UtshovChapter 47
47.1
जनमेजय उवाच
यदिदं शोचितं राज्ञा धृतराष्ट्रेण वै मुने
प्रव्राज्य पाण्डवान्वीरान्सर्वमेतन्निरर्थकम्
Janamejaya uvacha
Yadidam shochitam ragya dhritarashtrena vai mune
Pravrajya pandavanviransarvametannirarthakam
47.2
कथं हि राजा पुत्रं स्वमुपेक्षेताल्पचेतसम्
दुर्योधनं पाण्डुपुत्रान्कोपयानं महारथान्
Katham hi raja putram svamupekshetalpachetasam
Duryodhanam panduputrankopayanam maharathan
47.3
किमासीत्पाण्डुपुत्राणां वने भोजनमुच्यताम्
वानेयमथ वा कृष्टमेतदाख्यातु मे भवान्
Kimasitpanduputranam vane bhojanamuchyatam
Vaneyamatha va krishtametadakhyatu me bhavan
47.4
वैशंपायन उवाच
वानेयं च मृगांश्चैव शुद्धैर्बाणैर्निपातितान्
ब्राह्मणानां निवेद्याग्रमभुञ्जन्पुरुषर्षभाः
Vaishampayana uvacha
Vaneyam cha mriganshchaiva shuddhairbanairnipatitan
Brahmananam nivedyagramabhunjanpurusharshabhah
47.5
तांस्तु शूरान्महेष्वासांस्तदा निवसतो वने
अन्वयुर्ब्राह्मणा राजन्साग्नयोऽनग्नयस्तथा
Tanstu shuranmaheshvasanstada nivasato vane
Anvayurbrahmana rajansagnayonagnayastatha
47.6
ब्राह्मणानां सहस्राणि स्नातकानां महात्मनाम्
दश मोक्षविदां तद्वद्यान्बिभर्ति युधिष्ठिरः
Brahmananam sahasrani snatakanam mahatmanam
Dasha mokshavidam tadvadyanbibharti yudhishthirah
47.7
रुरून्कृष्णमृगांश्चैव मेध्यांश्चान्यान्वनेचरान्
बाणैरुन्मथ्य विधिवद्ब्राह्मणेभ्यो न्यवेदयत्
Rurunkrishnamriganshchaiva medhyanshchanyanvanecharan
Banairunmathya vidhivadbrahmanebhyo nyavedayat
47.8
न तत्र कश्चिद्दुर्वर्णो व्याधितो वाप्यदृश्यत
कृशो वा दुर्बलो वापि दीनो भीतोऽपि वा नरः
Na tatra kashchiddurvarno vyadhito vapyadrishyata
Krisho va durbalo vapi dino bhitopi va narah
47.9
पुत्रानिव प्रियाञ्ज्ञातीन्भ्रातॄनिव सहोदरान्
पुपोष कौरवश्रेष्ठो धर्मराजो युधिष्ठिरः
Putraniva priyangyatinbhratriniva sahodaran
Puposha kauravashreshtho dharmarajo yudhishthirah
47.10
पतींश्च द्रौपदी सर्वान्द्विजांश्चैव यशस्विनी
मातेव भोजयित्वाग्रे शिष्टमाहारयत्तदा
Patinshcha draupadi sarvandvijanshchaiva yashasvini
Mateva bhojayitvagre shishtamaharayattada
47.11
प्राचीं राजा दक्षिणां भीमसेनो; यमौ प्रतीचीमथ वाप्युदीचीम्
धनुर्धरा मांसहेतोर्मृगाणां; क्षयं चक्रुर्नित्यमेवोपगम्य
Prachim raja dakshinam bhimaseno; yamau pratichimatha vapyudichim
Dhanurdhara mansahetormriganam; kshayam chakrurnityamevopagamya
47.12
तथा तेषां वसतां काम्यके वै; विहीनानामर्जुनेनोत्सुकानाम्
पञ्चैव वर्षाणि तदा व्यतीयु;रधीयतां जपतां जुह्वतां च
Tatha tesham vasatam kamyake vai; vihinanamarjunenotsukanam
Panchaiva varshani tada vyatiyu;radhiyatam japatam juhvatam cha