Utshovঅধ্যায় 33
33.1
দ্রৌপদ্যুবাচ
নাবমন্যে ন গর্হে চ ধর্মং পার্থ কথংচন
ঈশ্বরং কুত এবাহমবমংস্যে প্রজাপতিম্
33.2
আর্তাহং প্রলপামীদমিতি মাং বিদ্ধি ভারত
ভূয়শ্চ বিলপিষ্যামি সুমনাস্তন্নিবোধ মে
33.3
কর্ম খল্বিহ কর্তব্যং জাতেনামিত্রকর্শন
অকর্মাণো হি জীবন্তি স্থাবরা নেতরে জনাঃ
33.4
আ মাতৃস্তনপানাচ্চ যাবচ্ছয্যোপসর্পণম্
জঙ্গমাঃ কর্মণা বৃত্তিমাপ্নুবন্তি যুধিষ্ঠির
33.5
জঙ্গমেষু বিশেষেণ মনুষ্যা ভরতর্ষভ
ইচ্ছন্তি কর্মণা বৃত্তিমবাপ্তুং প্রেত্য চেহ চ
33.6
উত্থানমভিজানন্তি সর্বভূতানি ভারত
প্রত্যক্ষং ফলমশ্নন্তি কর্মণাং লোকসাক্ষিকম্
33.7
পশ্যামি স্বং সমুত্থানমুপজীবন্তি জন্তবঃ
অপি ধাতা বিধাতা চ যথায়মুদকে বকঃ
33.8
স্বকর্ম কুরু মা গ্লাসীঃ কর্মণা ভব দংশিতঃ
কৃত্যং হি যোঽভিজানাতি সহস্রে নাস্তি সোঽস্তি বা
33.9
তস্য চাপি ভবেত্কার্যং বিবৃদ্ধৌ রক্ষণে তথা
ভক্ষ্যমাণো হ্যনাবাপঃ ক্ষীয়তে হিমবানপি
33.10
উত্সীদেরন্প্রজাঃ সর্বা ন কুর্যুঃ কর্ম চেদ্যদি
অপি চাপ্যফলং কর্ম পশ্যামঃ কুর্বতো জনান্
নান্যথা হ্যভিজানন্তি বৃত্তিং লোকে কথংচন
33.11
যশ্চ দিষ্টপরো লোকে যশ্চায়ং হঠবাদকঃ
উভাবপসদাবেতৌ কর্মবুদ্ধিঃ প্রশস্যতে
33.12
যো হি দিষ্টমুপাসীনো নির্বিচেষ্টঃ সুখং স্বপেৎ
অবসীদেত্সুদুর্বুদ্ধিরামো ঘট ইবাম্ভসি
33.13
তথৈব হঠবুদ্ধির্যঃ শক্তঃ কর্মণ্যকর্মকৃৎ
আসীত ন চিরং জীবেদনাথ ইব দুর্বলঃ
33.14
অকস্মাদপি যঃ কশ্চিদর্থং প্রাপ্নোতি পূরুষঃ
তং হঠেনেতি মন্যন্তে স হি যত্নো ন কস্যচিৎ
33.15
যচ্চাপি কিংচিত্পুরুষো দিষ্টং নাম লভত্যুত
দৈবেন বিধিনা পার্থ তদ্দৈবমিতি নিশ্চিতম্
33.16
যত্স্বয়ং কর্মণা কিংচিত্ফলমাপ্নোতি পূরুষঃ
প্রত্যক্ষং চক্ষুষা দৃষ্টং তত্পৌরুষমিতি স্মৃতম্
33.17
স্বভাবতঃ প্রবৃত্তোঽন্যঃ প্রাপ্নোত্যর্থানকারণাৎ
তত্স্বভাবাত্মকং বিদ্ধি ফলং পুরুষসত্তম
33.18
এবং হঠাচ্চ দৈবাচ্চ স্বভাবাত্কর্মণস্তথা
যানি প্রাপ্নোতি পুরুষস্তত্ফলং পূর্বকর্মণঃ
33.19
ধাতাপি হি স্বকর্মৈব তৈস্তৈর্হেতুভিরীশ্বরঃ
বিদধাতি বিভজ্যেহ ফলং পূর্বকৃতং নৃণাম্
33.20
যদ্ধ্যয়ং পুরুষঃ কিংচিত্কুরুতে বৈ শুভাশুভম্
তদ্ধাতৃবিহিতং বিদ্ধি পূর্বকর্মফলোদয়ম্
33.21
কারণং তস্য দেহোঽয়ং ধাতুঃ কর্মণি কর্মণি
স যথা প্রেরয়ত্যেনং তথায়ং কুরুতেঽবশঃ
33.22
তেষু তেষু হি কৃত্যেষু বিনিয়োক্তা মহেশ্বরঃ
সর্বভূতানি কৌন্তেয় কারয়ত্যবশান্যপি
33.23
মনসার্থান্বিনিশ্চিত্য পশ্চাত্প্রাপ্নোতি কর্মণা
বুদ্ধিপূর্বং স্বয়ং ধীরঃ পুরুষস্তত্র কারণম্
33.24
সংখ্যাতুং নৈব শক্যানি কর্মাণি পুরুষর্ষভ
অগারনগরাণাং হি সিদ্ধিঃ পুরুষহৈতুকী
33.25
তিলে তৈলং গবি ক্ষীরং কাষ্ঠে পাবকমন্ততঃ
ধিয়া ধীরো বিজানীয়াদুপায়ং চাস্য সিদ্ধয়ে
33.26
ততঃ প্রবর্ততে পশ্চাত্করণেষ্বস্য সিদ্ধয়ে
তাং সিদ্ধিমুপজীবন্তি কর্মণামিহ জন্তবঃ
33.27
কুশলেন কৃতং কর্ম কর্ত্রা সাধু বিনিশ্চিতম্
ইদং ত্বকুশলেনেতি বিশেষাদুপলভ্যতে
33.28
ইষ্টাপূর্তফলং ন স্যান্ন শিষ্যো ন গুরুর্ভবেৎ
পুরুষঃ কর্মসাধ্যেষু স্যাচ্চেদয়মকারণম্
33.29
কর্তৃত্বাদেব পুরুষঃ কর্মসিদ্ধৌ প্রশস্যতে
অসিদ্ধৌ নিন্দ্যতে চাপি কর্মনাশঃ কথং ত্বিহ
33.30
সর্বমেব হঠেনৈকে দিষ্টেনৈকে বদন্ত্যুত
পুরুষপ্রয়ত্নজং কেচিত্ত্রৈধমেতন্নিরুচ্যতে
33.31
ন চৈবৈতাবতা কার্যং মন্যন্ত ইতি চাপরে
অস্তি সর্বমদৃশ্যং তু দিষ্টং চৈব তথা হঠঃ
দৃশ্যতে হি হঠাচ্চৈব দিষ্টাচ্চার্থস্য সংততিঃ
33.32
কিংচিদ্দৈবাদ্ধঠাত্কিংচিত্কিংচিদেব স্বকর্মতঃ
পুরুষঃ ফলমাপ্নোতি চতুর্থং নাত্র কারণম্
কুশলাঃ প্রতিজানন্তি যে তত্ত্ববিদুষো জনাঃ
33.33
তথৈব ধাতা ভূতানামিষ্টানিষ্টফলপ্রদঃ
যদি ন স্যান্ন ভূতানাং কৃপণো নাম কশ্চন
33.34
যং যমর্থমভিপ্রেপ্সুঃ কুরুতে কর্ম পূরুষঃ
তত্তত্সফলমেব স্যাদ্যদি ন স্যাত্পুরাকৃতম্
33.35
ত্রিদ্বারামর্থসিদ্ধিং তু নানুপশ্যন্তি যে নরাঃ
তথৈবানর্থসিদ্ধিং চ যথা লোকাস্তথৈব তে
33.36
কর্তব্যং ত্বেব কর্মেতি মনোরেষ বিনিশ্চয়ঃ
একান্তেন হ্যনীহোঽয়ং পরাভবতি পূরুষঃ
33.37
কুর্বতো হি ভবত্যেব প্রায়েণেহ যুধিষ্ঠির
একান্তফলসিদ্ধিং তু ন বিন্দত্যলসঃ ক্বচিৎ
33.38
অসংভবে ত্বস্য হেতুঃ প্রায়শ্চিত্তং তু লক্ষ্যতে
কৃতে কর্মণি রাজেন্দ্র তথানৃণ্যমবাপ্যতে
33.39
অলক্ষ্মীরাবিশত্যেনং শয়ানমলসং নরম্
নিঃসংশয়ং ফলং লব্ধ্বা দক্ষো ভূতিমুপাশ্নুতে
33.40
অনর্থং সংশয়াবস্থং বৃণ্বতে মুক্তসংশয়াঃ
ধীরা নরাঃ কর্মরতা ন তু নিঃসংশয়ং ক্বচিৎ
33.41
একান্তেন হ্যনর্থোঽয়ং বর্ততেঽস্মাসু সাংপ্রতম্
ন তু নিঃসংশয়ং ন স্যাত্ত্বয়ি কর্মণ্যবস্থিতে
33.42
অথ বা সিদ্ধিরেব স্যান্মহিমা তু তথৈব তে
বৃকোদরস্য বীভত্সোর্ভ্রাত্রোশ্চ যময়োরপি
33.43
অন্যেষাং কর্ম সফলমস্মাকমপি বা পুনঃ
বিপ্রকর্ষেণ বুধ্যেত কৃতকর্মা যথা ফলম্
33.44
পৃথিবীং লাঙ্গলেনৈব ভিত্ত্বা বীজং বপত্যুত
আস্তেঽথ কর্ষকস্তূষ্ণীং পর্জন্যস্তত্র কারণম্
33.45
বৃষ্টিশ্চেন্নানুগৃহ্ণীয়াদনেনাস্তত্র কর্ষকঃ
যদন্যঃ পুরুষঃ কুর্যাত্কৃতং তত্সকলং ময়া
33.46
তচ্চেদফলমস্মাকং নাপরাধোঽস্তি নঃ ক্বচিৎ
ইতি ধীরোঽন্ববেক্ষ্যৈব নাত্মানং তত্র গর্হয়েৎ
33.47
কুর্বতো নার্থসিদ্ধির্মে ভবতীতি হ ভারত
নির্বেদো নাত্র গন্তব্যো দ্বাবেতৌ হ্যস্য কর্মণঃ
সিদ্ধির্বাপ্যথ বাসিদ্ধিরপ্রবৃত্তিরতোঽন্যথা
33.48
বহূনাং সমবায়ে হি ভাবানাং কর্ম সিধ্যতি
গুণাভাবে ফলং ন্যূনং ভবত্যফলমেব বা
অনারম্ভে তু ন ফলং ন গুণো দৃশ্যতেঽচ্যুত
33.49
দেশকালাবুপায়াংশ্চ মঙ্গলং স্বস্তি বৃদ্ধয়ে
যুনক্তি মেধয়া ধীরো যথাশক্তি যথাবলম্
33.50
অপ্রমত্তেন তত্কার্যমুপদেষ্টা পরাক্রমঃ
ভূয়িষ্ঠং কর্ময়োগেষু সর্ব এব পরাক্রমঃ
33.51
যং তু ধীরোঽন্ববেক্ষেত শ্রেয়াংসং বহুভির্গুণৈঃ
সাম্নৈবার্থং ততো লিপ্সেত্কর্ম চাস্মৈ প্রয়োজয়েৎ
33.52
ব্যসনং বাস্য কাঙ্ক্ষেত বিনাশং বা যুধিষ্ঠির
অপি সিন্ধোর্গিরের্বাপি কিং পুনর্মর্ত্যধর্মিণঃ
33.53
উত্থানয়ুক্তঃ সততং পরেষামন্তরৈষণে
আনৃণ্যমাপ্নোতি নরঃ পরস্যাত্মন এব চ
33.54
ন চৈবাত্মাবমন্তব্যঃ পুরুষেণ কদাচন
ন হ্যাত্মপরিভূতস্য ভূতির্ভবতি ভারত
33.55
এবং সংস্থিতিকা সিদ্ধিরিয়ং লোকস্য ভারত
চিত্রা সিদ্ধিগতিঃ প্রোক্তা কালাবস্থাবিভাগতঃ
33.56
ব্রাহ্মণং মে পিতা পূর্বং বাসয়ামাস পণ্ডিতম্
সোঽস্মা অর্থমিমং প্রাহ পিত্রে মে ভরতর্ষভ
33.57
নীতিং বৃহস্পতিপ্রোক্তাং ভ্রাতৄন্মেঽগ্রাহয়ত্পুরা
তেষাং সাংকথ্যমশ্রৌষমহমেতত্তদা গৃহে
33.58
স মাং রাজন্কর্মবতীমাগতামাহ সান্ত্বয়ন্
শুশ্রূষমাণামাসীনাং পিতুরঙ্কে যুধিষ্ঠির