Utshovঅধ্যায় 34
34.1
বৈশংপায়ন উবাচ
যাজ্ঞসেন্যা বচঃ শ্রুত্বা ভীমসেনোঽত্যমর্ষণঃ
নিঃশ্বসন্নুপসংগম্য ক্রুদ্ধো রাজানমব্রবীৎ
34.2
রাজ্যস্য পদবীং ধর্ম্যাং ব্রজ সত্পুরুষোচিতাম্
ধর্মকামার্থহীনানাং কিং নো বস্তুং তপোবনে
34.3
নৈব ধর্মেণ তদ্রাজ্যং নার্জবেন ন চৌজসা
অক্ষকূটমধিষ্ঠায় হৃতং দুর্যোধনেন নঃ
34.4
গোমায়ুনেব সিংহানাং দুর্বলেন বলীয়সাম্
আমিষং বিঘসাশেন তদ্বদ্রাজ্যং হি নো হৃতম্
34.5
ধর্মলেশপ্রতিচ্ছন্নঃ প্রভবং ধর্মকাময়োঃ
অর্থমুত্সৃজ্য কিং রাজন্দুর্গেষু পরিতপ্যসে
34.6
ভবতোঽনুবিধানেন রাজ্যং নঃ পশ্যতাং হৃতম্
অহার্যমপি শক্রেণ গুপ্তং গাণ্ডীবধন্বনা
34.7
কুণীনামিব বিল্বানি পঙ্গূনামিব ধেনবঃ
হৃতমৈশ্বর্যমস্মাকং জীবতাং ভবতঃ কৃতে
34.8
ভবতঃ প্রিয়মিত্যেবং মহদ্ব্যসনমীদৃশম্
ধর্মকামে প্রতীতস্য প্রতিপন্নাঃ স্ম ভারত
34.9
কর্শয়ামঃ স্বমিত্রাণি নন্দয়ামশ্চ শাত্রবান্
আত্মানং ভবতঃ শাস্ত্রে নিয়ম্য ভরতর্ষভ
34.10
যদ্বয়ং ন তদৈবৈতান্ধার্তরাষ্ট্রান্নিহন্মহি
ভবতঃ শাস্ত্রমাদায় তন্নস্তপতি দুষ্কৃতম্
34.11
অথৈনামন্ববেক্ষস্ব মৃগচর্যামিবাত্মনঃ
অবীরাচরিতাং রাজন্ন বলস্থৈর্নিষেবিতাম্
34.12
যাং ন কৃষ্ণো ন বীভত্সুর্নাভিমন্যুর্ন সৃঞ্জয়ঃ
ন চাহমভিনন্দামি ন চ মাদ্রীসুতাবুভৌ
34.13
ভবান্ধর্মো ধর্ম ইতি সততং ব্রতকর্শিতঃ
কচ্চিদ্রাজন্ন নির্বেদাদাপন্নঃ ক্লীবজীবিকাম্
34.14
দুর্মনুষ্যা হি নির্বেদমফলং সর্বঘাতিনম্
অশক্তাঃ শ্রিয়মাহর্তুমাত্মনঃ কুর্বতে প্রিয়ম্
34.15
স ভবান্দৃষ্টিমাঞ্শক্তঃ পশ্যন্নাত্মনি পৌরুষম্
আনৃশংস্যপরো রাজন্নানর্থমববুধ্যসে
34.16
অস্মানমী ধার্তরাষ্ট্রাঃ ক্ষমমাণানলং সতঃ
অশক্তানেব মন্যন্তে তদ্দুঃখং নাহবে বধঃ
34.17
তত্র চেদ্যুধ্যমানানামজিহ্মমনিবর্তিনাম্
সর্বশো হি বধঃ শ্রেয়ান্প্রেত্য লোকাঁল্লভেমহি
34.18
অথ বা বয়মেবৈতান্নিহত্য ভরতর্ষভ
আদদীমহি গাং সর্বাং তথাপি শ্রেয় এব নঃ
34.19
সর্বথা কার্যমেতন্নঃ স্বধর্মমনুতিষ্ঠতাম্
কাঙ্ক্ষতাং বিপুলাং কীর্তিং বৈরং প্রতিচিকীর্ষতাম্
34.20
আত্মার্থং যুধ্যমানানাং বিদিতে কৃত্যলক্ষণে
অন্যৈরপহৃতে রাজ্যে প্রশংসৈব ন গর্হণা
34.21
কর্শনার্থো হি যো ধর্মো মিত্রাণামাত্মনস্তথা
ব্যসনং নাম তদ্রাজন্ন স ধর্মঃ কুধর্ম তৎ
34.22
সর্বথা ধর্মনিত্যং তু পুরুষং ধর্মদুর্বলম্
জহতস্তাত ধর্মার্থৌ প্রেতং দুঃখসুখে যথা
34.23
যস্য ধর্মো হি ধর্মার্থং ক্লেশভাঙ্ন স পণ্ডিতঃ
ন স ধর্মস্য বেদার্থং সূর্যস্যান্ধঃ প্রভামিব
34.24
যস্য চার্থার্থমেবার্থঃ স চ নার্থস্য কোবিদঃ
রক্ষতে ভৃতকোঽরণ্যং যথা স্যাত্তাদৃগেব সঃ
34.25
অতিবেলং হি যোঽর্থার্থী নেতরাবনুতিষ্ঠতি
স বধ্যঃ সর্বভূতানাং ব্রহ্মহেব জুগুপ্সিতঃ
34.26
সততং যশ্চ কামার্থী নেতরাবনুতিষ্ঠতি
মিত্রাণি তস্য নশ্যন্তি ধর্মার্থাভ্যাং চ হীয়তে
34.27
তস্য ধর্মার্থহীনস্য কামান্তে নিধনং ধ্রুবম্
কামতো রমমাণস্য মীনস্যেবাম্ভসঃ ক্ষয়ে
34.28
তস্মাদ্ধর্মার্থয়োর্নিত্যং ন প্রমাদ্যন্তি পণ্ডিতাঃ
প্রকৃতিঃ সা হি কামস্য পাবকস্যারণির্যথা
34.29
সর্বথা ধর্মমূলোঽর্থো ধর্মশ্চার্থপরিগ্রহঃ
ইতরেতরয়োনী তৌ বিদ্ধি মেঘোদধী যথা
34.30
দ্রব্যার্থস্পর্শসংয়োগে যা প্রীতিরুপজায়তে
স কামশ্চিত্তসংকল্পঃ শরীরং নাস্য বিদ্যতে
34.31
অর্থার্থী পুরুষো রাজন্বৃহন্তং ধর্মমৃচ্ছতি
অর্থমৃচ্ছতি কামার্থী ন কামাদন্যমৃচ্ছতী
34.32
ন হি কামেন কামোঽন্যঃ সাধ্যতে ফলমেব তৎ
উপয়োগাত্ফলস্যেব কাষ্ঠাদ্ভস্মেব পণ্ডিতঃ
34.33
ইমাঞ্শকুনিকান্রাজন্হন্তি বৈতংসিকো যথা
এতদ্রূপমধর্মস্য ভূতেষু চ বিহিংসতাম্
34.34
কামাল্লোভাচ্চ ধর্মস্য প্রবৃত্তিং যো ন পশ্যতি
স বধ্যঃ সর্বভূতানাং প্রেত্য চেহ চ দুর্মতিঃ
34.35
ব্যক্তং তে বিদিতো রাজন্নর্থো দ্রব্যপরিগ্রহঃ
প্রকৃতিং চাপি বেত্থাস্য বিকৃতিং চাপি ভূয়সীম্
34.36
তস্য নাশং বিনাশং বা জরয়া মরণেন বা
অনর্থমিতি মন্যন্তে সোঽয়মস্মাসু বর্ততে
34.37
ইন্দ্রিয়াণাং চ পঞ্চানাং মনসো হৃদয়স্য চ
বিষয়ে বর্তমানানাং যা প্রীতিরুপজায়তে
স কাম ইতি মে বুদ্ধিঃ কর্মণাং ফলমুত্তমম্
34.38
এবমেব পৃথগ্দৃষ্ট্বা ধর্মার্থৌ কামমেব চ
ন ধর্মপর এব স্যান্ন চার্থপরমো নরঃ
ন কামপরমো বা স্যাত্সর্বান্সেবেত সর্বদা
34.39
ধর্মং পূর্বং ধনং মধ্যে জঘন্যে কামমাচরেৎ
অহন্যনুচরেদেবমেষ শাস্ত্রকৃতো বিধিঃ
34.40
কামং পূর্বং ধনং মধ্যে জঘন্যে ধর্মমাচরেৎ
বয়স্যনুচরেদেবমেষ শাস্ত্রকৃতো বিধিঃ
34.41
ধর্মং চার্থং চ কামং চ যথাবদ্বদতাং বর
বিভজ্য কালে কালজ্ঞঃ সর্বান্সেবেত পণ্ডিতঃ
34.42
মোক্ষো বা পরমং শ্রেয় এষ রাজন্সুখার্থিনাম্
প্রাপ্তির্বা বুদ্ধিমাস্থায় সোপায়ং কুরুনন্দন
34.43
তদ্বাশু ক্রিয়তাং রাজন্প্রাপ্তির্বাপ্যধিগম্যতাম্
জীবিতং হ্যাতুরস্যেব দুঃখমন্তরবর্তিনঃ
34.44
বিদিতশ্চৈব তে ধর্মঃ সততং চরিতশ্চ তে
জানতে ত্বয়ি শংসন্তি সুহৃদঃ কর্মচোদনাম্
34.45
দানং যজ্ঞঃ সতাং পূজা বেদধারণমার্জবম্
এষ ধর্মঃ পরো রাজন্ফলবান্প্রেত্য চেহ চ
34.46
এষ নার্থবিহীনেন শক্যো রাজন্নিষেবিতুম্
অখিলাঃ পুরুষব্যাঘ্র গুণাঃ স্যুর্যদ্যপীতরে
34.47
ধর্মমূলং জগদ্রাজন্নান্যদ্ধর্মাদ্বিশিষ্যতে
ধর্মশ্চার্থেন মহতা শক্যো রাজন্নিষেবিতুম্
34.48
ন চার্থো ভৈক্ষচর্যেণ নাপি ক্লৈব্যেন কর্হিচিৎ
বেত্তুং শক্যঃ সদা রাজন্কেবলং ধর্মবুদ্ধিনা
34.49
প্রতিষিদ্ধা হি তে যাচ্ঞা যয়া সিধ্যতি বৈ দ্বিজঃ
তেজসৈবার্থলিপ্সায়াং যতস্ব পুরুষর্ষভ
34.50
ভৈক্ষচর্যা ন বিহিতা ন চ বিট্শূদ্রজীবিকা
ক্ষত্রিয়স্য বিশেষেণ ধর্মস্তু বলমৌরসম্
34.51
উদারমেব বিদ্বাংসো ধর্মং প্রাহুর্মনীষিণঃ
উদারং প্রতিপদ্যস্ব নাবরে স্থাতুমর্হসি
34.52
অনুবুধ্যস্ব রাজেন্দ্র বেত্থ ধর্মান্সনাতনান্
ক্রূরকর্মাভিজাতোঽসি যস্মাদুদ্বিজতে জনঃ
34.53
প্রজাপালনসংভূতং ফলং তব ন গর্হিতম্
এষ তে বিহিতো রাজন্ধাত্রা ধর্মঃ সনাতনঃ
34.54
তস্মাদ্বিচলিতঃ পার্থ লোকে হাস্যং গমিষ্যসি
স্বধর্মাদ্ধি মনুষ্যাণাং চলনং ন প্রশস্যতে
34.55
স ক্ষাত্রং হৃদয়ং কৃত্বা ত্যক্ত্বেদং শিথিলং মনঃ
বীর্যমাস্থায় কৌন্তেয় ধুরমুদ্বহ ধুর্যবৎ
34.56
ন হি কেবলধর্মাত্মা পৃথিবীং জাতু কশ্চন
পার্থিবো ব্যজয়দ্রাজন্ন ভূতিং ন পুনঃ শ্রিয়ম্
34.57
জিহ্বাং দত্ত্বা বহূনাং হি ক্ষুদ্রাণাং লুব্ধচেতসাম্
নিকৃত্যা লভতে রাজ্যমাহারমিব শল্যকঃ
34.58
ভ্রাতরঃ পূর্বজাতাশ্চ সুসমৃদ্ধাশ্চ সর্বশঃ
নিকৃত্যা নির্জিতা দেবৈরসুরাঃ পাণ্ডবর্ষভ
34.59
এবং বলবতঃ সর্বমিতি বুদ্ধ্বা মহীপতে
জহি শত্রূন্মহাবাহো পরাং নিকৃতিমাস্থিতঃ
34.60
ন হ্যর্জুনসমঃ কশ্চিদ্যুধি যোদ্ধা ধনুর্ধরঃ
ভবিতা বা পুমান্কশ্চিন্মত্সমো বা গদাধরঃ
34.61
সত্ত্বেন কুরুতে যুদ্ধং রাজন্সুবলবানপি
ন প্রমাণেন নোত্সাহাত্সত্ত্বস্থো ভব পাণ্ডব
34.62
সত্ত্বং হি মূলমর্থস্য বিতথং যদতোঽন্যথা
ন তু প্রসক্তং ভবতি বৃক্ষচ্ছায়েব হৈমনী
34.63
অর্থত্যাগো হি কার্যঃ স্যাদর্থং শ্রেয়াংসমিচ্ছতা
বীজৌপম্যেন কৌন্তেয় মা তে ভূদত্র সংশয়ঃ
34.64
অর্থেন তু সমোঽনর্থো যত্র লভ্যেত নোদয়ঃ
ন তত্র বিপণঃ কার্যঃ খরকণ্ডূয়িতং হি তৎ
34.65
এবমেব মনুষ্যেন্দ্র ধর্মং ত্যক্ত্বাল্পকং নরঃ
বৃহন্তং ধর্মমাপ্নোতি স বুদ্ধ ইতি নিশ্চিতঃ
34.66
অমিত্রং মিত্রসংপন্নং মিত্রৈর্ভিন্দন্তি পণ্ডিতাঃ
ভিন্নৈর্মিত্রৈঃ পরিত্যক্তং দুর্বলং কুরুতে বশে
34.67
সত্ত্বেন কুরুতে যুদ্ধং রাজন্সুবলবানপি
নোদ্যমেন ন হোত্রাভিঃ সর্বাঃ স্বীকুরুতে প্রজাঃ
34.68
সর্বথা সংহতৈরেব দুর্বলৈর্বলবানপি
অমিত্রঃ শক্যতে হন্তুং মধুহা ভ্রমরৈরিব
34.69
যথা রাজন্প্রজাঃ সর্বাঃ সূর্যঃ পাতি গভস্তিভিঃ
অত্তি চৈব তথৈব ত্বং সবিতুঃ সদৃশো ভব
34.70
এতদ্ধ্যপি তপো রাজন্পুরাণমিতি নঃ শ্রুতম্
বিধিনা পালনং ভূমের্যত্কৃতং নঃ পিতামহৈঃ
34.71
অপেয়াত্কিল ভাঃ সূর্যাল্লক্ষ্মীশ্চন্দ্রমসস্তথা
ইতি লোকো ব্যবসিতো দৃষ্ট্বেমাং ভবতো ব্যথাম্
34.72
ভবতশ্চ প্রশংসাভির্নিন্দাভিরিতরস্য চ
কথায়ুক্তাঃ পরিষদঃ পৃথগ্রাজন্সমাগতাঃ
34.73
ইদমভ্যধিকং রাজন্ব্রাহ্মণা গুরবশ্চ তে
সমেতাঃ কথয়ন্তীহ মুদিতাঃ সত্যসংধতাম্
34.74
যন্ন মোহান্ন কার্পণ্যান্ন লোভান্ন ভয়াদপি
অনৃতং কিংচিদুক্তং তে ন কামান্নার্থকারণাৎ
34.75
যদেনঃ কুরুতে কিংচিদ্রাজা ভূমিমবাপ্নুবন্
সর্বং তন্নুদতে পশ্চাদ্যজ্ঞৈর্বিপুলদক্ষিণৈঃ
34.76
ব্রাহ্মণেভ্যো দদদ্গ্রামান্গাশ্চ রাজন্সহস্রশঃ
মুচ্যতে সর্বপাপেভ্যস্তমোভ্য ইব চন্দ্রমাঃ
34.77
পৌরজানপদাঃ সর্বে প্রায়শঃ কুরুনন্দন
সবৃদ্ধবালাঃ সহিতাঃ শংসন্তি ত্বাং যুধিষ্ঠির
34.78
শ্বদৃতৌ ক্ষীরমাসক্তং ব্রহ্ম বা বৃষলে যথা
সত্যং স্তেনে বলং নার্যাং রাজ্যং দুর্যোধনে তথা
34.79
ইতি নির্বচনং লোকে চিরং চরতি ভারত
অপি চৈতত্স্ত্রিয়ো বালাঃ স্বাধ্যায়মিব কুর্বতে
34.80
স ভবান্রথমাস্থায় সর্বোপকরণান্বিতম্
ত্বরমাণোঽভিনির্যাতু চিরমর্থোপপাদকম্
34.81
বাচয়িত্বা দ্বিজশ্রেষ্ঠানদ্যৈব গজসাহ্বয়ম্
অস্ত্রবিদ্ভিঃ পরিবৃতো ভ্রাতৃভির্দৃঢধন্বিভিঃ
আশীবিষসমৈর্বীরৈর্মরুদ্ভিরিব বৃত্রহা
34.82
অমিত্রাংস্তেজসা মৃদ্নন্নসুরেভ্য ইবারিহা
শ্রিয়মাদত্স্ব কৌন্তেয় ধার্তরাষ্ট্রান্মহাবল
34.83
ন হি গাণ্ডীবমুক্তানাং শরাণাং গার্ধ্রবাসসাম্
স্পর্শমাশীবিষাভানাং মর্ত্যঃ কশ্চন সংসহেৎ
34.84
ন স বীরো ন মাতঙ্গো ন সদশ্বোঽস্তি ভারত
যঃ সহেত গদাবেগং মম ক্রুদ্ধস্য সংয়ুগে
34.85
সৃঞ্জয়ৈঃ সহ কৈকেয়ৈর্বৃষ্ণীনামৃষভেণ চ
কথং স্বিদ্যুধি কৌন্তেয় রাজ্যং ন প্রাপ্নুয়ামহে