Utshovঅধ্যায় 42
42.1
বৈশংপায়ন উবাচ
তস্য সংপশ্যতস্ত্বেব পিনাকী বৃষভধ্বজঃ
জগামাদর্শনং ভানুর্লোকস্যেবাস্তমেয়িবান্
42.2
ততোঽর্জুনঃ পরং চক্রে বিস্ময়ং পরবীরহা
ময়া সাক্ষান্মহাদেবো দৃষ্ট ইত্যেব ভারত
42.3
ধন্যোঽস্ম্যনুগৃহীতোঽস্মি যন্ময়া ত্র্যম্বকো হরঃ
পিনাকী বরদো রূপী দৃষ্টঃ স্পৃষ্টশ্চ পাণিনা
42.4
কৃতার্থং চাবগচ্ছামি পরমাত্মানমাত্মনা
শত্রূংশ্চ বিজিতান্সর্বান্নির্বৃত্তং চ প্রয়োজনম্
42.5
ততো বৈডূর্যবর্ণাভো ভাসয়ন্সর্বতো দিশঃ
যাদোগণবৃতঃ শ্রীমানাজগাম জলেশ্বরঃ
42.6
নাগৈর্নদৈর্নদীভিশ্চ দৈত্যৈঃ সাধ্যৈশ্চ দৈবতৈঃ
বরুণো যাদসাং ভর্তা বশী তং দেশমাগমৎ
42.7
অথ জাম্বূনদবপুর্বিমানেন মহার্চিষা
কুবেরঃ সমনুপ্রাপ্তো যক্ষৈরনুগতঃ প্রভুঃ
42.8
বিদ্যোতয়ন্নিবাকাশমদ্ভুতোপমদর্শনঃ
ধনানামীশ্বরঃ শ্রীমানর্জুনং দ্রষ্টুমাগতঃ
42.9
তথা লোকান্তকৃচ্ছ্রীমান্যমঃ সাক্ষাত্প্রতাপবান্
মূর্ত্যমূর্তিধরৈঃ সার্ধং পিতৃভির্লোকভাবনৈঃ
42.10
দণ্ডপাণিরচিন্ত্যাত্মা সর্বভূতবিনাশকৃৎ
বৈবস্বতো ধর্মরাজো বিমানেনাবভাসয়ন্
42.11
ত্রীঁল্লোকান্গুহ্যকাংশ্চৈব গন্ধর্বাংশ্চ সপন্নগান্
দ্বিতীয় ইব মার্তণ্ডো যুগান্তে সমুপস্থিতে
42.12
ভানুমন্তি বিচিত্রাণি শিখরাণি মহাগিরেঃ
সমাস্থায়ার্জুনং তত্র দদৃশুস্তপসান্বিতম্
42.13
ততো মুহূর্তাদ্ভগবানৈরাবতশিরোগতঃ
আজগাম সহেন্দ্রাণ্যা শক্রঃ সুরগণৈর্বৃতঃ
42.14
পাণ্ডুরেণাতপত্রেণ ধ্রিয়মাণেন মূর্ধনি
শুশুভে তারকারাজঃ সিতমভ্রমিবাস্থিতঃ
42.15
সংস্তূয়মানো গন্ধর্বৈরৃষিভিশ্চ তপোধনৈঃ
শৃঙ্গং গিরেঃ সমাসাদ্য তস্থৌ সূর্য ইবোদিতঃ
42.16
অথ মেঘস্বনো ধীমান্ব্যাজহার শুভাং গিরম্
যমঃ পরমধর্মজ্ঞো দক্ষিণাং দিশমাস্থিতঃ
42.17
অর্জুনার্জুন পশ্যাস্মাঁল্লোকপালান্সমাগতান্
দৃষ্টিং তে বিতরামোঽদ্য ভবানর্হো হি দর্শনম্
42.18
পূর্বর্ষিরমিতাত্মা ত্বং নরো নাম মহাবলঃ
নিয়োগাদ্ব্রহ্মণস্তাত মর্ত্যতাং সমুপাগতঃ
ত্বং বাসবসমুদ্ভূতো মহাবীর্যপরাক্রমঃ
42.19
ক্ষত্রং চাগ্নিসমস্পর্শং ভারদ্বাজেন রক্ষিতম্
দানবাশ্চ মহাবীর্যা যে মনুষ্যত্বমাগতাঃ
নিবাতকবচাশ্চৈব সংসাধ্যাঃ কুরুনন্দন
42.20
পিতুর্মমাংশো দেবস্য সর্বলোকপ্রতাপিনঃ
কর্ণঃ স সুমহাবীর্যস্ত্বয়া বধ্যো ধনংজয়
42.21
অংশাশ্চ ক্ষিতিসংপ্রাপ্তা দেবগন্ধর্বরক্ষসাম্
তয়া নিপাতিতা যুদ্ধে স্বকর্মফলনির্জিতাম্
গতিং প্রাপ্স্যন্তি কৌন্তেয় যথাস্বমরিকর্শন
42.22
অক্ষয়া তব কীর্তিশ্চ লোকে স্থাস্যতি ফল্গুন
ত্বয়া সাক্ষান্মহাদেবস্তোষিতো হি মহামৃধে
লঘ্বী বসুমতী চাপি কর্তব্যা বিষ্ণুনা সহ
42.23
গৃহাণাস্ত্রং মহাবাহো দণ্ডমপ্রতিবারণম্
অনেনাস্ত্রেণ সুমহত্ত্বং হি কর্ম করিষ্যসি
42.24
প্রতিজগ্রাহ তত্পার্থো বিধিবত্কুরুনন্দনঃ
সমন্ত্রং সোপচারং চ সমোক্ষং সনিবর্তনম্
42.25
ততো জলধরশ্যামো বরুণো যাদসাং পতিঃ
পশ্চিমাং দিশমাস্থায় গিরমুচ্চারয়ন্প্রভুঃ
42.26
পার্থ ক্ষত্রিয়মুখ্যস্ত্বং ক্ষত্রধর্মে ব্যবস্থিতঃ
পশ্য মাং পৃথুতাম্রাক্ষ বরুণোঽস্মি জলেশ্বরঃ
42.27
ময়া সমুদ্যতান্পাশান্বারুণাননিবারণান্
প্রতিগৃহ্ণীষ্ব কৌন্তেয় সরহস্যনিবর্তনান্
42.28
এভিস্তদা ময়া বীর সংগ্রামে তারকাময়ে
দৈতেয়ানাং সহস্রাণি সংয়তানি মহাত্মনাম্
42.29
তস্মাদিমান্মহাসত্ত্ব মত্প্রসাদাত্সমুত্থিতান্
গৃহাণ ন হি তে মুচ্যেদন্তকোঽপ্যাততায়িনঃ
42.30
অনেন ত্বং যদাস্ত্রেণ সংগ্রামে বিচরিষ্যসি
তদা নিঃক্ষত্রিয়া ভূমির্ভবিষ্যতি ন সংশয়ঃ
42.31
ততঃ কৈলাসনিলয়ো ধনাধ্যক্ষোঽভ্যভাষত
দত্তেষ্বস্ত্রেষু দিব্যেষু বরুণেন যমেন চ
42.32
সব্যসাচিন্মহাবাহো পূর্বদেব সনাতন
সহাস্মাভির্ভবাঞ্শ্রান্তঃ পুরাকল্পেষু নিত্যশঃ
42.33
মত্তোঽপি ত্বং গৃহাণাস্ত্রমন্তর্ধানং প্রিয়ং মম
ওজস্তেজোদ্যুতিহরং প্রস্বাপনমরাতিহন্
42.34
ততোঽর্জুনো মহাবাহুর্বিধিবত্কুরুনন্দনঃ
কৌবেরমপি জগ্রাহ দিব্যমস্ত্রং মহাবলঃ
42.35
ততোঽব্রবীদ্দেবরাজঃ পার্থমক্লিষ্টকারিণম্
সান্ত্বয়ঞ্শ্লক্ষ্ণয়া বাচা মেঘদুন্দুভিনিস্বনঃ
42.36
কুন্তীমাতর্মহাবাহো ত্বমীশানঃ পুরাতনঃ
পরাং সিদ্ধিমনুপ্রাপ্তঃ সাক্ষাদ্দেবগতিং গতঃ
42.37
দেবকার্যং হি সুমহত্ত্বয়া কার্যমরিংদম
আরোঢব্যস্ত্বয়া স্বর্গঃ সজ্জীভব মহাদ্যুতে
42.38
রথো মাতলিসংয়ুক্ত আগন্তা ত্বত্কৃতে মহীম্
তত্র তেঽহং প্রদাস্যামি দিব্যান্যস্ত্রাণি কৌরব
42.39
তান্দৃষ্ট্বা লোকপালাংস্তু সমেতান্গিরিমূর্ধনি
জগাম বিস্ময়ং ধীমান্কুন্তীপুত্রো ধনংজয়ঃ
42.40
ততোঽর্জুনো মহাতেজা লোকপালান্সমাগতান্
পূজয়ামাস বিধিবদ্বাগ্ভিরদ্ভিঃ ফলৈরপি
42.41
ততঃ প্রতিয়য়ুর্দেবাঃ প্রতিপূজ্য ধনংজয়ম্
যথাগতেন বিবুধাঃ সর্বে কামমনোজবাঃ
42.42
ততোঽর্জুনো মুদং লেভে লব্ধাস্ত্রঃ পুরুষর্ষভঃ
কৃতার্থমিব চাত্মানং স মেনে পূর্ণমানসঃ