Utshovঅধ্যায় 43
43.1
বৈশংপায়ন উবাচ
গতেষু লোকপালেষু পার্থঃ শত্রুনিবর্হণঃ
চিন্তয়ামাস রাজেন্দ্র দেবরাজরথাগমম্
43.2
ততশ্চিন্তয়মানস্য গুডাকেশস্য ধীমতঃ
রথো মাতলিসংয়ুক্ত আজগাম মহাপ্রভঃ
43.3
নভো বিতিমিরং কুর্বঞ্জলদান্পাটয়ন্নিব
দিশঃ সংপূরয়ন্নাদৈর্মহামেঘরবোপমৈঃ
43.4
অসয়ঃ শক্তয়ো ভীমা গদাশ্চোগ্রপ্রদর্শনাঃ
দিব্যপ্রভাবাঃ প্রাসাশ্চ বিদ্যুতশ্চ মহাপ্রভাঃ
43.5
তথৈবাশনয়স্তত্র চক্রয়ুক্তা হুডাগুডাঃ
বায়ুস্ফোটাঃ সনির্ঘাতা বর্হিমেঘনিভস্বনাঃ
43.6
তত্র নাগা মহাকায়া জ্বলিতাস্যাঃ সুদারুণাঃ
সিতাভ্রকূটপ্রতিমাঃ সংহতাশ্চ যথোপলাঃ
43.7
দশ বাজিসহস্রাণি হরীণাং বাতরংহসাম্
বহন্তি যং নেত্রমুষং দিব্যং মায়াময়ং রথম্
43.8
তত্রাপশ্যন্মহানীলং বৈজয়ন্তং মহাপ্রভম্
ধ্বজমিন্দীবরশ্যামং বংশং কনকভূষণম্
43.9
তস্মিন্রথে স্থিতং সূতং তপ্তহেমবিভূষিতম্
দৃষ্ট্বা পার্থো মহাবাহুর্দেবমেবান্বতর্কয়ৎ
43.10
তথা তর্কয়তস্তস্য ফল্গুনস্যাথ মাতলিঃ
সংনতঃ প্রশ্রিতো ভূত্বা বাক্যমর্জুনমব্রবীৎ
43.11
ভো ভো শক্রাত্মজ শ্রীমাঞ্শক্রস্ত্বাং দ্রষ্টুমিচ্ছতি
আরোহতু ভবাঞ্শীঘ্রং রথমিন্দ্রস্য সংমতম্
43.12
আহ মামমরশ্রেষ্ঠঃ পিতা তব শতক্রতুঃ
কুন্তীসুতমিহ প্রাপ্তং পশ্যন্তু ত্রিদশালয়াঃ
43.13
এষ শক্রঃ পরিবৃতো দেবৈরৃষিগণৈস্তথা
গন্ধর্বৈরপ্সরোভিশ্চ ত্বাং দিদৃক্ষুঃ প্রতীক্ষতে
43.14
অস্মাল্লোকাদ্দেবলোকং পাকশাসনশাসনাৎ
আরোহ ত্বং ময়া সার্ধং লব্ধাস্ত্রঃ পুনরেষ্যসি
43.15
অর্জুন উবাচ
মাতলে গচ্ছ শীঘ্রং ত্বমারোহস্ব রথোত্তমম্
রাজসূয়াশ্বমেধানাং শতৈরপি সুদুর্লভম্
43.16
পার্থিবৈঃ সুমহাভাগৈর্যজ্বভির্ভূরিদক্ষিণৈঃ
দৈবতৈর্বা সমারোঢুং দানবৈর্বা রথোত্তমম্
43.17
নাতপ্ততপসা শক্য এষ দিব্যো মহারথঃ
দ্রষ্টুং বাপ্যথ বা স্প্রষ্টুমারোঢুং কুত এব তু
43.18
ত্বয়ি প্রতিষ্ঠিতে সাধো রথস্থে স্থিরবাজিনি
পশ্চাদহমথারোক্ষ্যে সুকৃতী সত্পথং যথা
43.19
বৈশংপায়ন উবাচ
তস্য তদ্বচনং শ্রুত্বা মাতলিঃ শক্রসারথিঃ
আরুরোহ রথং শীঘ্রং হয়ান্যেমে চ রশ্মিভিঃ
43.20
ততোঽর্জুনো হৃষ্টমনা গঙ্গায়ামাপ্লুতঃ শুচিঃ
জজাপ জপ্যং কৌন্তেয়ো বিধিবত্কুরুনন্দনঃ
43.21
ততঃ পিতৄন্যথান্যায়ং তর্পয়িত্বা যথাবিধি
মন্দরং শৈলরাজং তমাপ্রষ্টুমুপচক্রমে
43.22
সাধূনাং ধর্মশীলানাং মুনীনাং পুণ্যকর্মণাম্
ত্বং সদা সংশ্রয়ঃ শৈল স্বর্গমার্গাভিকাঙ্ক্ষিণাম্
43.23
ত্বত্প্রসাদাত্সদা শৈল ব্রাহ্মণাঃ ক্ষত্রিয়া বিশঃ
স্বর্গং প্রাপ্তাশ্চরন্তি স্ম দেবৈঃ সহ গতব্যথাঃ
43.24
অদ্রিরাজ মহাশৈল মুনিসংশ্রয় তীর্থবন্
গচ্ছাম্যামন্ত্রয়ামি ত্বাং সুখমস্ম্যুষিতস্ত্বয়ি
43.25
তব সানূনি কুঞ্জাশ্চ নদ্যঃ প্রস্রবণানি চ
তীর্থানি চ সুপুণ্যানি ময়া দৃষ্টান্যনেকশঃ
43.26
এবমুক্ত্বার্জুনঃ শৈলমামন্ত্র্য পরবীরহা
আরুরোহ রথং দিব্যং দ্যোতয়ন্নিব ভাস্করঃ
43.27
স তেনাদিত্যরূপেণ দিব্যেনাদ্ভুতকর্মণা
ঊর্ধ্বমাচক্রমে ধীমান্প্রহৃষ্টঃ কুরুনন্দনঃ
43.28
সোঽদর্শনপথং যাত্বা মর্ত্যানাং ভূমিচারিণাম্
দদর্শাদ্ভুতরূপাণি বিমানানি সহস্রশঃ
43.29
ন তত্র সূর্যঃ সোমো বা দ্যোততে ন চ পাবকঃ
স্বয়ৈব প্রভয়া তত্র দ্যোতন্তে পুণ্যলব্ধয়া
43.30
তারারূপাণি যানীহ দৃশ্যন্তে দ্যুতিমন্তি বৈ
দীপবদ্বিপ্রকৃষ্টত্বাদণূনি সুমহান্ত্যপি
43.31
তানি তত্র প্রভাস্বন্তি রূপবন্তি চ পাণ্ডবঃ
দদর্শ স্বেষু ধিষ্ণ্যেষু দীপ্তিমন্তি স্বয়ার্চিষা
43.32
তত্র রাজর্ষয়ঃ সিদ্ধা বীরাশ্চ নিহতা যুধি
তপসা চ জিতস্বর্গাঃ সংপেতুঃ শতসংঘশঃ
43.33
গন্ধর্বাণাং সহস্রাণি সূর্যজ্বলনতেজসাম্
গুহ্যকানামৃষীণাং চ তথৈবাপ্সরসাং গণাঃ
43.34
লোকানাত্মপ্রভান্পশ্যন্ফল্গুনো বিস্ময়ান্বিতঃ
পপ্রচ্ছ মাতলিং প্রীত্যা স চাপ্যেনমুবাচ হ
43.35
এতে সুকৃতিনঃ পার্থ স্বেষু ধিষ্ণ্যেষ্ববস্থিতাঃ
যান্দৃষ্টবানসি বিভো তারারূপাণি ভূতলে
43.36
ততোঽপশ্যত্স্থিতং দ্বারি সিতং বৈজয়িনং গজম্
ঐরাবতং চতুর্দন্তং কৈলাসমিব শৃঙ্গিণম্
43.37
স সিদ্ধমার্গমাক্রম্য কুরুপাণ্ডবসত্তমঃ
ব্যরোচত যথা পূর্বং মান্ধাতা পার্থিবোত্তমঃ
43.38
অতিচক্রাম লোকান্স রাজ্ঞাং রাজীবলোচনঃ
ততো দদর্শ শক্রস্য পুরীং তামমরাবতীম্