Utshovঅধ্যায় 45
45.1
বৈশংপায়ন উবাচ
ততো দেবাঃ সগন্ধর্বাঃ সমাদায়ার্ঘ্যমুত্তমম্
শক্রস্য মতমাজ্ঞায় পার্থমানর্চুরঞ্জসা
45.2
পাদ্যমাচমনীয়ং চ প্রতিগ্রাহ্য নৃপাত্মজম্
প্রবেশয়ামাসুরথো পুরংদরনিবেশনম্
45.3
এবং সংপূজিতো জিষ্ণুরুবাস ভবনে পিতুঃ
উপশিক্ষন্মহাস্ত্রাণি সসংহারাণি পাণ্ডবঃ
45.4
শক্রস্য হস্তাদ্দয়িতং বজ্রমস্ত্রং দুরুত্সহম্
অশনীশ্চ মহানাদা মেঘবর্হিণলক্ষণাঃ
45.5
গৃহীতাস্ত্রস্তু কৌন্তেয়ো ভ্রাতৄন্সস্মার পাণ্ডবঃ
পুরংদরনিয়োগাচ্চ পঞ্চাব্দমবসত্সুখী
45.6
ততঃ শক্রোঽব্রবীত্পার্থং কৃতাস্ত্রং কাল আগতে
নৃত্তং গীতং চ কৌন্তেয় চিত্রসেনাদবাপ্নুহি
45.7
বাদিত্রং দেববিহিতং নৃলোকে যন্ন বিদ্যতে
তদর্জয়স্ব কৌন্তেয় শ্রেয়ো বৈ তে ভবিষ্যতি
45.8
সখায়ং প্রদদৌ চাস্য চিত্রসেনং পুরংদরঃ
স তেন সহ সংগম্য রেমে পার্থো নিরাময়ঃ
45.9
কদাচিদটমানস্তু মহর্ষিরুত লোমশঃ
জগাম শক্রভবনং পুরংদরদিদৃক্ষয়া
45.10
স সমেত্য নমস্কৃত্য দেবরাজং মহামুনিঃ
দদর্শার্ধাসনগতং পাণ্ডবং বাসবস্য হ
45.11
ততঃ শক্রাভ্যনুজ্ঞাত আসনে বিষ্টরোত্তরে
নিষসাদ দ্বিজশ্রেষ্ঠঃ পূজ্যমানো মহর্ষিভিঃ
45.12
তস্য দৃষ্ট্বাভবদ্বুদ্ধিঃ পার্থমিন্দ্রাসনে স্থিতম্
কথং নু ক্ষত্রিয়ঃ পার্থঃ শক্রাসনমবাপ্তবান্
45.13
কিং ত্বস্য সুকৃতং কর্ম লোকা বা কে বিনির্জিতাঃ
য এবমুপসংপ্রাপ্তঃ স্থানং দেবনমস্কৃতম্
45.14
তস্য বিজ্ঞায় সংকল্পং শক্রো বৃত্রনিষূদনঃ
লোমশং প্রহসন্বাক্যমিদমাহ শচীপতিঃ
45.15
ব্রহ্মর্ষে শ্রূয়তাং যত্তে মনসৈতদ্বিবক্ষিতম্
নায়ং কেবলমর্ত্যো বৈ ক্ষত্রিয়ত্বমুপাগতঃ
45.16
মহর্ষে মম পুত্রোঽয়ং কুন্ত্যাং জাতো মহাভুজঃ
অস্ত্রহেতোরিহ প্রাপ্তঃ কস্মাচ্চিত্কারণান্তরাৎ
45.17
অহো নৈনং ভবান্বেত্তি পুরাণমৃষিসত্তমম্
শৃণু মে বদতো ব্রহ্মন্যোঽয়ং যচ্চাস্য কারণম্
45.18
নরনারায়ণৌ যৌ তৌ পুরাণাবৃষিসত্তমৌ
তাবিমাবভিজানীহি হৃষীকেশধনংজয়ৌ
45.19
যন্ন শক্যং সুরৈর্দ্রষ্টুমৃষিভির্বা মহাত্মভিঃ
তদাশ্রমপদং পুণ্যং বদরী নাম বিশ্রুতম্
45.20
স নিবাসোঽভবদ্বিপ্র বিষ্ণোর্জিষ্ণোস্তথৈব চ
যতঃ প্রববৃতে গঙ্গা সিদ্ধচারণসেবিতা
45.21
তৌ মন্নিয়োগাদ্ব্রহ্মর্ষে ক্ষিতৌ জাতৌ মহাদ্যুতী
ভূমের্ভারাবতরণং মহাবীর্যৌ করিষ্যতঃ
45.22
উদ্বৃত্তা হ্যসুরাঃ কেচিন্নিবাতকবচা ইতি
বিপ্রিয়েষু স্থিতাস্মাকং বরদানেন মোহিতাঃ
45.23
তর্কয়ন্তে সুরান্হন্তুং বলদর্পসমন্বিতাঃ
দেবান্ন গণয়ন্তে চ তথা দত্তবরা হি তে
45.24
পাতালবাসিনো রৌদ্রা দনোঃ পুত্রা মহাবলাঃ
সর্বে দেবনিকায়া হি নালং যোধয়িতুং স্ম তান্
45.25
যোঽসৌ ভূমিগতঃ শ্রীমান্বিষ্ণুর্মধুনিষূদনঃ
কপিলো নাম দেবোঽসৌ ভগবানজিতো হরিঃ
45.26
যেন পূর্বং মহাত্মানঃ খনমানা রসাতলম্
দর্শনাদেব নিহতাঃ সগরস্যাত্মজা বিভো
45.27
তেন কার্যং মহত্কার্যমস্মাকং দ্বিজসত্তম
পার্থেন চ মহায়ুদ্ধে সমেতাভ্যামসংশয়ম্
45.28
অয়ং তেষাং সমস্তানাং শক্তঃ প্রতিসমাসনে
তান্নিহত্য রণে শূরঃ পুনর্যাস্যতি মানুষান্
45.29
ভবাংশ্চাস্মন্নিয়োগেন যাতু তাবন্মহীতলম্
কাম্যকে দ্রক্ষ্যসে বীরং নিবসন্তং যুধিষ্ঠিরম্
45.30
স বাচ্যো মম সংদেশাদ্ধর্মাত্মা সত্যসংগরঃ
নোত্কণ্ঠা ফল্গুনে কার্যা কৃতাস্ত্রঃ শীঘ্রমেষ্যতি
45.31
নাশুদ্ধবাহুবীর্যেণ নাকৃতাস্ত্রেণ বা রণে
ভীষ্মদ্রোণাদয়ো যুদ্ধে শক্যাঃ প্রতিসমাসিতুম্
45.32
গৃহীতাস্ত্রো গুডাকেশো মহাবাহুর্মহামনাঃ
নৃত্তবাদিত্রগীতানাং দিব্যানাং পারমেয়িবান্
45.33
ভবানপি বিবিক্তানি তীর্থানি মনুজেশ্বর
ভ্রাতৃভিঃ সহিতঃ সর্বৈর্দ্রষ্টুমর্হত্যরিংদম
45.34
তীর্থেষ্বাপ্লুত্য পুণ্যেষু বিপাপ্মা বিগতজ্বরঃ
রাজ্যং ভোক্ষ্যসি রাজেন্দ্র সুখী বিগতকল্মষঃ
45.35
ভবাংশ্চৈনং দ্বিজশ্রেষ্ঠ পর্যটন্তং মহীতলে
ত্রাতুমর্হতি বিপ্রাগ্র্য তপোবলসমন্বিতঃ
45.36
গিরিদুর্গেষু হি সদা দেশেষু বিষমেষু চ
বসন্তি রাক্ষসা রৌদ্রাস্তেভ্যো রক্ষেত্সদা ভবান্
45.37
স তথেতি প্রতিজ্ঞায় লোমশঃ সুমহাতপাঃ
কাম্যকং বনমুদ্দিশ্য সমুপায়ান্মহীতলম্
45.38
দদর্শ তত্র কৌন্তেয়ং ধর্মরাজমরিংদমম্
তাপসৈর্ভ্রাতৃভিশ্চৈব সর্বতঃ পরিবারিতম্