অধ্যায় 35

35.1

যুধিষ্ঠির উবাচ
অসংশয়ং ভারত সত্যমেত;দ্যন্মা তুদন্বাক্যশল্যৈঃ ক্ষিণোষি
ন ত্বা বিগর্হে প্রতিকূলমেত;ন্মমানয়াদ্ধি ব্যসনং ব আগাৎ

অহং হ্যক্ষানন্বপদ্যং জিহীর্ষ;ন্রাজ্যং সরাষ্ট্রং ধৃতরাষ্ট্রস্য পুত্রাৎ
তন্মা শঠঃ কিতবঃ প্রত্যদেবী;ত্সুয়োধনার্থং সুবলস্য পুত্রঃ

মহামায়ঃ শকুনিঃ পার্বতীয়ঃ; সদা সভায়াং প্রবপন্নক্ষপূগান্
অমায়িনং মায়য়া প্রত্যদেবী;ত্ততোঽপশ্যং বৃজিনং ভীমসেন

অক্ষান্হি দৃষ্ট্বা শকুনের্যথাব;ত্কামানুলোমানয়ুজো যুজশ্চ
শক্যং নিয়ন্তুমভবিষ্যদাত্মা; মন্যুস্তু হন্তি পুরুষস্য ধৈর্যম্

যন্তুং নাত্মা শক্যতে পৌরুষেণ; মানেন বীর্যেণ চ তাত নদ্ধঃ
ন তে বাচং ভীমসেনাভ্যসূয়ে; মন্যে তথা তদ্ভবিতব্যমাসীৎ

স নো রাজা ধৃতরাষ্ট্রস্য পুত্রো; ন্যপাতয়দ্ব্যসনে রাজ্যমিচ্ছন্
দাস্যং চ নোঽগময়দ্ভীমসেন; যত্রাভবচ্ছরণং দ্রৌপদী নঃ

ত্বং চাপি তদ্বেত্থ ধনংজয়শ্চ; পুনর্দ্যূতায়াগতানাং সভাং নঃ
যন্মাব্রবীদ্ধৃতরাষ্ট্রস্য পুত্র; একগ্লহার্থং ভরতানাং সমক্ষম্

বনে সমা দ্বাদশ রাজপুত্র; যথাকামং বিদিতমজাতশত্রো
অথাপরং চাবিদিতং চরেথাঃ; সর্বৈঃ সহ ভ্রাতৃভিশ্ছদ্মগূঢঃ

ত্বাং চেচ্ছ্রুত্বা তাত তথা চরন্ত;মবভোত্স্যন্তে ভারতানাং চরাঃ স্ম
অন্যাংশ্চরেথাস্তাবতোঽব্দাংস্ততস্ত্বং; নিশ্চিত্য তত্প্রতিজানীহি পার্থ

চরৈশ্চেন্নোঽবিদিতঃ কালমেতং; যুক্তো রাজন্মোহয়িত্বা মদীয়ান্
ব্রবীমি সত্যং কুরুসংসদীহ; তবৈব তা ভারত পঞ্চ নদ্যঃ

বয়ং চৈবং ভ্রাতরঃ সর্ব এব; ত্বয়া জিতাঃ কালমপাস্য ভোগান্
বসেম ইত্যাহ পুরা স রাজা; মধ্যে কুরূণাং স ময়োক্তস্তথেতি

তত্র দ্যূতমভবন্নো জঘন্যং; তস্মিঞ্জিতাঃ প্রব্রজিতাশ্চ সর্বে
ইত্থং চ দেশাননুসংচরামো; বনানি কৃচ্ছ্রাণি চ কৃচ্ছ্ররূপাঃ

সুয়োধনশ্চাপি ন শান্তিমিচ্ছ;ন্ভূয়ঃ স মন্যোর্বশমন্বগচ্ছৎ
উদ্যোজয়ামাস কুরূংশ্চ সর্বা;ন্যে চাস্য কেচিদ্বশমন্বগচ্ছন্

তং সংধিমাস্থায় সতাং সকাশে; কো নাম জহ্যাদিহ রাজ্যহেতোঃ
আর্যস্য মন্যে মরণাদ্গরীয়ো; যদ্ধর্মমুত্ক্রম্য মহীং প্রশিষ্যাৎ

তদৈব চেদ্বীরকর্মাকরিষ্যো; যদা দ্যূতে পরিঘং পর্যমৃক্ষঃ
বাহূ দিধক্ষন্বারিতঃ ফল্গুনেন; কিং দুষ্কৃতং ভীম তদাভবিষ্যৎ

প্রাগেব চৈবং সময়ক্রিয়ায়াঃ; কিং নাব্রবীঃ পৌরুষমাবিদানঃ
প্রাপ্তং তু কালং ত্বভিপদ্য পশ্চা;ত্কিং মামিদানীমতিবেলমাত্থ

ভূয়োঽপি দুঃখং মম ভীমসেন; দূয়ে বিষস্যেব রসং বিদিত্বা
যদ্যাজ্ঞসেনীং পরিকৃষ্যমাণাং; সংদৃশ্য তত্ক্ষান্তমিতি স্ম ভীম

ন ত্বদ্য শক্যং ভরতপ্রবীর; কৃত্বা যদুক্তং কুরুবীরমধ্যে
কালং প্রতীক্ষস্ব সুখোদয়স্য; পক্তিং ফলানামিব বীজবাপঃ

যদা হি পূর্বং নিকৃতো নিকৃত্যা; বৈরং সপুষ্পং সফলং বিদিত্বা
মহাগুণং হরতি হি পৌরুষেণ; তদা বীরো জীবতি জীবলোকে

শ্রিয়ং চ লোকে লভতে সমগ্রাং; মন্যে চাস্মৈ শত্রবঃ সংনমন্তে
মিত্রাণি চৈনমতিরাগাদ্ভজন্তে; দেবা ইবেন্দ্রমনুজীবন্তি চৈনম্

মম প্রতিজ্ঞাং চ নিবোধ সত্যাং; বৃণে ধর্মমমৃতাজ্জীবিতাচ্চ
রাজ্যং চ পুত্রাশ্চ যশো ধনং চ; সর্বং ন সত্যস্য কলামুপৈতি