Utshovঅধ্যায় 39
39.1
জনমেজয় উবাচ
ভগবঞ্শ্রোতুমিচ্ছামি পার্থস্যাক্লিষ্টকর্মণঃ
বিস্তরেণ কথামেতাং যথাস্ত্রাণ্যুপলব্ধবান্
39.2
কথং স পুরুষব্যাঘ্রো দীর্ঘবাহুর্ধনংজয়ঃ
বনং প্রবিষ্টস্তেজস্বী নির্মনুষ্যমভীতবৎ
39.3
কিং চ তেন কৃতং তত্র বসতা ব্রহ্মবিত্তম
কথং চ ভগবান্স্থাণুর্দেবরাজশ্চ তোষিতঃ
39.4
এতদিচ্ছাম্যহং শ্রোতুং ত্বত্প্রসাদাদ্দ্বিজোত্তম
ত্বং হি সর্বজ্ঞ দিব্যং চ মানুষং চৈব বেত্থ হ
39.5
অত্যদ্ভুতং মহাপ্রাজ্ঞ রোমহর্ষণমর্জুনঃ
ভবেন সহ সংগ্রামং চকারাপ্রতিমং কিল
পুরা প্রহরতাং শ্রেষ্ঠঃ সংগ্রামেষ্বপরাজিতঃ
39.6
যচ্ছ্রুত্বা নরসিংহানাং দৈন্যহর্ষাতিবিস্ময়াৎ
শূরাণামপি পার্থানাং হৃদয়ানি চকম্পিরে
39.7
যদ্যচ্চ কৃতবানন্যত্পার্থস্তদখিলং বদ
ন হ্যস্য নিন্দিতং জিষ্ণোঃ সুসূক্ষ্মমপি লক্ষয়ে
চরিতং তস্য শূরস্য তন্মে সর্বং প্রকীর্তয়
39.8
বৈশংপায়ন উবাচ
কথয়িষ্যামি তে তাত কথামেতাং মহাত্মনঃ
দিব্যাং কৌরবশার্দূল মহতীমদ্ভুতোপমাম্
39.9
গাত্রসংস্পর্শসংবন্ধং ত্র্যম্বকেণ সহানঘ
পার্থস্য দেবদেবেন শৃণু সম্যক্সমাগমম্
39.10
যুধিষ্ঠিরনিয়োগাত্স জগামামিতবিক্রমঃ
শক্রং সুরেশ্বরং দ্রষ্টুং দেবদেবং চ শংকরম্
39.11
দিব্যং তদ্ধনুরাদায় খড্গং চ পুরুষর্ষভঃ
মহাবলো মহাবাহুরর্জুনঃ কার্যসিদ্ধয়ে
দিশং হ্যুদীচীং কৌরব্যো হিমবচ্ছিখরং প্রতি
39.12
ঐন্দ্রিঃ স্থিরমনা রাজন্সর্বলোকমহারথঃ
ত্বরয়া পরয়া যুক্তস্তপসে ধৃতনিশ্চয়ঃ
বনং কণ্টকিতং ঘোরমেক এবান্বপদ্যত
39.13
নানাপুষ্পফলোপেতং নানাপক্ষিনিষেবিতম্
নানামৃগগণাকীর্ণং সিদ্ধচারণসেবিতম্
39.14
ততঃ প্রয়াতে কৌন্তেয়ে বনং মানুষবর্জিতম্
শঙ্খানাং পটহানাং চ শব্দঃ সমভবদ্দিবি
39.15
পুষ্পবর্ষং চ সুমহন্নিপপাত মহীতলে
মেঘজালং চ বিততং ছাদয়ামাস সর্বতঃ
39.16
অতীত্য বনদুর্গাণি সংনিকর্ষে মহাগিরেঃ
শুশুভে হিমবত্পৃষ্ঠে বসমানোঽর্জুনস্তদা
39.17
তত্রাপশ্যদ্দ্রুমান্ফুল্লান্বিহগৈর্বল্গু নাদিতান্
নদীশ্চ বহুলাবর্তা নীলবৈডূর্যসংনিভাঃ
39.18
হংসকারণ্ডবোদ্গীতাঃ সারসাভিরুতাস্তথা
পুংস্কোকিলরুতাশ্চৈব ক্রৌঞ্চবর্হিণনাদিতাঃ
39.19
মনোহরবনোপেতাস্তস্মিন্নতিরথোঽর্জুনঃ
পুণ্যশীতামলজলাঃ পশ্যন্প্রীতমনাভবৎ
39.20
রমণীয়ে বনোদ্দেশে রমমাণোঽর্জুনস্তদা
তপস্যুগ্রে বর্তমান উগ্রতেজা মহামনাঃ
39.21
দর্ভচীরং নিবস্যাথ দণ্ডাজিনবিভূষিতঃ
পূর্ণে পূর্ণে ত্রিরাত্রে তু মাসমেকং ফলাশনঃ
দ্বিগুণেনৈব কালেন দ্বিতীয়ং মাসমত্যগাৎ
39.22
তৃতীয়মপি মাসং স পক্ষেণাহারমাচরন্
শীর্ণং চ পতিতং ভূমৌ পর্ণং সমুপয়ুক্তবান্
39.23
চতুর্থে ত্বথ সংপ্রাপ্তে মাসি পূর্ণে ততঃ পরম্
বায়ুভক্ষো মহাবাহুরভবত্পাণ্ডুনন্দনঃ
ঊর্ধ্ববাহুর্নিরালম্বঃ পাদাঙ্গুষ্ঠাগ্রবিষ্ঠিতঃ
39.24
সদোপস্পর্শনাচ্চাস্য বভূবুরমিতৌজসঃ
বিদ্যুদম্ভোরুহনিভা জটাস্তস্য মহাত্মনঃ
39.25
ততো মহর্ষয়ঃ সর্বে জগ্মুর্দেবং পিনাকিনম্
শিতিকণ্ঠং মহাভাগং প্রণিপত্য প্রসাদ্য চ
সর্বে নিবেদয়ামাসুঃ কর্ম তত্ফল্গুনস্য হ
39.26
এষ পার্থো মহাতেজা হিমবত্পৃষ্ঠমাশ্রিতঃ
উগ্রে তপসি দুষ্পারে স্থিতো ধূমায়য়ন্দিশঃ
39.27
তস্য দেবেশ ন বয়ং বিদ্মঃ সর্বে চিকীর্ষিতম্
সংতাপয়তি নঃ সর্বানসৌ সাধু নিবার্যতাম্
39.28
মহেশ্বর উবাচ
শীঘ্রং গচ্ছত সংহৃষ্টা যথাগতমতন্দ্রিতাঃ
অহমস্য বিজানামি সংকল্পং মনসি স্থিতম্
39.29
নাস্য স্বর্গস্পৃহা কাচিন্নৈশ্বর্যস্য ন চায়ুষঃ
যত্ত্বস্য কাঙ্ক্ষিতং সর্বং তত্করিষ্যেঽহমদ্য বৈ
39.30
বৈশংপায়ন উবাচ
তে শ্রুত্ব শর্ববচনমৃষয়ঃ সত্যবাদিনঃ
প্রহৃষ্টমনসো জগ্মুর্যথাস্বং পুনরাশ্রমান্