Utshovঅধ্যায় 31
31.1
দ্রৌপদ্যুবাচ
নমো ধাত্রে বিধাত্রে চ যৌ মোহং চক্রতুস্তব
পিতৃপৈতামহে বৃত্তে বোঢব্যে তেঽন্যথা মতিঃ
31.2
নেহ ধর্মানৃশংস্যাভ্যাং ন ক্ষান্ত্যা নার্জবেন চ
পুরুষঃ শ্রিয়মাপ্নোতি ন ঘৃণিত্বেন কর্হিচিৎ
31.3
ত্বাং চেদ্ব্যসনমভ্যাগাদিদং ভারত দুঃসহম্
যত্ত্বং নার্হসি নাপীমে ভ্রাতরস্তে মহৌজসঃ
31.4
ন হি তেঽধ্যগমঞ্জাতু তদানীং নাদ্য ভারত
ধর্মাত্প্রিয়তরং কিংচিদপি চেজ্জীবিতাদিহ
31.5
ধর্মার্থমেব তে রাজ্যং ধর্মার্থং জীবিতং চ তে
ব্রাহ্মণা গুরবশ্চৈব জানন্ত্যপি চ দেবতাঃ
31.6
ভীমসেনার্জুনৌ চৈব মাদ্রেয়ৌ চ ময়া সহ
ত্যজেস্ত্বমিতি মে বুদ্ধির্ন তু ধর্মং পরিত্যজেঃ
31.7
রাজানং ধর্মগোপ্তারং ধর্মো রক্ষতি রক্ষিতঃ
ইতি মে শ্রুতমার্যাণাং ত্বাং তু মন্যে ন রক্ষতি
31.8
অনন্যা হি নরব্যাঘ্র নিত্যদা ধর্মমেব তে
বুদ্ধিঃ সততমন্বেতি ছায়েব পুরুষং নিজা
31.9
নাবমংস্থা হি সদৃশান্নাবরাঞ্শ্রেয়সঃ কুতঃ
অবাপ্য পৃথিবীং কৃত্স্নাং ন তে শৃঙ্গমবর্ধত
31.10
স্বাহাকারৈঃ স্বধাভিশ্চ পূজাভিরপি চ দ্বিজান্
দৈবতানি পিতৄংশ্চৈব সততং পার্থ সেবসে
31.11
ব্রাহ্মণাঃ সর্বকামৈস্তে সততং পার্থ তর্পিতাঃ
যতয়ো মোক্ষিণশ্চৈব গৃহস্থাশ্চৈব ভারত
31.12
আরণ্যকেভ্যো লৌহানি ভাজনানি প্রয়চ্ছসি
নাদেয়ং ব্রাহ্মণেভ্যস্তে গৃহে কিংচন বিদ্যতে
31.13
যদিদং বৈশ্বদেবান্তে সায়ংপ্রাতঃ প্রদীয়তে
তদ্দত্ত্বাতিথিভৃত্যেভ্যো রাজঞ্শেষেণ জীবসি
31.14
ইষ্টয়ঃ পশুবন্ধাশ্চ কাম্যনৈমিত্তিকাশ্চ যে
বর্তন্তে পাকয়জ্ঞাশ্চ যজ্ঞকর্ম চ নিত্যদা
31.15
অস্মিন্নপি মহারণ্যে বিজনে দস্যুসেবিতে
রাষ্ট্রাদপেত্য বসতো ধার্মস্তে নাবসীদতি
31.16
অশ্বমেধো রাজসূয়ঃ পুণ্ডরীকোঽথ গোসবঃ
এতৈরপি মহায়জ্ঞৈরিষ্টং তে ভূরিদক্ষিণৈঃ
31.17
রাজন্পরীতয়া বুদ্ধ্যা বিষমেঽক্ষপরাজয়ে
রাজ্যং বসূন্যায়ুধানি ভ্রাতৄন্মাং চাসি নির্জিতঃ
31.18
ঋজোর্মৃদোর্বদান্যস্য হ্রীমতঃ সত্যবাদিনঃ
কথমক্ষব্যসনজা বুদ্ধিরাপতিতা তব
31.19
অতীব মোহমায়াতি মনশ্চ পরিদূয়তে
নিশাম্য তে দুঃখমিদমিমাং চাপদমীদৃশীম্
31.20
অত্রাপ্যুদাহরন্তীমমিতিহাসং পুরাতনম্
ঈশ্বরস্য বশে লোকস্তিষ্ঠতে নাত্মনো যথা
31.21
ধাতৈব খলু ভূতানাং সুখদুঃখে প্রিয়াপ্রিয়ে
দধাতি সর্বমীশানঃ পুরস্তাচ্ছুক্রমুচ্চরন্
31.22
যথা দারুময়ী যোষা নরবীর সমাহিতা
ঈরয়ত্যঙ্গমঙ্গানি তথা রাজন্নিমাঃ প্রজাঃ
31.23
আকাশ ইব ভূতানি ব্যাপ্য সর্বাণি ভারত
ঈশ্বরো বিদধাতীহ কল্যাণং যচ্চ পাপকম্
31.24
শকুনিস্তন্তুবদ্ধো বা নিয়তোঽয়মনীশ্বরঃ
ঈশ্বরস্য বশে তিষ্ঠন্নান্যেষাং নাত্মনঃ প্রভুঃ
31.25
মণিঃ সূত্র ইব প্রোতো নস্যোত ইব গোবৃষঃ
ধাতুরাদেশমন্বেতি তন্ময়ো হি তদর্পণঃ
31.26
নাত্মাধীনো মনুষ্যোঽয়ং কালং ভবতি কংচন
স্রোতসো মধ্যমাপন্নঃ কূলাদ্বৃক্ষ ইব চ্যুতঃ
31.27
অজ্ঞো জন্তুরনীশোঽয়মাত্মনঃ সুখদুঃখয়োঃ
ঈশ্বরপ্রেরিতো গচ্ছেত্স্বর্গং নরকমেব চ
31.28
যথা বায়োস্তৃণাগ্রাণি বশং যান্তি বলীয়সঃ
ধাতুরেবং বশং যান্তি সর্বভূতানি ভারত
31.29
আর্যকর্মণি যুঞ্জানঃ পাপে বা পুনরীশ্বরঃ
ব্যাপ্য ভূতানি চরতে ন চায়মিতি লক্ষ্যতে
31.30
হেতুমাত্রমিদং ধাতুঃ শরীরং ক্ষেত্রসংজ্ঞিতম্
যেন কারয়তে কর্ম শুভাশুভফলং বিভুঃ
31.31
পশ্য মায়াপ্রভাবোঽয়মীশ্বরেণ যথা কৃতঃ
যো হন্তি ভূতৈর্ভূতানি মোহয়িত্বাত্মমায়য়া
31.32
অন্যথা পরিদৃষ্টানি মুনিভির্বেদদর্শিভিঃ
অন্যথা পরিবর্তন্তে বেগা ইব নভস্বতঃ
31.33
অন্যথৈব হি মন্যন্তে পুরুষাস্তানি তানি চ
অন্যথৈব প্রভুস্তানি করোতি বিকরোতি চ
31.34
যথা কাষ্ঠেন বা কাষ্ঠমশ্মানং চাশ্মনা পুনঃ
অয়সা চাপ্যয়শ্ছিন্দ্যান্নির্বিচেষ্টমচেতনম্
31.35
এবং স ভগবান্দেবঃ স্বয়ম্ভূঃ প্রপিতামহঃ
হিনস্তি ভূতৈর্ভূতানি ছদ্ম কৃত্বা যুধিষ্ঠির
31.36
সংপ্রয়োজ্য বিয়োজ্যায়ং কামকারকরঃ প্রভুঃ
ক্রীডতে ভগবান্ভূতৈর্বালঃ ক্রীডনকৈরিব
31.37
ন মাতৃপিতৃবদ্রাজন্ধাতা ভূতেষু বর্ততে
রোষাদিব প্রবৃত্তোঽয়ং যথায়মিতরো জনঃ
31.38
আর্যাঞ্শীলবতো দৃষ্ট্বা হ্রীমতো বৃত্তিকর্শিতান্
অনার্যান্সুখিনশ্চৈব বিহ্বলামীব চিন্তয়া
31.39
তবেমামাপদং দৃষ্ট্বা সমৃদ্ধিং চ সুয়োধনে
ধাতারং গর্হয়ে পার্থ বিষমং যোঽনুপশ্যতি
31.40
আর্যশাস্ত্রাতিগে ক্রূরে লুব্ধে ধর্মাপচায়িনি
ধার্তরাষ্ট্রে শ্রিয়ং দত্ত্বা ধাতা কিং ফলমশ্নুতে
31.41
কর্ম চেত্কৃতমন্বেতি কর্তারং নান্যমৃচ্ছতি
কর্মণা তেন পাপেন লিপ্যতে নূনমীশ্বরঃ
31.42
অথ কর্ম কৃতং পাপং ন চেত্কর্তারমৃচ্ছতি
কারণং বলমেবেহ জনাঞ্শোচামি দুর্বলান্