Utshovঅধ্যায় 36
36.1
ভীমসেন উবাচ
সংধিং কৃত্বৈব কালেন অন্তকেন পতত্রিণা
অনন্তেনাপ্রমেয়েন স্রোতসা সর্বহারিণা
36.2
প্রত্যক্ষং মন্যসে কালং মর্ত্যঃ সন্কালবন্ধনঃ
ফেনধর্মা মহারাজ ফলধর্মা তথৈব চ
36.3
নিমেষাদপি কৌন্তেয় যস্যায়ুরপচীয়তে
সূচ্যেবাঞ্জনচূর্ণস্য কিমিতি প্রতিপালয়েৎ
36.4
যো নূনমমিতায়ুঃ স্যাদথ বাপি প্রমাণবিৎ
স কালং বৈ প্রতীক্ষেত সর্বপ্রত্যক্ষদর্শিবান্
36.5
প্রতীক্ষমাণান্কালো নঃ সমা রাজংস্ত্রয়োদশ
আয়ুষোঽপচয়ং কৃত্বা মরণায়োপনেষ্যতি
36.6
শরীরিণাং হি মরণং শরীরে নিত্যমাশ্রিতম্
প্রাগেব মরণাত্তস্মাদ্রাজ্যায়ৈব ঘটামহে
36.7
যো ন যাতি প্রসংখ্যানমস্পষ্টো ভূমিবর্ধনঃ
অয়াতয়িত্বা বৈরাণি সোঽবসীদতি গৌরিব
36.8
যো ন যাতয়তে বৈরমল্পসত্ত্বোদ্যমঃ পুমান্
অফলং তস্য জন্মাহং মন্যে দুর্জাতজায়িনঃ
36.9
হৈরণ্যৌ ভবতো বাহূ শ্রুতির্ভবতি পার্থিব
হত্বা দ্বিষন্তং সংগ্রামে ভুক্ত্বা বাহ্বর্জিতং বসু
36.10
হত্বা চেত্পুরুষো রাজন্নিকর্তারমরিংদম
অহ্নায় নরকং গচ্ছেত্স্বর্গেণাস্য স সংমিতঃ
36.11
অমর্ষজো হি সংতাপঃ পাবকাদ্দীপ্তিমত্তরঃ
যেনাহমভিসংতপ্তো ন নক্তং ন দিবা শয়ে
36.12
অয়ং চ পার্থো বীভত্সুর্বরিষ্ঠো জ্যাবিকর্ষণে
আস্তে পরমসংতপ্তো নূনং সিংহ ইবাশয়ে
36.13
যোঽয়মেকোঽভিমনুতে সর্বাঁল্লোকে ধনুর্ভৃতঃ
সোঽয়মাত্মজমূষ্মাণং মহাহস্তীব যচ্ছতি
36.14
নকুলঃ সহদেবশ্চ বৃদ্ধা মাতা চ বীরসূঃ
তবৈব প্রিয়মিচ্ছন্ত আসতে জডমূকবৎ
36.15
সর্বে তে প্রিয়মিচ্ছন্তি বান্ধবাঃ সহ সৃঞ্জয়ৈঃ
অহমেকোঽভিসংতপ্তো মাতা চ প্রতিবিন্ধ্যতঃ
36.16
প্রিয়মেব তু সর্বেষাং যদ্ব্রবীম্যুত কিংচন
সর্বে হী ব্যসনং প্রাপ্তাঃ সর্বে যুদ্ধাভিনন্দিনঃ
36.17
নেতঃ পাপীয়সী কাচিদাপদ্রাজন্ভবিষ্যতি
যন্নো নীচৈরল্পবলৈ রাজ্যমাচ্ছিদ্য ভুজ্যতে
36.18
শীলদোষাদ্ঘৃণাবিষ্ট আনৃশংস্যাত্পরংতপ
ক্লেশাংস্তিতিক্ষসে রাজন্নান্যঃ কশ্চিত্প্রশংসতি
36.19
ঘৃণী ব্রাহ্মণরূপোঽসি কথং ক্ষত্রে অজায়থাঃ
অস্যাং হি যোনৌ জায়ন্তে প্রায়শঃ ক্রূরবুদ্ধয়ঃ
36.20
অশ্রৌষীস্ত্বং রাজধর্মান্যথা বৈ মনুরব্রবীৎ
ক্রূরান্নিকৃতিসংয়ুক্তান্বিহিতানশমাত্মকান্
36.21
কর্তব্যে পুরুষব্যাঘ্র কিমাস্সে পীঠসর্পবৎ
বুদ্ধ্যা বীর্যেণ সংয়ুক্তঃ শ্রুতেনাভিজনেন চ
36.22
তৃণানাং মুষ্টিনৈকেন হিমবন্তং তু পর্বতম্
ছন্নমিচ্ছসি কৌন্তেয় যোঽস্মান্সংবর্তুমিচ্ছসি
36.23
অজ্ঞাতচর্যা গূঢেন পৃথিব্যাং বিশ্রুতেন চ
দিবীব পার্থ সূর্যেণ ন শক্যা চরিতুং ত্বয়া
36.24
বৃহচ্ছাল ইবানূপে শাখাপুষ্পপলাশবান্
হস্তী শ্বেত ইবাজ্ঞাতঃ কথং জিষ্ণুশ্চরিষ্যতি
36.25
ইমৌ চ সিংহসংকাশৌ ভ্রাতরৌ সহিতৌ শিশূ
নকুলঃ সহদেবশ্চ কথং পার্থ চরিষ্যতঃ
36.26
পুণ্যকীর্তী রাজপুত্রী দ্রৌপদী বীরসূরিয়ম্
বিশ্রুতা কথমজ্ঞাতা কৃষ্ণা পার্থ চরিষ্যতি
36.27
মাং চাপি রাজঞ্জানন্তি আকুমারমিমাঃ প্রজাঃ
অজ্ঞাতচর্যাং পশ্যামি মেরোরিব নিগূহনম্
36.28
তথৈব বহবোঽস্মাভী রাষ্ট্রেভ্যো বিপ্রবাসিতাঃ
রাজানো রাজপুত্রাশ্চ ধৃতরাষ্ট্রমনুব্রতাঃ
36.29
ন হি তেঽপ্যুপশাম্যন্তি নিকৃতানাং নিরাকৃতাঃ
অবশ্যং তৈর্নিকর্তব্যমস্মাকং তত্প্রিয়ৈষিভিঃ
36.30
তেঽপ্যস্মাসু প্রয়ুঞ্জীরন্প্রচ্ছন্নান্সুবহূঞ্জনান্
আচক্ষীরংশ্চ নো জ্ঞাত্বা তন্নঃ স্যাত্সুমহদ্ভয়ম্
36.31
অস্মাভিরুষিতাঃ সম্যগ্বনে মাসাস্ত্রয়োদশ
পরিমাণেন তান্পশ্য তাবতঃ পরিবত্সরান্
36.32
অস্তি মাসঃ প্রতিনিধির্যথা প্রাহুর্মনীষিণঃ
পূতিকানিব সোমস্য তথেদং ক্রিয়তামিতি
36.33
অথ বানডুহে রাজন্সাধবে সাধুবাহিনে
সৌহিত্যদানাদেকস্মাদেনসঃ প্রতিমুচ্যতে
36.34
তস্মাচ্ছত্রুবধে রাজন্ক্রিয়তাং নিশ্চয়স্ত্বয়া
ক্ষত্রিয়স্য তু সর্বস্য নান্যো ধর্মোঽস্তি সংয়ুগাৎ