Utshovঅধ্যায় 40
40.1
বৈশংপায়ন উবাচ
গতেষু তেষু সর্বেষু তপস্বিষু মহাত্মসু
পিনাকপাণির্ভগবান্সর্বপাপহরো হরঃ
40.2
কৈরাতং বেষমাস্থায় কাঞ্চনদ্রুমসংনিভম্
বিভ্রাজমানো বপুষা গিরির্মেরুরিবাপরঃ
40.3
শ্রীমদ্ধনুরুপাদায় শরাংশ্চাশীবিষোপমান্
নিষ্পপাত মহার্চিষ্মান্দহন্কক্ষমিবানলঃ
40.4
দেব্যা সহোময়া শ্রীমান্সমানব্রতবেষয়া
নানাবেষধরৈর্হৃষ্টৈর্ভূতৈরনুগতস্তদা
40.5
কিরাতবেষপ্রচ্ছন্নঃ স্ত্রীভিশ্চানু সহস্রশঃ
অশোভত তদা রাজন্স দেবোঽতীব ভারত
40.6
ক্ষণেন তদ্বনং সর্বং নিঃশব্দমভবত্তদা
নাদঃ প্রস্রবণানাং চ পক্ষিণাং চাপ্যুপারমৎ
40.7
স সংনিকর্ষমাগম্য পার্থস্যাক্লিষ্টকর্মণঃ
মূকং নাম দিতেঃ পুত্রং দদর্শাদ্ভুতদর্শনম্
40.8
বারাহং রূপমাস্থায় তর্কয়ন্তমিবার্জুনম্
হন্তুং পরমদুষ্টাত্মা তমুবাচাথ ফল্গুনঃ
40.9
গাণ্ডীবং ধনুরাদায় শরাংশ্চাশীবিষোপমান্
সজ্যং ধনুর্বরং কৃত্বা জ্যাঘোষেণ নিনাদয়ন্
40.10
যন্মাং প্রার্থয়সে হন্তুমনাগসমিহাগতম্
তস্মাত্ত্বাং পূর্বমেবাহং নেষ্যামি যমসাদনম্
40.11
তং দৃষ্ট্বা প্রহরিষ্যন্তং ফল্গুনং দৃঢধন্বিনম্
কিরাতরূপী সহসা বারয়ামাস শংকরঃ
40.12
ময়ৈষ প্রার্থিতঃ পূর্বং নীলমেঘসমপ্রভঃ
অনাদৃত্যৈব তদ্বাক্যং প্রজহারাথ ফল্গুনঃ
40.13
কিরাতশ্চ সমং তস্মিন্নেকলক্ষ্যে মহাদ্যুতিঃ
প্রমুমোচাশনিপ্রখ্যং শরমগ্নিশিখোপমম্
40.14
তৌ মুক্তৌ সায়কৌ তাভ্যাং সমং তত্র নিপেততুঃ
মূকস্য গাত্রে বিস্তীর্ণে শৈলসংহননে তদা
40.15
যথাশনিবিনিষ্পেষো বজ্রস্যেব চ পর্বতে
তথা তয়োঃ সংনিপাতঃ শরয়োরভবত্তদা
40.16
স বিদ্ধো বহুভির্বাণৈর্দীপ্তাস্যৈঃ পন্নগৈরিব
মমার রাক্ষসং রূপং ভূয়ঃ কৃত্বা বিভীষণম্
40.17
দদর্শাথ ততো জিষ্ণুঃ পুরুষং কাঞ্চনপ্রভম্
কিরাতবেষপ্রচ্ছন্নং স্ত্রীসহায়মমিত্রহা
তমব্রবীত্প্রীতমনাঃ কৌন্তেয়ঃ প্রহসন্নিব
40.18
কো ভবানটতে শূন্যে বনে স্ত্রীগণসংবৃতঃ
ন ত্বমস্মিন্বনে ঘোরে বিভেষি কনকপ্রভ
40.19
কিমর্থং চ ত্বয়া বিদ্ধো মৃগোঽয়ং মত্পরিগ্রহঃ
ময়াভিপন্নঃ পূর্বং হি রাক্ষসোঽয়মিহাগতঃ
40.20
কামাত্পরিভবাদ্বাপি ন মে জীবন্বিমোক্ষ্যসে
ন হ্যেষ মৃগয়াধর্মো যস্ত্বয়াদ্য কৃতো ময়ি
তেন ত্বাং ভ্রংশয়িষ্যামি জীবিতাত্পর্বতাশ্রয়
40.21
ইত্যুক্তঃ পাণ্ডবেয়েন কিরাতঃ প্রহসন্নিব
উবাচ শ্লক্ষ্ণয়া বাচা পাণ্ডবং সব্যসাচিনম্
40.22
মমৈবায়ং লক্ষ্যভূতঃ পূর্বমেব পরিগ্রহঃ
মমৈব চ প্রহারেণ জীবিতাদ্ব্যবরোপিতঃ
40.23
দোষান্স্বান্নার্হসেঽন্যস্মৈ বক্তুং স্ববলদর্পিতঃ
অভিষক্তোঽস্মি মন্দাত্মন্ন মে জীবন্বিমোক্ষ্যসে
40.24
স্থিরো ভবস্ব মোক্ষ্যামি সায়কানশনীনিব
ঘটস্ব পরয়া শক্ত্যা মুঞ্চ ত্বমপি সায়কান্
40.25
ততস্তৌ তত্র সংরব্ধৌ গর্জমানৌ মুহুর্মুহুঃ
শরৈরাশীবিষাকারৈস্ততক্ষাতে পরস্পরম্
40.26
ততোঽর্জুনঃ শরবর্ষং কিরাতে সমবাসৃজৎ
তত্প্রসন্নেন মনসা প্রতিজগ্রাহ শংকরঃ
40.27
মুহূর্তং শরবর্ষং তত্প্রতিগৃহ্য পিনাকধৃক্
অক্ষতেন শরীরেণ তস্থৌ গিরিরিবাচলঃ
40.28
স দৃষ্ট্বা বাণবর্ষং তন্মোঘীভূতং ধনংজয়ঃ
পরমং বিস্ময়ং চক্রে সাধু সাধ্বিতি চাব্রবীৎ
40.29
অহোঽয়ং সুকুমারাঙ্গো হিমবচ্ছিখরালয়ঃ
গাণ্ডীবমুক্তান্নারাচান্প্রতিগৃহ্ণাত্যবিহ্বলঃ
40.30
কোঽয়ং দেবো ভবেত্সাক্ষাদ্রুদ্রো যক্ষঃ সুরেশ্বরঃ
বিদ্যতে হি গিরিশ্রেষ্ঠে ত্রিদশানাং সমাগমঃ
40.31
ন হি মদ্বাণজালানামুত্সৃষ্টানাং সহস্রশঃ
শক্তোঽন্যঃ সহিতুং বেগমৃতে দেবং পিনাকিনম্
40.32
দেবো বা যদি বা যক্ষো রুদ্রাদন্যো ব্যবস্থিতঃ
অহমেনং শরৈস্তীক্ষ্ণৈর্নয়ামি যমসাদনম্
40.33
ততো হৃষ্টমনা জিষ্ণুর্নারাচান্মর্মভেদিনঃ
ব্যসৃজচ্ছতধা রাজন্ময়ূখানিব ভাস্করঃ
40.34
তান্প্রসন্নেন মনসা ভগবাঁল্লোকভাবনঃ
শূলপাণিঃ প্রত্যগৃহ্ণাচ্ছিলাবর্ষমিবাচলঃ
40.35
ক্ষণেন ক্ষীণবাণোঽথ সংবৃত্তঃ ফল্গুনস্তদা
বিত্রাসং চ জগামাথ তং দৃষ্ট্বা শরসংক্ষয়ম্
40.36
চিন্তয়ামাস জিষ্ণুস্তু ভগবন্তং হুতাশনম্
পুরস্তাদক্ষয়ৌ দত্তৌ তূণৌ যেনাস্য খাণ্ডবে
40.37
কিং নু মোক্ষ্যামি ধনুষা যন্মে বাণাঃ ক্ষয়ং গতাঃ
অয়ং চ পুরুষঃ কোঽপি বাণান্গ্রসতি সর্বশঃ
40.38
অহমেনং ধনুষ্কোট্যা শূলাগ্রেণেব কুঞ্জরম্
নয়ামি দণ্ডধারস্য যমস্য সদনং প্রতি
40.39
সংপ্রায়ুধ্যদ্ধনুষ্কোট্যা কৌন্তেয়ঃ পরবীরহা
তদপ্যস্য ধনুর্দিব্যং জগ্রাস গিরিগোচরঃ
40.40
ততোঽর্জুনো গ্রস্তধনুঃ খড্গপাণিরতিষ্ঠত
যুদ্ধস্যান্তমভীপ্সন্বৈ বেগেনাভিজগাম তম্
40.41
তস্য মূর্ধ্নি শিতং খড্গমসক্তং পর্বতেষ্বপি
মুমোচ ভুজবীর্যেণ বিক্রম্য কুরুনন্দনঃ
তস্য মূর্ধানমাসাদ্য পফালাসিবরো হি সঃ
40.42
ততো বৃক্ষৈঃ শিলাভিশ্চ যোধয়ামাস ফল্গুনঃ
যথা বৃক্ষান্মহাকায়ঃ প্রত্যগৃহ্ণাদথো শিলাঃ
40.43
কিরাতরূপী ভগবাংস্ততঃ পার্থো মহাবলঃ
মুষ্টিভির্বজ্রসংস্পর্শৈর্ধূমমুত্পাদয়ন্মুখে
প্রজহার দুরাধর্ষে কিরাতসমরূপিণি
40.44
ততঃ শক্রাশনিসমৈর্মুষ্টিভির্ভৃশদারুণৈঃ
কিরাতরূপী ভগবানর্দয়ামাস ফল্গুনম্
40.45
ততশ্চটচটাশব্দঃ সুঘোরঃ সমজায়ত
পাণ্ডবস্য চ মুষ্টীনাং কিরাতস্য চ যুধ্যতঃ
40.46
সুমুহূর্তং মহদ্যুদ্ধমাসীত্তল্লোমহর্ষণম্
ভুজপ্রহারসংয়ুক্তং বৃত্রবাসবয়োরিব
40.47
জহারাথ ততো জিষ্ণুঃ কিরাতমুরসা বলী
পাণ্ডবং চ বিচেষ্টন্তং কিরাতোঽপ্যহনদ্বলাৎ
40.48
তয়োর্ভুজবিনিষ্পেষাত্সংঘর্ষেণোরসোস্তথা
সমজায়ত গাত্রেষু পাবকোঽঙ্গারধূমবান্
40.49
তত এনং মহাদেবঃ পীড্য গাত্রৈঃ সুপীডিতম্
তেজসা ব্যাক্রমদ্রোষাচ্চেতস্তস্য বিমোহয়ন্
40.50
ততো নিপীডিতৈর্গাত্রৈঃ পিণ্ডীকৃত ইবাবভৌ
ফল্গুনো গাত্রসংরুদ্ধো দেবদেবেন ভারত
40.51
নিরুচ্ছ্বাসোঽভবচ্চৈব সংনিরুদ্ধো মহাত্মনা
ততঃ পপাত সংমূঢস্ততঃ প্রীতোঽভবদ্ভবঃ
40.52
ভগবানুবাচ
ভো ভো ফল্গুন তুষ্টোঽস্মি কর্মণাপ্রতিমেন তে
শৌর্যেণানেন ধৃত্যা চ ক্ষত্রিয়ো নাস্তি তে সমঃ
40.53
সমং তেজশ্চ বীর্যং চ মমাদ্য তব চানঘ
প্রীতস্তেঽহং মহাবাহো পশ্য মাং পুরুষর্ষভ
40.54
দদানি তে বিশালাক্ষ চক্ষুঃ পূর্বঋষির্ভবান্
বিজেষ্যসি রণে শত্রূনপি সর্বান্দিবৌকসঃ
40.55
বৈশংপায়ন উবাচ
ততো দেবং মহাদেবং গিরিশং শূলপাণিনম্
দদর্শ ফল্গুনস্তত্র সহ দেব্যা মহাদ্যুতিম্
40.56
স জানুভ্যাং মহীং গত্বা শিরসা প্রণিপত্য চ
প্রসাদয়ামাস হরং পার্থঃ পরপুরংজয়ঃ
40.57
অর্জুন উবাচ
কপর্দিন্সর্বভূতেশ ভগনেত্রনিপাতন
ব্যতিক্রমং মে ভগবন্ক্ষন্তুমর্হসি শংকর
40.58
ভবগদ্দর্শনাকাঙ্ক্ষী প্রাপ্তোঽস্মীমং মহাগিরিম্
দয়িতং তব দেবেশ তাপসালয়মুত্তমম্
40.59
প্রসাদয়ে ত্বাং ভগবন্সর্বভূতনমস্কৃত
ন মে স্যাদপরাধোঽয়ং মহাদেবাতিসাহসাৎ
40.60
কৃতো ময়া যদজ্ঞানাদ্বিমর্দোঽয়ং ত্বয়া সহ
শরণং সংপ্রপন্নায় তত্ক্ষমস্বাদ্য শংকর
40.61
বৈশংপায়ন উবাচ
তমুবাচ মহাতেজাঃ প্রহস্য বৃষভধ্বজঃ
প্রগৃহ্য রুচিরং বাহুং ক্ষান্তমিত্যেব ফল্গুনম্