Utshovঅধ্যায় 37
37.1
বৈশংপায়ন উবাচ
ভীমসেনবচঃ শ্রুত্বা কুন্তীপুত্রো যুধিষ্ঠিরঃ
নিঃশ্বস্য পুরুষব্যাঘ্রঃ সংপ্রদধ্যৌ পরংতপঃ
37.2
স মুহূর্তমিব ধ্যাত্বা বিনিশ্চিত্যেতিকৃত্যতাম্
ভীমসেনমিদং বাক্যমপদান্তরমব্রবীৎ
37.3
এবমেতন্মহাবাহো যথা বদসি ভারত
ইদমন্যত্সমাধত্স্ব বাক্যং মে বাক্যকোবিদ
37.4
মহাপাপানি কর্মাণি যানি কেবলসাহসাৎ
আরভ্যন্তে ভীমসেন ব্যথন্তে তানি ভারত
37.5
সুমন্ত্রিতে সুবিক্রান্তে সুকৃতে সুবিচারিতে
সিধ্যন্ত্যর্থা মহাবাহো দৈবং চাত্র প্রদক্ষিণম্
37.6
ত্বং তু কেবলচাপল্যাদ্বলদর্পোচ্ছ্রিতঃ স্বয়ম্
আরব্ধব্যমিদং কর্ম মন্যসে শৃণু তত্র মে
37.7
ভূরিশ্রবাঃ শলশ্চৈব জলসংধশ্চ বীর্যবান্
ভীষ্মো দ্রোণশ্চ কর্ণশ্চ দ্রোণপুত্রশ্চ বীর্যবান্
37.8
ধার্তরাষ্ট্রা দুরাধর্ষা দুর্যোধনপুরোগমাঃ
সর্ব এব কৃতাস্ত্রাশ্চ সততং চাততায়িনঃ
37.9
রাজানঃ পার্থিবাশ্চৈব যেঽস্মাভিরুপতাপিতাঃ
সংশ্রিতাঃ কৌরবং পক্ষং জাতস্নেহাশ্চ সাংপ্রতম্
37.10
দুর্যোধনহিতে যুক্তা ন তথাস্মাসু ভারত
পূর্ণকোশা বলোপেতাঃ প্রয়তিষ্যন্তি রক্ষণে
37.11
সর্বে কৌরবসৈন্যস্য সপুত্রামাত্যসৈনিকাঃ
সংবিভক্তা হি মাত্রাভির্ভোগৈরপি চ সর্বশঃ
37.12
দুর্যোধনেন তে বীরা মানিতাশ্চ বিশেষতঃ
প্রাণাংস্ত্যক্ষ্যন্তি সংগ্রামে ইতি মে নিশ্চিতা মতিঃ
37.13
সমা যদ্যপি ভীষ্মস্য বৃত্তিরস্মাসু তেষু চ
দ্রোণস্য চ মহাবাহো কৃপস্য চ মহাত্মনঃ
37.14
অবশ্যং রাজপিণ্ডস্তৈর্নির্বেশ্য ইতি মে মতিঃ
তস্মাত্ত্যক্ষ্যন্তি সংগ্রামে প্রাণানপি সুদুস্ত্যজান্
37.15
সর্বে দিব্যাস্ত্রবিদ্বাংসঃ সর্বে ধর্মপরায়ণাঃ
অজেয়াশ্চেতি মে বুদ্ধিরপি দেবৈঃ সবাসবৈঃ
37.16
অমর্ষী নিত্যসংহৃষ্টস্তত্র কর্ণো মহারথঃ
সর্বাস্ত্রবিদনাধৃষ্য অভেদ্যকবচাবৃতঃ
37.17
অনির্জিত্য রণে সর্বানেতান্পুরুষসত্তমান্
অশক্যো হ্যসহায়েন হন্তুং দুর্যোধনস্ত্বয়া
37.18
ন নিদ্রামধিগচ্ছামি চিন্তয়ানো বৃকোদর
অতি সর্বান্ধনুর্গ্রাহান্সূতপুত্রস্য লাঘবম্
37.19
এতদ্বচনমাজ্ঞায় ভীমসেনোঽত্যমর্ষণঃ
বভূব বিমনাস্ত্রস্তো ন চৈবোবাচ কিংচন
37.20
তয়োঃ সংবদতোরেবং তদা পাণ্ডবয়োর্দ্বয়োঃ
আজগাম মহায়োগী ব্যাসঃ সত্যবতীসুতঃ
37.21
সোঽভিগম্য যথান্যায়ং পাণ্ডবৈঃ প্রতিপূজিতঃ
যুধিষ্ঠিরমিদং বাক্যমুবাচ বদতাং বরঃ
37.22
যুধিষ্ঠির মহাবাহো বেদ্মি তে হৃদি মানসম্
মনীষয়া ততঃ ক্ষিপ্রমাগতোঽস্মি নরর্ষভ
37.23
ভীষ্মাদ্দ্রোণাত্কৃপাত্কর্ণাদ্দ্রোণপুত্রাচ্চ ভারত
যত্তে ভয়মমিত্রঘ্ন হৃদি সংপরিবর্ততে
37.24
তত্তেঽহং নাশয়িষ্যামি বিধিদৃষ্টেন হেতুনা
তচ্ছ্রুত্বা ধৃতিমাস্থায় কর্মণা প্রতিপাদয়
37.25
তত একান্তমুন্নীয় পারাশর্যো যুধিষ্ঠিরম্
অব্রবীদুপপন্নার্থমিদং বাক্যবিশারদঃ
37.26
শ্রেয়সস্তে পরঃ কালঃ প্রাপ্তো ভরতসত্তম
যেনাভিভবিতা শত্রূন্রণে পার্থো ধনংজয়ঃ
37.27
গৃহাণেমাং ময়া প্রোক্তাং সিদ্ধিং মূর্তিমতীমিব
বিদ্যাং প্রতিস্মৃতিং নাম প্রপন্নায় ব্রবীমি তে
যামবাপ্য মহাবাহুরর্জুনঃ সাধয়িষ্যতি
37.28
অস্ত্রহেতোর্মহেন্দ্রং চ রুদ্রং চৈবাভিগচ্ছতু
বরুণং চ ধনেশং চ ধর্মরাজং চ পাণ্ডব
শক্তো হ্যেষ সুরান্দ্রষ্টুং তপসা বিক্রমেণ চ
37.29
ঋষিরেষ মহাতেজা নারায়ণসহায়বান্
পুরাণঃ শাশ্বতো দেবো বিষ্ণোরংশঃ সনাতনঃ
37.30
অস্ত্রাণীন্দ্রাচ্চ রুদ্রাচ্চ লোকপালেভ্য এব চ
সমাদায় মহাবাহুর্মহত্কর্ম করিষ্যতি
37.31
বনাদস্মাচ্চ কৌন্তেয় বনমন্যদ্বিচিন্ত্যতাম্
নিবাসার্থায় যদ্যুক্তং ভবেদ্বঃ পৃথিবীপতে
37.32
একত্র চিরবাসো হি ন প্রীতিজননো ভবেৎ
তাপসানাং চ শান্তানাং ভবেদুদ্বেগকারকঃ
37.33
মৃগাণামুপয়োগশ্চ বীরুদোষধিসংক্ষয়ঃ
বিভর্ষি হি বহূন্বিপ্রান্বেদবেদাঙ্গপারগান্
37.34
এবমুক্ত্বা প্রপন্নায় শুচয়ে ভগবান্প্রভুঃ
প্রোবাচ যোগতত্ত্বজ্ঞো যোগবিদ্যামনুত্তমাম্
37.35
ধর্মরাজ্ঞে তদা ধীমান্ব্যাসঃ সত্যবতীসুতঃ
অনুজ্ঞায় চ কৌন্তেয়ং তত্রৈবান্তরধীয়ত
37.36
যুধিষ্ঠিরস্তু ধর্মাত্মা তদ্ব্রহ্ম মনসা যতঃ
ধারয়ামাস মেধাবী কালে কালে সমভ্যসন্
37.37
স ব্যাসবাক্যমুদিতো বনাদ্দ্বৈতবনাত্ততঃ
যয়ৌ সরস্বতীতীরে কাম্যকং নাম কাননম্
37.38
তমন্বয়ুর্মহারাজ শিক্ষাক্ষরবিদস্তথা
ব্রাহ্মণাস্তপসা যুক্তা দেবেন্দ্রমৃষয়ো যথা
37.39
ততঃ কাম্যকমাসাদ্য পুনস্তে ভরতর্ষভাঃ
ন্যবিশন্ত মহাত্মানঃ সামাত্যাঃ সপদানুগাঃ
37.40
তত্র তে ন্যবসন্রাজন্কংচিত্কালং মনস্বিনঃ
ধনুর্বেদপরা বীরাঃ শৃণ্বানা বেদমুত্তমম্
37.41
চরন্তো মৃগয়াং নিত্যং শুদ্ধৈর্বাণৈর্মৃগার্থিনঃ
পিতৃদৈবতবিপ্রেভ্যো নির্বপন্তো যথাবিধি