অধ্যায় 47

47.1

জনমেজয় উবাচ
যদিদং শোচিতং রাজ্ঞা ধৃতরাষ্ট্রেণ বৈ মুনে
প্রব্রাজ্য পাণ্ডবান্বীরান্সর্বমেতন্নিরর্থকম্

কথং হি রাজা পুত্রং স্বমুপেক্ষেতাল্পচেতসম্
দুর্যোধনং পাণ্ডুপুত্রান্কোপয়ানং মহারথান্

কিমাসীত্পাণ্ডুপুত্রাণাং বনে ভোজনমুচ্যতাম্
বানেয়মথ বা কৃষ্টমেতদাখ্যাতু মে ভবান্

বৈশংপায়ন উবাচ
বানেয়ং চ মৃগাংশ্চৈব শুদ্ধৈর্বাণৈর্নিপাতিতান্
ব্রাহ্মণানাং নিবেদ্যাগ্রমভুঞ্জন্পুরুষর্ষভাঃ

তাংস্তু শূরান্মহেষ্বাসাংস্তদা নিবসতো বনে
অন্বয়ুর্ব্রাহ্মণা রাজন্সাগ্নয়োঽনগ্নয়স্তথা

ব্রাহ্মণানাং সহস্রাণি স্নাতকানাং মহাত্মনাম্
দশ মোক্ষবিদাং তদ্বদ্যান্বিভর্তি যুধিষ্ঠিরঃ

রুরূন্কৃষ্ণমৃগাংশ্চৈব মেধ্যাংশ্চান্যান্বনেচরান্
বাণৈরুন্মথ্য বিধিবদ্ব্রাহ্মণেভ্যো ন্যবেদয়ৎ

ন তত্র কশ্চিদ্দুর্বর্ণো ব্যাধিতো বাপ্যদৃশ্যত
কৃশো বা দুর্বলো বাপি দীনো ভীতোঽপি বা নরঃ

পুত্রানিব প্রিয়াঞ্জ্ঞাতীন্ভ্রাতৄনিব সহোদরান্
পুপোষ কৌরবশ্রেষ্ঠো ধর্মরাজো যুধিষ্ঠিরঃ

পতীংশ্চ দ্রৌপদী সর্বান্দ্বিজাংশ্চৈব যশস্বিনী
মাতেব ভোজয়িত্বাগ্রে শিষ্টমাহারয়ত্তদা

প্রাচীং রাজা দক্ষিণাং ভীমসেনো; যমৌ প্রতীচীমথ বাপ্যুদীচীম্
ধনুর্ধরা মাংসহেতোর্মৃগাণাং; ক্ষয়ং চক্রুর্নিত্যমেবোপগম্য

তথা তেষাং বসতাং কাম্যকে বৈ; বিহীনানামর্জুনেনোত্সুকানাম্
পঞ্চৈব বর্ষাণি তদা ব্যতীয়ু;রধীয়তাং জপতাং জুহ্বতাং চ