Utshovঅধ্যায় 48
48.1
বৈশংপায়ন উবাচ
সুদীর্ঘমুষ্ণং নিঃশ্বস্য ধৃতরাষ্ট্রোঽম্বিকাসুতঃ
অব্রবীত্সংজয়ং সূতমামন্ত্র্য ভরতর্ষভ
48.2
দেবপুত্রৌ মহাভাগৌ দেবরাজসমদ্যুতী
নকুলঃ সহদেবশ্চ পাণ্ডবৌ যুদ্ধদুর্মদৌ
48.3
দৃঢায়ুধৌ দূরপাতৌ যুদ্ধে চ কৃতনিশ্চয়ৌ
শীঘ্রহস্তৌ দৃঢক্রোধৌ নিত্যয়ুক্তৌ তরস্বিনৌ
48.4
ভীমার্জুনৌ পুরোধায় যদা তৌ রণমূর্ধনি
স্থাস্যেতে সিংহবিক্রান্তাবশ্বিনাবিব দুঃসহৌ
ন শেষমিহ পশ্যামি তদা সৈন্যস্য সংজয়
48.5
তৌ হ্যপ্রতিরথৌ যুদ্ধে দেবপুত্রৌ মহারথৌ
দ্রৌপদ্যাস্তং পরিক্লেশং ন ক্ষংস্যেতে ত্বমর্ষিণৌ
48.6
বৃষ্ণয়ো বা মহেষ্বাসা পাঞ্চালা বা মহৌজসঃ
যুধি সত্যাভিসংধেন বাসুদেবেন রক্ষিতাঃ
প্রধক্ষ্যন্তি রণে পার্থাঃ পুত্রাণাং মম বাহিনীম্
48.7
রামকৃষ্ণপ্রণীতানাং বৃষ্ণীনাং সূতনন্দন
ন শক্যঃ সহিতুং বেগঃ পর্বতৈরপি সংয়ুগে
48.8
তেষাং মধ্যে মহেষ্বাসো ভীমো ভীমপরাক্রমঃ
শৈক্যয়া বীরঘাতিন্যা গদয়া বিচরিষ্যতি
48.9
তথা গাণ্ডীবনির্ঘোষং বিস্ফূর্জিতমিবাশনেঃ
গদাবেগং চ ভীমস্য নালং সোঢুং নরাধিপাঃ
48.10
ততোঽহং সুহৃদাং বাচো দুর্যোধনবশানুগঃ
স্মরণীয়াঃ স্মরিষ্যামি ময়া যা ন কৃতাঃ পুরা
48.11
সংজয় উবাচ
ব্যতিক্রমোঽয়ং সুমহাংস্ত্বয়া রাজন্নুপেক্ষিতঃ
সমর্থেনাপি যন্মোহাত্পুত্রস্তে ন নিবারিতঃ
48.12
শ্রুত্বা হি নির্জিতান্দ্যূতে পাণ্ডবান্মধুসূদনঃ
ত্বরিতঃ কাম্যকে পার্থান্সমভাবয়দচ্যুতঃ
48.13
দ্রুপদস্য তথা পুত্রা ধৃষ্টদ্যুম্নপুরোগমাঃ
বিরাটো ধৃষ্টকেতুশ্চ কেকয়াশ্চ মহারথাঃ
48.14
তৈশ্চ যত্কথিতং তত্র দৃষ্ট্বা পার্থান্পরাজিতান্
চারেণ বিদিতং সর্বং তন্ময়া বেদিতং চ তে
48.15
সমাগম্য বৃতস্তত্র পাণ্ডবৈর্মধুসূদনঃ
সারথ্যে ফল্গুনস্যাজৌ তথেত্যাহ চ তান্হরিঃ
48.16
অমর্ষিতো হি কৃষ্ণোঽপি দৃষ্ট্বা পার্থাংস্তথাগতান্
কৃষ্ণাজিনোত্তরাসঙ্গানব্রবীচ্চ যুধিষ্ঠিরম্
48.17
যা সা সমৃদ্ধিঃ পার্থানামিন্দ্রপ্রস্থে বভূব হ
রাজসূয়ে ময়া দৃষ্টা নৃপৈরন্যৈঃ সুদুর্লভা
48.18
যত্র সর্বান্মহীপালাঞ্শস্ত্রতেজোভয়ার্দিতান্
সবঙ্গাঙ্গান্সপৌণ্ড্রোড্রান্সচোলদ্রবিডান্ধকান্
48.19
সাগরানূপগাংশ্চৈব যে চ পত্তনবাসিনঃ
সিংহলান্বর্বরান্ম্লেচ্ছান্যে চ জাঙ্গলবাসিনঃ
48.20
পশ্চিমানি চ রাজ্যানি শতশঃ সাগরান্তিকান্
পহ্লবান্দরদান্সর্বান্কিরাতান্যবনাঞ্শকান্
48.21
হারহূণাংশ্চ চীনাংশ্চ তুখারান্সৈন্ধবাংস্তথা
জাগুডান্রমঠান্মুণ্ডান্স্ত্রীরাজ্যানথ তঙ্গণান্
48.22
এতে চান্যে চ বহবো যে চ তে ভরতর্ষভ
আগতানহমদ্রাক্ষং যজ্ঞে তে পরিবেষকান্
48.23
সা তে সমৃদ্ধির্যৈরাত্তা চপলা প্রতিসারিণী
আদায় জীবিতং তেষামাহরিষ্যামি তামহম্
48.24
রামেণ সহ কৌরব্য ভীমার্জুনয়মৈস্তথা
অক্রূরগদসাম্বৈশ্চ প্রদ্যুম্নেনাহুকেন চ
ধৃষ্টদ্যুম্নেন বীরেণ শিশুপালাত্মজেন চ
48.25
দুর্যোধনং রণে হত্বা সদ্যঃ কর্ণং চ ভারত
দুঃশাসনং সৌবলেয়ং যশ্চান্যঃ প্রতিয়োত্স্যতে
48.26
ততস্ত্বং হাস্তিনপুরে ভ্রাতৃভিঃ সহিতো বসন্
ধার্তরাষ্ট্রীং শ্রিয়ং প্রাপ্য প্রশাধি পৃথিবীমিমাম্
48.27
অথৈনমব্রবীদ্রাজা তস্মিন্বীরসমাগমে
শৃণ্বত্সু তেষু সর্বেষু ধৃষ্টদ্যুম্নমুখেষু চ
48.28
প্রতিগৃহ্ণামি তে বাচং সত্যামেতাং জনার্দন
অমিত্রান্মে মহাবাহো সানুবন্ধান্হনিষ্যসি
48.29
বর্ষাত্ত্রয়োদশাদূর্ধ্বং সত্যং মাং কুরু কেশব
প্রতিজ্ঞাতো বনে বাসো রাজমধ্যে ময়া হ্যয়ম্
48.30
তদ্ধর্মরাজবচনং প্রতিশ্রুত্য সভাসদঃ
ধৃষ্টদ্যুম্নপুরোগাস্তে শময়ামাসুরঞ্জসা
কেশবং মধুরৈর্বাক্যৈঃ কালয়ুক্তৈরমর্ষিতম্
48.31
পাঞ্চালীং চাহুরক্লিষ্টাং বাসুদেবস্য শৃণ্বতঃ
দুর্যোধনস্তব ক্রোধাদ্দেবি ত্যক্ষ্যতি জীবিতম্
প্রতিজানীম তে সত্যং মা শুচো বরবর্ণিনি
48.32
যে স্ম তে কুপিতাং কৃষ্ণে দৃষ্ট্বা ত্বাং প্রাহসংস্তদা
মাংসানি তেষাং খাদন্তো হসিষ্যন্তি মৃগদ্বিজাঃ
48.33
পাস্যন্তি রুধিরং তেষাং গৃধ্রা গোমায়বস্তথা
উত্তমাঙ্গানি কর্ষন্তো যৈস্ত্বং কৃষ্টা সভাতলে
48.34
তেষাং দ্রক্ষ্যসি পাঞ্চালি গাত্রাণি পৃথিবীতলে
ক্রব্যাদৈঃ কৃষ্যমাণানি ভক্ষ্যমাণানি চাসকৃৎ
48.35
পরিক্লিষ্টাসি যৈস্তত্র যৈশ্চাপি সমুপেক্ষিতা
তেষামুত্কৃত্তশিরসাং ভূমিঃ পাস্যতি শোণিতম্
48.36
এবং বহুবিধা বাচস্তদোচুঃ পুরুষর্ষভাঃ
সর্বে তেজস্বিনঃ শূরাঃ সর্বে চাহতলক্ষণাঃ
48.37
তে ধর্মরাজেন বৃতা বর্ষাদূর্ধ্বং ত্রয়োদশাৎ
পুরস্কৃত্যোপয়াস্যন্তি বাসুদেবং মহারথাঃ
48.38
রামশ্চ কৃষ্ণশ্চ ধনংজয়শ্চ; প্রদ্যুম্নসাম্বৌ যুয়ুধানভীমৌ
মাদ্রীসুতৌ কেকয়রাজপুত্রাঃ; পাঞ্চালপুত্রাঃ সহ ধর্মরাজ্ঞা
48.39
এতান্সর্বাঁল্লোকবীরানজেয়া;ন্মহাত্মনঃ সানুবন্ধান্সসৈন্যান্
কো জীবিতার্থী সমরে প্রত্যুদীয়া;ত্ক্রুদ্ধান্সিংহান্কেসরিণো যথৈব
48.40
ধৃতরাষ্ট্র উবাচ
যন্মাব্রবীদ্বিদুরো দ্যূতকালে; ত্বং পাণ্ডবাঞ্জেষ্যসি চেন্নরেন্দ্র
ধ্রুবং কুরূণাময়মন্তকালো; মহাভয়ো ভবিতা শোণিতৌঘঃ
48.41
মন্যে তথা তদ্ভবিতেতি সূত; যথা ক্ষত্তা প্রাহ বচঃ পুরা মাম্
অসংশয়ং ভবিতা যুদ্ধমেত;দ্গতে কালে পাণ্ডবানাং যথোক্তম্