Utshovঅধ্যায় 44
44.1
বৈশংপায়ন উবাচ
স দদর্শ পুরীং রম্যাং সিদ্ধচারণসেবিতাম্
সর্বর্তুকুসুমৈঃ পুণ্যৈঃ পাদপৈরুপশোভিতাম্
44.2
তত্র সৌগন্ধিকানাং স দ্রুমাণাং পুণ্যগন্ধিনাম্
উপবীজ্যমানো মিশ্রেণ বায়ুনা পুণ্যগন্ধিনা
44.3
নন্দনং চ বনং দিব্যমপ্সরোগণসেবিতম্
দদর্শ দিব্যকুসুমৈরাহ্বয়দ্ভিরিব দ্রুমৈঃ
44.4
নাতপ্ততপসা শক্যো দ্রষ্টুং নানাহিতাগ্নিনা
স লোকঃ পুণ্যকর্তৄণাং নাপি যুদ্ধপরাঙ্মুখৈঃ
44.5
নায়জ্বভির্নানৃতকৈর্ন বেদশ্রুতিবর্জিতৈঃ
নানাপ্লুতাঙ্গৈস্তীর্থেষু যজ্ঞদানবহিষ্কৃতৈঃ
44.6
নাপি যজ্ঞহনৈঃ ক্ষুদ্রৈর্দ্রষ্টুং শক্যঃ কথংচন
পানপৈর্গুরুতল্পৈশ্চ মাংসাদৈর্বা দুরাত্মভিঃ
44.7
স তদ্দিব্যং বনং পশ্যন্দিব্যগীতনিনাদিতম্
প্রবিবেশ মহাবাহুঃ শক্রস্য দয়িতাং পুরীম্
44.8
তত্র দেববিমানানি কামগানি সহস্রশঃ
সংস্থিতান্যভিয়াতানি দদর্শায়ুতশস্তদা
44.9
সংস্তূয়মানো গন্ধর্বৈরপ্সরোভিশ্চ পাণ্ডবঃ
পুষ্পগন্ধবহৈঃ পুণ্যৈর্বায়ুভিশ্চানুবীজিতঃ
44.10
ততো দেবাঃ সগন্ধর্বাঃ সিদ্ধাশ্চ পরমর্ষয়ঃ
হৃষ্টাঃ সংপূজয়ামাসুঃ পার্থমক্লিষ্টকারিণম্
44.11
আশীর্বাদৈঃ স্তূয়মানো দিব্যবাদিত্রনিস্বনৈঃ
প্রতিপেদে মহাবাহুঃ শঙ্খদুন্দুভিনাদিতম্
44.12
নক্ষত্রমার্গং বিপুলং সুরবীথীতি বিশ্রুতম্
ইন্দ্রাজ্ঞয়া যয়ৌ পার্থঃ স্তূয়মানঃ সমন্ততঃ
44.13
তত্র সাধ্যাস্তথা বিশ্বে মরুতোঽথাশ্বিনাবপি
আদিত্যা বসবো রুদ্রাস্তথা ব্রহ্মর্ষয়োঽমলাঃ
44.14
রাজর্ষয়শ্চ বহবো দিলীপপ্রমুখা নৃপাঃ
তুম্বুরুর্নারদশ্চৈব গন্ধর্বৌ চ হহাহুহূ
44.15
তান্সর্বান্স সমাগম্য বিধিবত্কুরুনন্দনঃ
ততোঽপশ্যদ্দেবরাজং শতক্রতুমরিংদমম্
44.16
ততঃ পার্থো মহাবাহুরবতীর্য রথোত্তমাৎ
দদর্শ সাক্ষাদ্দেবেন্দ্রং পিতরং পাকশাসনম্
44.17
পাণ্ডুরেণাতপত্রেণ হেমদণ্ডেন চারুণা
দিব্যগন্ধাধিবাসেন ব্যজনেন বিধূয়তা
44.18
বিশ্বাবসুপ্রভৃতিভির্গন্ধর্বৈঃ স্তুতিবন্দনৈঃ
স্তূয়মানং দ্বিজাগ্র্যৈশ্চ ঋগ্যজুঃসামসংস্তবৈঃ
44.19
ততোঽভিগম্য কৌন্তেয়ঃ শিরসাভ্যনমদ্বলী
স চৈনমনুবৃত্তাভ্যাং ভুজাভ্যাং প্রত্যগৃহ্ণত
44.20
ততঃ শক্রাসনে পুণ্যে দেবরাজর্ষিপূজিতে
শক্রঃ পাণৌ গৃহীত্বৈনমুপাবেশয়দন্তিকে
44.21
মূর্ধ্নি চৈনমুপাঘ্রায় দেবেন্দ্রঃ পরবীরহা
অঙ্কমারোপয়ামাস প্রশ্রয়াবনতং তদা
44.22
সহস্রাক্ষনিয়োগাত্স পার্থঃ শক্রাসনং তদা
অধ্যক্রামদমেয়াত্মা দ্বিতীয় ইব বাসবঃ
44.23
ততঃ প্রেম্ণা বৃত্রশত্রুরর্জুনস্য শুভং মুখম্
পস্পর্শ পুণ্যগন্ধেন করেণ পরিসান্ত্বয়ন্
44.24
পরিমার্জমানঃ শনকৈর্বাহূ চাস্যায়তৌ শুভৌ
জ্যাশরক্ষেপকঠিনৌ স্তম্ভাবিব হিরণ্ময়ৌ
44.25
বজ্রগ্রহণচিহ্নেন করেণ বলসূদনঃ
মুহুর্মুহুর্বজ্রধরো বাহূ সংস্ফালয়ঞ্শনৈঃ
44.26
স্ময়ন্নিব গুডাকেশং প্রেক্ষমাণঃ সহস্রদৃক্
হর্ষেণোত্ফুল্লনয়নো ন চাতৃপ্যত বৃত্রহা
44.27
একাসনোপবিষ্টৌ তৌ শোভয়াং চক্রতুঃ সভাম্
সূর্যাচন্দ্রমসৌ ব্যোম্নি চতুর্দশ্যামিবোদিতৌ
44.28
তত্র স্ম গাথা গায়ন্তি সাম্না পরমবল্গুনা
গন্ধর্বাস্তুম্বুরুশ্রেষ্ঠাঃ কুশলা গীতসামসু
44.29
ঘৃতাচী মেনকা রম্ভা পূর্বচিত্তিঃ স্বয়ংপ্রভা
উর্বশী মিশ্রকেশী চ ডুণ্ডুর্গৌরী বরূথিনী
44.30
গোপালী সহজন্যা চ কুম্ভয়োনিঃ প্রজাগরা
চিত্রসেনা চিত্রলেখা সহা চ মধুরস্বরা
44.31
এতাশ্চান্যাশ্চ ননৃতুস্তত্র তত্র বরাঙ্গনাঃ
চিত্তপ্রমথনে যুক্তাঃ সিদ্ধানাং পদ্মলোচনাঃ
44.32
মহাকটিতটশ্রোণ্যঃ কম্পমানৈঃ পয়োধরৈঃ
কটাক্ষহাবমাধুর্যৈশ্চেতোবুদ্ধিমনোহরাঃ