Utshovঅধ্যায় 38
38.1
বৈশংপায়ন উবাচ
কস্যচিত্ত্বথ কালস্য ধর্মরাজো যুধিষ্ঠিরঃ
সংস্মৃত্য মুনিসংদেশমিদং বচনমব্রবীৎ
38.2
বিবিক্তে বিদিতপ্রজ্ঞমর্জুনং ভরতর্ষভম্
সান্ত্বপূর্বং স্মিতং কৃত্বা পাণিনা পরিসংস্পৃশন্
38.3
স মুহূর্তমিব ধ্যাত্বা বনবাসমরিংদমঃ
ধনংজয়ং ধর্মরাজো রহসীদমুবাচ হ
38.4
ভীষ্মে দ্রোণে কৃপে কর্ণে দ্রোণপুত্রে চ ভারত
ধনুর্বেদশ্চতুষ্পাদ এতেষ্বদ্য প্রতিষ্ঠিতঃ
38.5
ব্রাহ্মং দৈবমাসুরং চ সপ্রয়োগচিকিত্সিতম্
সর্বাস্ত্রাণাং প্রয়োগং চ তেঽভিজানন্তি কৃত্স্নশঃ
38.6
তে সর্বে ধৃতরাষ্ট্রস্য পুত্রেণ পরিসান্ত্বিতাঃ
সংবিভক্তাশ্চ তুষ্টাশ্চ গুরুবত্তেষু বর্ততে
38.7
সর্বয়োধেষু চৈবাস্য সদা বৃত্তিরনুত্তমা
শক্তিং ন হাপয়িষ্যন্তি তে কালে প্রতিপূজিতাঃ
38.8
অদ্য চেয়ং মহী কৃত্স্না দুর্যোধনবশানুগা
ত্বয়ি ব্যপাশ্রয়োঽস্মাকং ত্বয়ি ভারঃ সমাহিতঃ
তত্র কৃত্যং প্রপশ্যামি প্রাপ্তকালমরিংদম
38.9
কৃষ্ণদ্বৈপায়নাত্তাত গৃহীতোপনিষন্ময়া
তয়া প্রয়ুক্তয়া সম্যগ্জগত্সর্বং প্রকাশতে
তেন ত্বং ব্রহ্মণা তাত সংয়ুক্তঃ সুসমাহিতঃ
38.10
দেবতানাং যথাকালং প্রসাদং প্রতিপালয়
তপসা যোজয়াত্মানমুগ্রেণ ভরতর্ষভ
38.11
ধনুষ্মান্কবচী খড্গী মুনিঃ সারসমন্বিতঃ
ন কস্যচিদ্দদন্মার্গং গচ্ছ তাতোত্তরাং দিশম্
ইন্দ্রে হ্যস্ত্রাণি দিব্যানি সমস্তানি ধনংজয়
38.12
বৃত্রাদ্ভীতৈস্তদা দেবৈর্বলমিন্দ্রে সমর্পিতম্
তান্যেকস্থানি সর্বাণি ততস্ত্বং প্রতিপত্স্যসে
38.13
শক্রমেব প্রপদ্যস্ব স তেঽস্ত্রাণি প্রদাস্যতি
দীক্ষিতোঽদ্যৈব গচ্ছ ত্বং দ্রষ্টুং দেবং পুরংদরম্
38.14
এবমুক্ত্বা ধর্মরাজস্তমধ্যাপয়ত প্রভুঃ
দীক্ষিতং বিধিনা তেন যতবাক্কায়মানসম্
অনুজজ্ঞে ততো বীরং ভ্রাতা ভ্রাতরমগ্রজঃ
38.15
নিদেশাদ্ধর্মরাজস্য দ্রষ্টুং দেবং পুরংদরম্
ধনুর্গাণ্ডীবমাদায় তথাক্ষয্যৌ মহেষুধী
38.16
কবচী সতলত্রাণো বদ্ধগোধাঙ্গুলিত্রবান্
হুত্বাগ্নিং ব্রাহ্মণান্নিষ্কৈঃ স্বস্তি বাচ্য মহাভুজঃ
38.17
প্রাতিষ্ঠত মহাবাহুঃ প্রগৃহীতশরাসনঃ
বধায় ধার্তরাষ্ট্রাণাং নিঃশ্বস্যোর্ধ্বমুদীক্ষ্য চ
38.18
তং দৃষ্ট্বা তত্র কৌন্তেয়ং প্রগৃহীতশরাসনম্
অব্রুবন্ব্রাহ্মণাঃ সিদ্ধা ভূতান্যন্তর্হিতানি চ
ক্ষিপ্রং প্রাপ্নুহি কৌন্তেয় মনসা যদ্যদিচ্ছসি
38.19
তং সিংহমিব গচ্ছন্তং শালস্কন্ধোরুমর্জুনম্
মনাংস্যাদায় সর্বেষাং কৃষ্ণা বচনমব্রবীৎ
38.20
যত্তে কুন্তী মহাবাহো জাতস্যৈচ্ছদ্ধনংজয়
তত্তেঽস্তু সর্বং কৌন্তেয় যথা চ স্বয়মিচ্ছসি
38.21
মাস্মাকং ক্ষত্রিয়কুলে জন্ম কশ্চিদবাপ্নুয়াৎ
ব্রাহ্মণেভ্যো নমো নিত্যং যেষাং যুদ্ধে ন জীবিকা
38.22
নূনং তে ভ্রাতরঃ সর্বে ত্বত্কথাভিঃ প্রজাগরে
রংস্যন্তে বীরকর্মাণি কীর্তয়ন্তঃ পুনঃ পুনঃ
38.23
নৈব নঃ পার্থ ভোগেষু ন ধনে নোত জীবিতে
তুষ্টির্বুদ্ধির্ভবিত্রী বা ত্বয়ি দীর্ঘপ্রবাসিনি
38.24
ত্বয়ি নঃ পার্থ সর্বেষাং সুখদুঃখে সমাহিতে
জীবিতং মরণং চৈব রাজ্যমৈশ্বর্যমেব চ
আপৃষ্টো মেঽসি কৌন্তেয় স্বস্তি প্রাপ্নুহি পাণ্ডব
38.25
নমো ধাত্রে বিধাত্রে চ স্বস্তি গচ্ছ হ্যনাময়ম্
স্বস্তি তেঽস্ত্বান্তরিক্ষেভ্যঃ পার্থিবেভ্যশ্চ ভারত
দিব্যেভ্যশ্চৈব ভূতেভ্যো যে চান্যে পরিপন্থিনঃ
38.26
ততঃ প্রদক্ষিণং কৃত্বা ভ্রাতৄন্ধৌম্যং চ পাণ্ডবঃ
প্রাতিষ্ঠত মহাবাহুঃ প্রগৃহ্য রুচিরং ধনুঃ
38.27
তস্য মার্গাদপাক্রামন্সর্বভূতানি গচ্ছতঃ
যুক্তস্যৈন্দ্রেণ যোগেন পরাক্রান্তস্য শুষ্মিণঃ
38.28
সোঽগচ্ছত্পর্বতং পুণ্যমেকাহ্নৈব মহামনাঃ
মনোজবগতির্ভূত্বা যোগয়ুক্তো যথানিলঃ
38.29
হিমবন্তমতিক্রম্য গন্ধমাদনমেব চ
অত্যক্রামত্স দুর্গাণি দিবারাত্রমতন্দ্রিতঃ
38.30
ইন্দ্রকীলং সমাসাদ্য ততোঽতিষ্ঠদ্ধনংজয়ঃ
অন্তরিক্ষে হি শুশ্রাব তিষ্ঠেতি স বচস্তদা
38.31
ততোঽপশ্যত্সব্যসাচী বৃক্ষমূলে তপস্বিনম্
ব্রাহ্ম্যা শ্রিয়া দীপ্যমানং পিঙ্গলং জটিলং কৃশম্
38.32
সোঽব্রবীদর্জুনং তত্র স্থিতং দৃষ্ট্বা মহাতপাঃ
কস্ত্বং তাতেহ সংপ্রাপ্তো ধনুষ্মান্কবচী শরী
নিবদ্ধাসিতলত্রাণঃ ক্ষত্রধর্মমনুব্রতঃ
38.33
নেহ শস্ত্রেণ কর্তব্যং শান্তানাময়মালয়ঃ
বিনীতক্রোধহর্ষাণাং ব্রাহ্মণানাং তপস্বিনাম্
38.34
নেহাস্তি ধনুষা কার্যং ন সংগ্রামেণ কর্হিচিৎ
নিক্ষিপৈতদ্ধনুস্তাত প্রাপ্তোঽসি পরমাং গতিম্
38.35
ইত্যনন্তৌজসং বীরং যথা চান্যং পৃথগ্জনম্
তথা বাচমথাভীক্ষ্ণং ব্রাহ্মণোঽর্জুনমব্রবীৎ
ন চৈনং চালয়ামাস ধৈর্যাত্সুদৃঢনিশ্চয়ম্
38.36
তমুবাচ ততঃ প্রীতঃ স দ্বিজঃ প্রহসন্নিব
বরং বৃণীষ্ব ভদ্রং তে শক্রোঽহমরিসূদন
38.37
এবমুক্তঃ প্রত্যুবাচ সহস্রাক্ষং ধনংজয়ঃ
প্রাঞ্জলিঃ প্রণতো ভূত্বা শূরঃ কুরুকুলোদ্বহঃ
38.38
ঈপ্সিতো হ্যেষ মে কামো বরং চৈনং প্রয়চ্ছ মে
ত্বত্তোঽদ্য ভগবন্নস্ত্রং কৃত্স্নমিচ্ছামি বেদিতুম্
38.39
প্রত্যুবাচ মহেন্দ্রস্তং প্রীতাত্মা প্রহসন্নিব
ইহ প্রাপ্তস্য কিং কার্যমস্ত্রৈস্তব ধনংজয়
কামান্বৃণীষ্ব লোকাংশ্চ প্রাপ্তোঽসি পরমাং গতিম্
38.40
এবমুক্তঃ প্রত্যুবাচ সহস্রাক্ষং ধনংজয়ঃ
ন লোকান্ন পুনঃ কামান্ন দেবত্বং কুতঃ সুখম্
38.41
ন চ সর্বামরৈশ্বর্যং কাময়ে ত্রিদশাধিপ
ভ্রাতৄংস্তান্বিপিনে ত্যক্ত্বা বৈরমপ্রতিয়াত্য চ
অকীর্তিং সর্বলোকেষু গচ্ছেয়ং শাশ্বতীঃ সমাঃ
38.42
এবমুক্তঃ প্রত্যুবাচ বৃত্রহা পাণ্ডুনন্দনম্
সান্ত্বয়ঞ্শ্লক্ষ্ণয়া বাচা সর্বলোকনমস্কৃতঃ
38.43
যদা দ্রক্ষ্যসি ভূতেশং ত্র্যক্ষং শূলধরং শিবম্
তদা দাতাস্মি তে তাত দিব্যান্যস্ত্রাণি সর্বশঃ
38.44
ক্রিয়তাং দর্শনে যত্নো দেবস্য পরমেষ্ঠিনঃ
দর্শনাত্তস্য কৌন্তেয় সংসিদ্ধঃ স্বর্গমেষ্যসি
38.45
ইত্যুক্ত্বা ফল্গুনং শক্রো জগামাদর্শনং ততঃ
অর্জুনোঽপ্যথ তত্রৈব তস্থৌ যোগসমন্বিতঃ