অধ্যায় 41

41.1

ভগবানুবাচ
নরস্ত্বং পূর্বদেহে বৈ নারায়ণসহায়বান্
বদর্যাং তপ্তবানুগ্রং তপো বর্ষায়ুতান্বহূন্

41.2

ত্বয়ি বা পরমং তেজো বিষ্ণৌ বা পুরুষোত্তমে
যুবাভ্যাং পুরুষাগ্র্যাভ্যাং তেজসা ধার্যতে জগৎ

41.3

শক্রাভিষেকে সুমহদ্ধনুর্জলদনিস্বনম্
প্রগৃহ্য দানবাঃ শস্তাস্ত্বয়া কৃষ্ণেন চ প্রভো

41.4

এতত্তদেব গাণ্ডীবং তব পার্থ করোচিতম্
মায়ামাস্থায় যদ্গ্রস্তং ময়া পুরুষসত্তম
তূণৌ চাপ্যক্ষয়ৌ ভূয়স্তব পার্থ যথোচিতৌ

41.5

প্রীতিমানস্মি বৈ পার্থ তব সত্যপরাক্রম
গৃহাণ বরমস্মত্তঃ কাঙ্ক্ষিতং যন্নরর্ষভ

41.6

ন ত্বয়া সদৃশঃ কশ্চিত্পুমান্মর্ত্যেষু মানদ
দিবি বা বিদ্যতে ক্ষত্রং ত্বত্প্রধানমরিংদম

41.7

অর্জুন উবাচ
ভগবন্দদাসি চেন্মহ্যং কামং প্রীত্যা বৃষধ্বজ
কাময়ে দিব্যমস্ত্রং তদ্ঘোরং পাশুপতং প্রভো

41.8

যত্তদ্ব্রহ্মশিরো নাম রৌদ্রং ভীমপরাক্রমম্
যুগান্তে দারুণে প্রাপ্তে কৃত্স্নং সংহরতে জগৎ

41.9

দহেয়ং যেন সংগ্রামে দানবান্রাক্ষসাংস্তথা
ভূতানি চ পিশাচাংশ্চ গন্ধর্বানথ পন্নগান্

41.10

যতঃ শূলসহস্রাণি গদাশ্চোগ্রপ্রদর্শনাঃ
শরাশ্চাশীবিষাকারাঃ সংভবন্ত্যনুমন্ত্রিতাঃ

41.11

যুধ্যেয়ং যেন ভীষ্মেণ দ্রোণেন চ কৃপেণ চ
সূতপুত্রেণ চ রণে নিত্যং কটুকভাষিণা

41.12

এষ মে প্রথমঃ কামো ভগবন্ভগনেত্রহন্
ত্বত্প্রসাদাদ্বিনির্বৃত্তঃ সমর্থঃ স্যামহং যথা

41.13

ভগবানুবাচ
দদানি তেঽস্ত্রং দয়িতমহং পাশুপতং মহৎ
সমর্থো ধারণে মোক্ষে সংহারে চাপি পাণ্ডব

41.14

নৈতদ্বেদ মহেন্দ্রোঽপি ন যমো ন চ যক্ষরাট্
বরুণো বাথ বা বায়ুঃ কুতো বেত্স্যন্তি মানবাঃ

41.15

ন ত্বেতত্সহসা পার্থ মোক্তব্যং পুরুষে ক্বচিৎ
জগদ্বিনির্দহেত্সর্বমল্পতেজসি পাতিতম্

41.16

অবধ্যো নাম নাস্ত্যস্য ত্রৈলোক্যে সচরাচরে
মনসা চক্ষুষা বাচা ধনুষা চ নিপাত্যতে

41.17

বৈশংপায়ন উবাচ
তচ্ছ্রুত্বা ত্বরিতঃ পার্থঃ শুচির্ভূত্বা সমাহিতঃ
উপসংগৃহ্য বিশ্বেশমধীষ্বেতি চ সোঽব্রবীৎ

41.18

ততস্ত্বধ্যাপয়ামাস সরহস্য নিবর্তনম্
তদস্ত্রং পাণ্ডবশ্রেষ্ঠং মূর্তিমন্তমিবান্তকম্

41.19

উপতস্থে মহাত্মানং যথা ত্র্যক্ষমুমাপতিম্
প্রতিজগ্রাহ তচ্চাপি প্রীতিমানর্জুনস্তদা

41.20

ততশ্চচাল পৃথিবী সপর্বতবনদ্রুমা
সসাগরবনোদ্দেশা সগ্রামনগরাকরা

41.21

শঙ্খদুন্দুভিঘোষাশ্চ ভেরীণাং চ সহস্রশঃ
তস্মিন্মুহূর্তে সংপ্রাপ্তে নির্ঘাতশ্চ মহানভূৎ

41.22

অথাস্ত্রং জাজ্বলদ্ঘোরং পাণ্ডবস্যামিতৌজসঃ
মূর্তিমদ্বিষ্ঠিতং পার্শ্বে দদৃশুর্দেবদানবাঃ

41.23

স্পৃষ্টস্য চ ত্র্যম্বকেন ফল্গুনস্যামিতৌজসঃ
যত্কিংচিদশুভং দেহে তত্সর্বং নাশমেয়িবৎ

41.24

স্বর্গং গচ্ছেত্যনুজ্ঞাতস্ত্র্যম্বকেন তদার্জুনঃ
প্রণম্য শিরসা পার্থঃ প্রাঞ্জলির্দেবমৈক্ষত

41.25

ততঃ প্রভুস্ত্রিদিবনিবাসিনাং বশী; মহামতির্গিরিশ উমাপতিঃ শিবঃ
ধনুর্মহদ্দিতিজপিশাচসূদনং; দদৌ ভবঃ পুরুষবরায় গাণ্ডিবম্

41.26

ততঃ শুভং গিরিবরমীশ্বরস্তদা; সহোময়া সিততটসানুকন্দরম্
বিহায় তং পতগমহর্ষিসেবিতং; জগাম খং পুরুষবরস্য পশ্যতঃ

Contains text from DharmicData, made available under the Open Database License (ODbL). Simple meanings are written by AI and can contain mistakes.