Utshovঅধ্যায় 46
46.1
জনমেজয় উবাচ
অত্যদ্ভুতমিদং কর্ম পার্থস্যামিততেজসঃ
ধৃতরাষ্ট্রো মহাতেজাঃ শ্রুত্বা বিপ্র কিমব্রবীৎ
46.2
বৈশংপায়ন উবাচ
শক্রলোকগতং পার্থং শ্রুত্বা রাজাম্বিকাসুতঃ
দ্বৈপায়নাদৃষিশ্রেষ্ঠাত্সংজয়ং বাক্যমব্রবীৎ
46.3
শ্রুতং মে সূত কার্ত্স্ন্যেন কর্ম পার্থস্য ধীমতঃ
কচ্চিত্তবাপি বিদিতং যথাতথ্যেন সারথে
46.4
প্রমত্তো গ্রাম্যধর্মেষু মন্দাত্মা পাপনিশ্চয়ঃ
মম পুত্রঃ সুদুর্বুদ্ধিঃ পৃথিবীং ঘাতয়িষ্যতি
46.5
যস্য নিত্যমৃতা বাচঃ স্বৈরেষ্বপি মহাত্মনঃ
ত্রৈলোক্যমপি তস্য স্যাদ্যোদ্ধা যস্য ধনংজয়ঃ
46.6
অস্যতঃ কর্ণিনারাচাংস্তীক্ষ্ণাগ্রাংশ্চ শিলাশিতান্
কোঽর্জুনস্যাগ্রতস্তিষ্ঠেদপি মৃত্যুর্জরাতিগঃ
46.7
মম পুত্রা দুরাত্মানঃ সর্বে মৃত্যুবশং গতাঃ
যেষাং যুদ্ধং দুরাধর্ষৈঃ পাণ্ডবৈঃ প্রত্যুপস্থিতম্
46.8
তস্যৈব চ ন পশ্যামি যুধি গাণ্ডীবধন্বনঃ
অনিশং চিন্তয়ানোঽপি য এনমুদিয়াদ্রথী
46.9
দ্রোণকর্ণৌ প্রতীয়াতাং যদি ভীষ্মোঽপি বা রণে
মহান্স্যাত্সংশয়ো লোকে ন তু পশ্যামি নো জয়ম্
46.10
ঘৃণী কর্ণঃ প্রমাদী চ আচার্যঃ স্থবিরো গুরুঃ
অমর্ষী বলবান্পার্থঃ সংরম্ভী দৃঢবিক্রমঃ
46.11
ভবেত্সুতুমুলং যুদ্ধং সর্বশোঽপ্যপরাজিতম্
সর্বে হ্যস্ত্রবিদঃ শূরাঃ সর্বে প্রাপ্তা মহদ্যশঃ
46.12
অপি সর্বেশ্বরত্বং হি ন বাঞ্ছেরন্পরাজিতাঃ
বধে নূনং ভবেচ্ছান্তিস্তেষাং বা ফল্গুনস্য বা
46.13
ন তু হন্তার্জুনস্যাস্তি জেতা বাস্য ন বিদ্যতে
মন্যুস্তস্য কথং শাম্যেন্মন্দান্প্রতি সমুত্থিতঃ
46.14
ত্রিদশেশসমো বীরঃ খাণ্ডবেঽগ্নিমতর্পয়ৎ
জিগায় পার্থিবান্সর্বান্রাজসূয়ে মহাক্রতৌ
46.15
শেষং কুর্যাদ্গিরের্বজ্রং নিপতন্মূর্ধ্নি সংজয়
ন তু কুর্যুঃ শরাঃ শেষমস্তাস্তাত কিরীটিনা
46.16
যথা হি কিরণা ভানোস্তপন্তীহ চরাচরম্
তথা পার্থভুজোত্সৃষ্টাঃ শরাস্তপ্স্যন্তি মে সুতান্
46.17
অপি বা রথঘোষেণ ভয়ার্তা সব্যসাচিনঃ
প্রতিভাতি বিদীর্ণেব সর্বতো ভারতী চমূঃ
46.18
যদুদ্বপন্প্রবপংশ্চৈব বাণা;ন্স্থাতাততায়ী সমরে কিরীটী
সৃষ্টোঽন্তকঃ সর্বহরো বিধাত্রা; ভবেদ্যথা তদ্বদপারণীয়ঃ
46.19
সংজয় উবাচ
যদেতত্কথিতং রাজংস্ত্বয়া দুর্যোধনং প্রতি
সর্বমেতদ্যথাত্থ ত্বং নৈতন্মিথ্যা মহীপতে
46.20
মন্যুনা হি সমাবিষ্টাঃ পাণ্ডবাস্তেঽমিতৌজসঃ
দৃষ্ট্বা কৃষ্ণাং সভাং নীতাং ধর্মপত্নীং যশস্বিনীম্
46.21
দুঃশাসনস্য তা বাচঃ শ্রুত্বা তে দারুণোদয়াঃ
কর্ণস্য চ মহারাজ ন স্বপ্স্যন্তীতি মে মতিঃ
46.22
শ্রুতং হি তে মহারাজ যথা পার্থেন সংয়ুগে
একাদশতনুঃ স্থাণুর্ধনুষা পরিতোষিতঃ
46.23
কৈরাতং বেষমাস্থায় যোধয়ামাস ফল্গুনম্
জিজ্ঞাসুঃ সর্বদেবেশঃ কপর্দী ভগবান্স্বয়ম্
46.24
তত্রৈনং লোকপালাস্তে দর্শয়ামাসুরর্জুনম্
অস্ত্রহেতোঃ পরাক্রান্তং তপসা কৌরবর্ষভম্
46.25
নৈতদুত্সহতেঽন্যো হি লব্ধুমন্যত্র ফল্গুনাৎ
সাক্ষাদ্দর্শনমেতেষামীশ্বরাণাং নরো ভুবি
46.26
মহেশ্বরেণ যো রাজন্ন জীর্ণো গ্রস্তমূর্তিমান্
কস্তমুত্সহতে বীরং যুদ্ধে জরয়িতুং পুমান্
46.27
আসাদিতমিদং ঘোরং তুমুলং লোমহর্ষণম্
দ্রৌপদীং পরিকর্ষদ্ভিঃ কোপয়দ্ভিশ্চ পাণ্ডবান্
46.28
যত্র বিস্ফুরমাণোষ্ঠো ভীমঃ প্রাহ বচো মহৎ
দৃষ্ট্বা দুর্যোধনেনোরূ দ্রৌপদ্যা দর্শিতাবুভৌ
46.29
ঊরূ ভেত্স্যামি তে পাপ গদয়া বজ্রকল্পয়া
ত্রয়োদশানাং বর্ষাণামন্তে দুর্দ্যূতদেবিনঃ
46.30
সর্বে প্রহরতাং শ্রেষ্ঠাঃ সর্বে চামিততেজসঃ
সর্বে সর্বাস্ত্রবিদ্বাংসো দেবৈরপি সুদুর্জয়াঃ
46.31
মন্যে মন্যুসমুদ্ধূতাঃ পুত্রাণাং তব সংয়ুগে
অন্তং পার্থাঃ করিষ্যন্তি বীর্যামর্ষসমন্বিতাঃ
46.32
ধৃতরাষ্ট্র উবাচ
কিং কৃতং সূত কর্ণেন বদতা পরুষং বচঃ
পর্যাপ্তং বৈরমেতাবদ্যত্কৃষ্ণা সা সভাং গতা
46.33
অপীদানীং মম সুতাস্তিষ্ঠেরন্মন্দচেতসঃ
যেষাং ভ্রাতা গুরুর্জ্যেষ্ঠো বিনয়ে নাবতিষ্ঠতে
46.34
মমাপি বচনং সূত ন শুশ্রূষতি মন্দভাক্
দৃষ্ট্বা মাং চক্ষুষা হীনং নির্বিচেষ্টমচেতনম্
46.35
যে চাস্য সচিবা মন্দাঃ কর্ণসৌবলকাদয়ঃ
তেঽপ্যস্য ভূয়সো দোষান্বর্ধয়ন্তি বিচেতসঃ
46.36
স্বৈরমুক্তা অপি শরাঃ পার্থেনামিততেজসা
নির্দহেয়ুর্মম সুতান্কিং পুনর্মন্যুনেরিতাঃ
46.37
পার্থবাহুবলোত্সৃষ্টা মহাচাপবিনিঃসৃতাঃ
দিব্যাস্ত্রমন্ত্রমুদিতাঃ সাদয়েয়ুঃ সুরানপি
46.38
যস্য মন্ত্রী চ গোপ্তা চ সুহৃচ্চৈব জনার্দনঃ
হরিস্ত্রৈলোক্যনাথঃ স কিং নু তস্য ন নির্জিতম্
46.39
ইদং চ সুমহচ্চিত্রমর্জুনস্যেহ সংজয়
মহাদেবেন বাহুভ্যাং যত্সমেত ইতি শ্রুতিঃ
46.40
প্রত্যক্ষং সর্বলোকস্য খাণ্ডবে যত্কৃতং পুরা
ফল্গুনেন সহায়ার্থে বহ্নের্দামোদরেণ চ
46.41
সর্বথা নাস্তি মে পুত্রঃ সামাত্যঃ সহবান্ধবঃ
ক্রুদ্ধে পার্থে চ ভীমে চ বাসুদেবে চ সাত্বতে