Utshovঅধ্যায় 49
49.1
জনমেজয় উবাচ
অস্ত্রহেতোর্গতে পার্থে শক্রলোকং মহাত্মনি
যুধিষ্ঠিরপ্রভৃতয়ঃ কিমকুর্বন্ত পাণ্ডবাঃ
49.2
বৈশংপায়ন উবাচ
অস্ত্রহেতোর্গতে পার্থে শক্রলোকং মহাত্মনি
ন্যবসন্কৃষ্ণয়া সার্ধং কাম্যকে পুরুষর্ষভাঃ
49.3
ততঃ কদাচিদেকান্তে বিবিক্ত ইব শাদ্বলে
দুঃখার্তা ভরতশ্রেষ্ঠা নিষেদুঃ সহ কৃষ্ণয়া
ধনংজয়ং শোচমানাঃ সাশ্রুকণ্ঠাঃ সুদুঃখিতাঃ
49.4
তদ্বিয়োগাদ্ধি তান্সর্বাঞ্শোকঃ সমভিপুপ্লুবে
ধনংজয়বিয়োগাচ্চ রাজ্যনাশাচ্চ দুঃখিতাঃ
49.5
অথ ভীমো মহাবাহুর্যুধিষ্ঠিরমভাষত
নিদেশাত্তে মহারাজ গতোঽসৌ পুরুষর্ষভঃ
অর্জুনঃ পাণ্ডুপুত্রাণাং যস্মিন্প্রাণাঃ প্রতিষ্ঠিতাঃ
49.6
যস্মিন্বিনষ্টে পাঞ্চালাঃ সহ পুত্রৈস্তথা বয়ম্
সাত্যকির্বাসুদেবশ্চ বিনশ্যেয়ুরসংশয়ম্
49.7
যোঽসৌ গচ্ছতি তেজস্বী বহূন্ক্লেশানচিন্তয়ন্
ভবন্নিয়োগাদ্বীভত্সুস্ততো দুঃখতরং নু কিম্
49.8
যস্য বাহূ সমাশ্রিত্য বয়ং সর্বে মহাত্মনঃ
মন্যামহে জিতানাজৌ পরান্প্রাপ্তাং চ মেদিনীম্
49.9
যস্য প্রভাবান্ন ময়া সভামধ্যে ধনুষ্মতঃ
নীতা লোকমমুং সর্বে ধার্তরাষ্ট্রাঃ সসৌবলাঃ
49.10
তে বয়ং বাহুবলিনঃ ক্রোধমুত্থিতমাত্মনঃ
সহামহে ভবন্মূলং বাসুদেবেন পালিতাঃ
49.11
বয়ং হি সহ কৃষ্ণেন হত্বা কর্ণমুখান্পরান্
স্ববাহুবিজিতাং কৃত্স্নাং প্রশাসেম বসুংধরাম্
49.12
ভবতো দ্যূতদোষেণ সর্বে বয়মুপপ্লুতাঃ
অহীনপৌরুষা রাজন্বলিভির্বলবত্তমাঃ
49.13
ক্ষাত্রং ধর্মং মহারাজ সমবেক্ষিতুমর্হসি
ন হি ধর্মো মহারাজ ক্ষত্রিয়স্য বনাশ্রয়ঃ
রাজ্যমেব পরং ধর্মং ক্ষত্রিয়স্য বিদুর্বুধাঃ
49.14
স ক্ষত্রধর্মবিদ্রাজন্মা ধর্ম্যান্নীনশঃ পথঃ
প্রাগ্দ্বাদশ সমা রাজন্ধার্তরাষ্ট্রান্নিহন্মহি
49.15
নিবর্ত্য চ বনাত্পার্থমানায্য চ জনার্দনম্
ব্যূঢানীকান্মহারাজ জবেনৈব মহাহবে
ধার্তরাষ্ট্রানমুং লোকং গময়ামি বিশাং পতে
49.16
সর্বানহং হনিষ্যামি ধার্তরাষ্ট্রান্সসৌবলান্
দুর্যোধনং চ কর্ণং চ যো বান্যঃ প্রতিয়োত্স্যতে
49.17
ময়া প্রশমিতে পশ্চাত্ত্বমেষ্যসি বনাত্পুনঃ
এবং কৃতে ন তে দোষো ভবিষ্যতি বিশাং পতে
49.18
যজ্ঞৈশ্চ বিবিধৈস্তাত কৃতং পাপমরিংদম
অবধূয় মহারাজ গচ্ছেম স্বর্গমুত্তমম্
49.19
এবমেতদ্ভবেদ্রাজন্যদি রাজা ন বালিশঃ
অস্মাকং দীর্ঘসূত্রঃ স্যাদ্ভবান্ধর্মপরায়ণঃ
49.20
নিকৃত্যা নিকৃতিপ্রজ্ঞা হন্তব্যা ইতি নিশ্চয়ঃ
ন হি নৈকৃতিকং হত্বা নিকৃত্যা পাপমুচ্যতে
49.21
তথা ভারত ধর্মেষু ধর্মজ্ঞৈরিহ দৃশ্যতে
অহোরাত্রং মহারাজ তুল্যং সংবত্সরেণ হি
49.22
তথৈব বেদবচনং শ্রূয়তে নিত্যদা বিভো
সংবত্সরো মহারাজ পূর্ণো ভবতি কৃচ্ছ্রতঃ
49.23
যদি বেদাঃ প্রমাণং তে দিবসাদূর্ধ্বমচ্যুত
ত্রয়োদশ সমাঃ কালো জ্ঞায়তাং পরিনিষ্ঠিতঃ
49.24
কালো দুর্যোধনং হন্তুং সানুবন্ধমরিংদম
একাগ্রাং পৃথিবীং সর্বাং পুরা রাজন্করোতি সঃ
49.25
এবং ব্রুবাণং ভীমং তু ধর্মরাজো যুধিষ্ঠিরঃ
উবাচ সান্ত্বয়ন্রাজা মূর্ধ্ন্যুপাঘ্রায় পাণ্ডবম্
49.26
অসংশয়ং মহাবাহো হনিষ্যসি সুয়োধনম্
বর্ষাত্ত্রয়োদশাদূর্ধ্বং সহ গাণ্ডীবধন্বনা
49.27
যচ্চ মা ভাষসে পার্থ প্রাপ্তঃ কাল ইতি প্রভো
অনৃতং নোত্সহে বক্তুং ন হ্যেতন্ময়ি বিদ্যতে
49.28
অন্তরেণাপি কৌন্তেয় নিকৃতিং পাপনিশ্চয়ম্
হন্তা ত্বমসি দুর্ধর্ষ সানুবন্ধং সুয়োধনম্
49.29
এবং ব্রুবতি ভীমং তু ধর্মরাজে যুধিষ্ঠিরে
আজগাম মহাভাগো বৃহদশ্বো মহানৃষিঃ
49.30
তমভিপ্রেক্ষ্য ধর্মাত্মা সংপ্রাপ্তং ধর্মচারিণম্
শাস্ত্রবন্মধুপর্কেণ পূজয়ামাস ধর্মরাট্
49.31
আশ্বস্তং চৈনমাসীনমুপাসীনো যুধিষ্ঠিরঃ
অভিপ্রেক্ষ্য মহাবাহুঃ কৃপণং বহ্বভাষত
49.32
অক্ষদ্যূতেন ভগবন্ধনং রাজ্যং চ মে হৃতম্
আহূয় নিকৃতিপ্রজ্ঞৈঃ কিতবৈরক্ষকোবিদৈঃ
49.33
অনক্ষজ্ঞস্য হি সতো নিকৃত্যা পাপনিশ্চয়ৈঃ
ভার্যা চ মে সভাং নীতা প্রাণেভ্যোঽপি গরীয়সী
49.34
অস্তি রাজা ময়া কশ্চিদল্পভাগ্যতরো ভুবি
ভবতা দৃষ্টপূর্বো বা শ্রুতপূর্বোঽপি বা ভবেৎ
ন মত্তো দুঃখিততরঃ পুমানস্তীতি মে মতিঃ
49.35
বৃহদশ্ব উবাচ
যদ্ব্রবীষি মহারাজ ন মত্তো বিদ্যতে ক্বচিৎ
অল্পভাগ্যতরঃ কশ্চিত্পুমানস্তীতি পাণ্ডব
49.36
অত্র তে কথয়িষ্যামি যদি শুশ্রূষসেঽনঘ
যস্ত্বত্তো দুঃখিততরো রাজাসীত্পৃথিবীপতে
49.37
বৈশংপায়ন উবাচ
অথৈনমব্রবীদ্রাজা ব্রবীতু ভগবানিতি
ইমামবস্থাং সংপ্রাপ্তং শ্রোতুমিচ্ছামি পার্থিবম্
49.38
বৃহদশ্ব উবাচ
শৃণু রাজন্নবহিতঃ সহ ভ্রাতৃভিরচ্যুত
যস্ত্বত্তো দুঃখিততরো রাজাসীত্পৃথিবীপতে
49.39
নিষধেষু মহীপালো বীরসেন ইতি স্ম হ
তস্য পুত্রোঽভবন্নাম্না নলো ধর্মার্থদর্শিবান্
49.40
স নিকৃত্যা জিতো রাজা পুষ্করেণেতি নঃ শ্রুতম্
বনবাসমদুঃখার্হো ভার্যয়া ন্যবসত্সহ
49.41
ন তস্যাশ্বো ন চ রথো ন ভ্রাতা ন চ বান্ধবাঃ
বনে নিবসতো রাজঞ্শিষ্যন্তে স্ম কদাচন
49.42
ভবান্হি সংবৃতো বীরৈর্ভ্রাতৃভির্দেবসংমিতৈঃ
ব্রহ্মকল্পৈর্দ্বিজাগ্র্যৈশ্চ তস্মান্নার্হসি শোচিতুম্
49.43
যুধিষ্ঠির উবাচ
বিস্তরেণাহমিচ্ছামি নলস্য সুমহাত্মনঃ
চরিতং বদতাং শ্রেষ্ঠ তন্মমাখ্যাতুমর্হসি