং চাপি রত্নং নারীণাং নরেষু চ নলো বরঃ
বিশিষ্টায়া বিশিষ্টেন সংগমো গুণবান্ভবেৎ
50.30
এবমুক্তা তু হংসেন দময়ন্তী বিশাং পতে
অব্রবীত্তত্র তং হংসং তমপ্যেবং নলং বদ
50.31
তথেত্যুক্ত্বাণ্ডজঃ কন্যাং বৈদর্ভস্য বিশাং পতে
পুনরাগম্য নিষধান্নলে সর্বং ন্যবেদয়ৎ