Utshovঅধ্যায় 32
32.1
যুধিষ্ঠির উবাচ
বল্গু চিত্রপদং শ্লক্ষ্ণং যাজ্ঞসেনি ত্বয়া বচঃ
উক্তং তচ্ছ্রুতমস্মাভির্নাস্তিক্যং তু প্রভাষসে
32.2
নাহং ধর্মফলান্বেষী রাজপুত্রি চরাম্যুত
দদামি দেয়মিত্যেব যজে যষ্টব্যমিত্যুত
32.3
অস্তু বাত্র ফলং মা বা কর্তব্যং পুরুষেণ যৎ
গৃহানাবসতা কৃষ্ণে যথাশক্তি করোমি তৎ
32.4
ধর্মং চরামি সুশ্রোণি ন ধর্মফলকারণাৎ
আগমাননতিক্রম্য সতাং বৃত্তমবেক্ষ্য চ
ধর্ম এব মনঃ কৃষ্ণে স্বভাবাচ্চৈব মে ধৃতম্
32.5
ন ধর্মফলমাপ্নোতি যো ধর্মং দোগ্ধুমিচ্ছতি
যশ্চৈনং শঙ্কতে কৃত্বা নাস্তিক্যাত্পাপচেতনঃ
32.6
অতিবাদান্মদাচ্চৈব মা ধর্মমতিশঙ্কিথাঃ
ধর্মাতিশঙ্কী পুরুষস্তির্যগ্গতিপরায়ণঃ
32.7
ধর্মো যস্যাতিশঙ্ক্যঃ স্যাদার্ষং বা দুর্বলাত্মনঃ
বেদাচ্ছূদ্র ইবাপেয়াত্স লোকাদজরামরাৎ
32.8
বেদাধ্যায়ী ধর্মপরঃ কুলে জাতো যশস্বিনি
স্থবিরেষু স যোক্তব্যো রাজভির্ধর্মচারিভিঃ
32.9
পাপীয়ান্হি স শূদ্রেভ্যস্তস্করেভ্যো বিশেষতঃ
শাস্ত্রাতিগো মন্দবুদ্ধির্যো ধর্মমতিশঙ্কতে
32.10
প্রত্যক্ষং হি ত্বয়া দৃষ্ট ঋষির্গচ্ছন্মহাতপাঃ
মার্কণ্ডেয়োঽপ্রমেয়াত্মা ধর্মেণ চিরজীবিতাম্
32.11
ব্যাসো বসিষ্ঠো মৈত্রেয়ো নারদো লোমশঃ শুকঃ
অন্যে চ ঋষয়ঃ সিদ্ধা ধর্মেণৈব সুচেতসঃ
32.12
প্রত্যক্ষং পশ্যসি হ্যেতান্দিব্যয়োগসমন্বিতান্
শাপানুগ্রহণে শক্তান্দেবৈরপি গরীয়সঃ
32.13
এতে হি ধর্মমেবাদৌ বর্ণয়ন্তি সদা মম
কর্তব্যমমরপ্রখ্যাঃ প্রত্যক্ষাগমবুদ্ধয়ঃ
32.14
অতো নার্হসি কল্যাণি ধাতারং ধর্মমেব চ
রজোমূঢেন মনসা ক্ষেপ্তুং শঙ্কিতুমেব চ
32.15
ধর্মাতিশঙ্কী নান্যস্মিন্প্রমাণমধিগচ্ছতি
আত্মপ্রমাণ উন্নদ্ধঃ শ্রেয়সো হ্যবমন্যকঃ
32.16
ইন্দ্রিয়প্রীতিসংবদ্ধং যদিদং লোকসাক্ষিকম্
এতাবান্মন্যতে বালো মোহমন্যত্র গচ্ছতি
32.17
প্রায়শ্চিত্তং ন তস্যাস্তি যো ধর্মমতিশঙ্কতে
ধ্যায়ন্স কৃপণঃ পাপো ন লোকান্প্রতিপদ্যতে
32.18
প্রমাণান্যতিবৃত্তো হি বেদশাস্ত্রার্থনিন্দকঃ
কামলোভানুগো মূঢো নরকং প্রতিপদ্যতে
32.19
যস্তু নিত্যং কৃতমতির্ধর্মমেবাভিপদ্যতে
অশঙ্কমানঃ কল্যাণি সোঽমুত্রানন্ত্যমশ্নুতে
32.20
আর্ষং প্রমাণমুত্ক্রম্য ধর্মানপরিপালয়ন্
সর্বশাস্ত্রাতিগো মূঢঃ শং জন্মসু ন বিন্দতি
32.21
শিষ্টৈরাচরিতং ধর্মং কৃষ্ণে মা স্মাতিশঙ্কিথাঃ
পুরাণমৃষিভিঃ প্রোক্তং সর্বজ্ঞৈঃ সর্বদর্শিভিঃ
32.22
ধর্ম এব প্লবো নান্যঃ স্বর্গং দ্রৌপদি গচ্ছতাম্
সৈব নৌঃ সাগরস্যেব বণিজঃ পারমৃচ্ছতঃ
32.23
অফালো যদি ধর্মঃ স্যাচ্চরিতো ধর্মচারিভিঃ
অপ্রতিষ্ঠে তমস্যেতজ্জগন্মজ্জেদনিন্দিতে
32.24
নির্বাণং নাধিগচ্ছেয়ুর্জীবেয়ুঃ পশুজীবিকাম্
বিঘাতেনৈব যুজ্যেয়ুর্ন চার্থং কিংচিদাপ্নুয়ুঃ
32.25
তপশ্চ ব্রহ্মচর্যং চ যজ্ঞঃ স্বাধ্যায় এব চ
দানমার্জবমেতানি যদি স্যুরফলানি বৈ
32.26
নাচরিষ্যন্পরে ধর্মং পরে পরতরে চ যে
বিপ্রলম্ভোঽয়মত্যন্তং যদি স্যুরফলাঃ ক্রিয়াঃ
32.27
ঋষয়শ্চৈব দেবাশ্চ গন্ধর্বাসুররাক্ষসাঃ
ঈশ্বরাঃ কস্য হেতোস্তে চরেয়ুর্ধর্মমাদৃতাঃ
32.28
ফলদং ত্বিহ বিজ্ঞায় ধাতারং শ্রেয়সি ধ্রুবে
ধর্মং তে হ্যাচরন্কৃষ্ণে তদ্ধি ধর্মসনাতনম্
32.29
স চায়ং সফলো ধর্মো ন ধর্মোঽফল উচ্যতে
দৃশ্যন্তেঽপি হি বিদ্যানাং ফলানি তপসাং তথা
32.30
ত্বয্যেতদ্বৈ বিজানীহি জন্ম কৃষ্ণে যথা শ্রুতম্
বেত্থ চাপি যথা জাতো ধৃষ্টদ্যুম্নঃ প্রতাপবান্
32.31
এতাবদেব পর্যাপ্তমুপমানং শুচিস্মিতে
কর্মণাং ফলমস্তীতি ধীরোঽল্পেনাপি তুষ্যতি
32.32
বহুনাপি হ্যবিদ্বাংসো নৈব তুষ্যন্ত্যবুদ্ধয়ঃ
তেষাং ন ধর্মজং কিংচিত্প্রেত্য শর্মাস্তি কর্ম বা
32.33
কর্মণামুত পুণ্যানাং পাপানাং চ ফলোদয়ঃ
প্রভবশ্চাপ্যয়শ্চৈব দেবগুহ্যানি ভামিনি
32.34
নৈতানি বেদ যঃ কশ্চিন্মুহ্যন্ত্যত্র প্রজা ইমাঃ
রক্ষ্যাণ্যেতানি দেবানাং গূঢমায়া হি দেবতাঃ
32.35
কৃশাঙ্গাঃ সুব্রতাশ্চৈব তপসা দগ্ধকিল্বিষাঃ
প্রসন্নৈর্মানসৈর্যুক্তাঃ পশ্যন্ত্যেতানি বৈ দ্বিজাঃ
32.36
ন ফলাদর্শনাদ্ধর্মঃ শঙ্কিতব্যো ন দেবতাঃ
যষ্টব্যং চাপ্রমত্তেন দাতব্যং চানসূয়তা
32.37
কর্মণাং ফলমস্তীতি তথৈতদ্ধর্ম শাশ্বতম্
ব্রহ্মা প্রোবাচ পুত্রাণাং যদৃষির্বেদ কশ্যপঃ
32.38
তস্মাত্তে সংশয়ঃ কৃষ্ণে নীহার ইব নশ্যতু
ব্যবস্য সর্বমস্তীতি নাস্তিক্যং ভাবমুত্সৃজ
32.39
ঈশ্বরং চাপি ভূতানাং ধাতারং মা বিচিক্ষিপঃ
শিক্ষস্বৈনং নমস্বৈনং মা তে ভূদ্বুদ্ধিরীদৃশী
32.40
যস্য প্রসাদাত্তদ্ভক্তো মর্ত্যো গচ্ছত্যমর্ত্যতাম্
উত্তমং দৈবতং কৃষ্ণে মাতিবোচঃ কথংচন