Utshovঅধ্যায় 30
30.1
যুধিষ্ঠির উবাচ
ক্রোধো হন্তা মনুষ্যাণাং ক্রোধো ভাবয়িতা পুনঃ
ইতি বিদ্ধি মহাপ্রাজ্ঞে ক্রোধমূলৌ ভবাভবৌ
30.2
যো হি সংহরতে ক্রোধং ভাবস্তস্য সুশোভনে
যঃ পুনঃ পুরুষঃ ক্রোধং নিত্যং ন সহতে শুভে
তস্যাভাবায় ভবতি ক্রোধঃ পরমদারুণঃ
30.3
ক্রোধমূলো বিনাশো হি প্রজানামিহ দৃশ্যতে
তত্কথং মাদৃশঃ ক্রোধমুত্সৃজেল্লোকনাশনম্
30.4
ক্রুদ্ধঃ পাপং নরঃ কুর্যাত্ক্রুদ্ধো হন্যাদ্গুরূনপি
ক্রুদ্ধঃ পরুষয়া বাচা শ্রেয়সোঽপ্যবমন্যতে
30.5
বাচ্যাবাচ্যে হি কুপিতো ন প্রজানাতি কর্হিচিৎ
নাকার্যমস্তি ক্রুদ্ধস্য নাবাচ্যং বিদ্যতে তথা
30.6
হিংস্যাত্ক্রোধাদবধ্যাংশ্চ বধ্যান্সংপূজয়েদপি
আত্মানমপি চ ক্রুদ্ধঃ প্রেষয়েদ্যমসাদনম্
30.7
এতান্দোষান্প্রপশ্যদ্ভির্জিতঃ ক্রোধো মনীষিভিঃ
ইচ্ছদ্ভিঃ পরমং শ্রেয় ইহ চামুত্র চোত্তমম্
30.8
তং ক্রোধং বর্জিতং ধীরৈঃ কথমস্মদ্বিধশ্চরেৎ
এতদ্দ্রৌপদি সংধায় ন মে মন্যুঃ প্রবর্ধতে
30.9
আত্মানং চ পরং চৈব ত্রায়তে মহতো ভয়াৎ
ক্রুধ্যন্তমপ্রতিক্রুধ্যন্দ্বয়োরেষ চিকিত্সকঃ
30.10
মূঢো যদি ক্লিশ্যমানঃ ক্রুধ্যতেঽশক্তিমান্নরঃ
বলীয়সাং মনুষ্যাণাং ত্যজত্যাত্মানমন্ততঃ
30.11
তস্যাত্মানং সংত্যজতো লোকা নশ্যন্ত্যনাত্মনঃ
তস্মাদ্দ্রৌপদ্যশক্তস্য মন্যোর্নিয়মনং স্মৃতম্
30.12
বিদ্বাংস্তথৈব যঃ শক্তঃ ক্লিশ্যমানো ন কুপ্যতি
স নাশয়িত্বা ক্লেষ্টারং পরলোকে চ নন্দতি
30.13
তস্মাদ্বলবতা চৈব দুর্বলেন চ নিত্যদা
ক্ষন্তব্যং পুরুষেণাহুরাপত্স্বপি বিজানতা
30.14
মন্যোর্হি বিজয়ং কৃষ্ণে প্রশংসন্তীহ সাধবঃ
ক্ষমাবতো জয়ো নিত্যং সাধোরিহ সতাং মতম্
30.15
সত্যং চানৃততঃ শ্রেয়ো নৃশংসাচ্চানৃশংসতা
তমেবং বহুদোষং তু ক্রোধং সাধুবিবর্জিতম্
মাদৃশঃ প্রসৃজেত্কস্মাত্সুয়োধনবধাদপি
30.16
তেজস্বীতি যমাহুর্বৈ পণ্ডিতা দীর্ঘদর্শিনঃ
ন ক্রোধোঽভ্যন্তরস্তস্য ভবতীতি বিনিশ্চিতম্
30.17
যস্তু ক্রোধং সমুত্পন্নং প্রজ্ঞয়া প্রতিবাধতে
তেজস্বিনং তং বিদ্বাংসো মন্যন্তে তত্ত্বদর্শিনঃ
30.18
ক্রুদ্ধো হি কার্যং সুশ্রোণি ন যথাবত্প্রপশ্যতি
ন কার্যং ন চ মর্যাদাং নরঃ ক্রুদ্ধোঽনুপশ্যতি
30.19
হন্ত্যবধ্যানপি ক্রুদ্ধো গুরূন্রূক্ষৈস্তুদত্যপি
তস্মাত্তেজসি কর্তব্যে ক্রোধো দূরাত্প্রতিষ্ঠিতঃ
30.20
দাক্ষ্যং হ্যমর্ষঃ শৌর্যং চ শীঘ্রত্বমিতি তেজসঃ
গুণাঃ ক্রোধাভিভূতেন ন শক্যাঃ প্রাপ্তুমঞ্জসা
30.21
ক্রোধং ত্যক্ত্বা তু পুরুষঃ সম্যক্তেজোঽভিপদ্যতে
কালয়ুক্তং মহাপ্রাজ্ঞে ক্রুদ্ধৈস্তেজঃ সুদুঃসহম্
30.22
ক্রোধস্ত্বপণ্ডিতৈঃ শশ্বত্তেজ ইত্যভিধীয়তে
রজস্তল্লোকনাশায় বিহিতং মানুষান্প্রতি
30.23
তস্মাচ্ছশ্বত্ত্যজেত্ক্রোধং পুরুষঃ সম্যগাচরন্
শ্রেয়ান্স্বধর্মানপগো ন ক্রুদ্ধ ইতি নিশ্চিতম্
30.24
যদি সর্বমবুদ্ধীনামতিক্রান্তমমেধসাম্
অতিক্রমো মদ্বিধস্য কথং স্বিত্স্যাদনিন্দিতে
30.25
যদি ন স্যুর্মনুষ্যেষু ক্ষমিণঃ পৃথিবীসমাঃ
ন স্যাত্সংধির্মনুষ্যাণাং ক্রোধমূলো হি বিগ্রহঃ
30.26
অভিষক্তো হ্যভিষজেদাহন্যাদ্গুরুণা হতঃ
এবং বিনাশো ভূতানামধর্মঃ প্রথিতো ভবেৎ
30.27
আক্রুষ্টঃ পুরুষঃ সর্বঃ প্রত্যাক্রোশেদনন্তরম্
প্রতিহন্যাদ্ধতশ্চৈব তথা হিংস্যাচ্চ হিংসিতঃ
30.28
হন্যুর্হি পিতরঃ পুত্রান্পুত্রাশ্চাপি তথা পিতৄন্
হন্যুশ্চ পতয়ো ভার্যাঃ পতীন্ভার্যাস্তথৈব চ
30.29
এবং সংকুপিতে লোকে জন্ম কৃষ্ণে ন বিদ্যতে
প্রজানাং সংধিমূলং হি জন্ম বিদ্ধি শুভাননে
30.30
তাঃ ক্ষীয়েরন্প্রজাঃ সর্বাঃ ক্ষিপ্রং দ্রৌপদি তাদৃশে
তস্মান্মন্যুর্বিনাশায় প্রজানামভবায় চ
30.31
যস্মাত্তু লোকে দৃশ্যন্তে ক্ষমিণঃ পৃথিবীসমাঃ
তস্মাজ্জন্ম চ ভূতানাং ভবশ্চ প্রতিপদ্যতে
30.32
ক্ষন্তব্যং পুরুষেণেহ সর্বাস্বাপত্সু শোভনে
ক্ষমা ভবো হি ভূতানাং জন্ম চৈব প্রকীর্তিতম্
30.33
আক্রুষ্টস্তাডিতঃ ক্রুদ্ধঃ ক্ষমতে যো বলীয়সা
যশ্চ নিত্যং জিতক্রোধো বিদ্বানুত্তমপূরুষঃ
30.34
প্রভাববানপি নরস্তস্য লোকাঃ সনাতনাঃ
ক্রোধনস্ত্বল্পবিজ্ঞানঃ প্রেত্য চেহ চ নশ্যতি
30.35
অত্রাপ্যুদাহরন্তীমা গাথা নিত্যং ক্ষমাবতাম্
গীতাঃ ক্ষমাবতা কৃষ্ণে কাশ্যপেন মহাত্মনা
30.36
ক্ষমা ধর্মঃ ক্ষমা যজ্ঞঃ ক্ষমা বেদাঃ ক্ষমা শ্রুতম্
যস্তামেবং বিজানাতি স সর্বং ক্ষন্তুমর্হতি
30.37
ক্ষমা ব্রহ্ম ক্ষমা সত্যং ক্ষমা ভূতং চ ভাবি চ
ক্ষমা তপঃ ক্ষমা শৌচং ক্ষময়া চোদ্ধৃতং জগৎ
30.38
অতি ব্রহ্মবিদাং লোকানতি চাপি তপস্বিনাম্
অতি যজ্ঞবিদাং চৈব ক্ষমিণঃ প্রাপ্নুবন্তি তান্
30.39
ক্ষমা তেজস্বিনাং তেজঃ ক্ষমা ব্রহ্ম তপস্বিনাম্
ক্ষমা সত্যং সত্যবতাং ক্ষমা দানং ক্ষমা যশঃ
30.40
তাং ক্ষমামীদৃশীং কৃষ্ণে কথমস্মদ্বিধস্ত্যজেৎ
যস্যাং ব্রহ্ম চ সত্যং চ যজ্ঞা লোকাশ্চ বিষ্ঠিতাঃ
ভুজ্যন্তে যজ্বনাং লোকাঃ ক্ষমিণামপরে তথা
30.41
ক্ষন্তব্যমেব সততং পুরুষেণ বিজানতা
যদা হি ক্ষমতে সর্বং ব্রহ্ম সংপদ্যতে তদা
30.42
ক্ষমাবতাময়ং লোকঃ পরশ্চৈব ক্ষমাবতাম্
ইহ সংমানমৃচ্ছন্তি পরত্র চ শুভাং গতিম্
30.43
যেষাং মন্যুর্মনুষ্যাণাং ক্ষময়া নিহতঃ সদা
তেষাং পরতরে লোকাস্তস্মাত্ক্ষান্তিঃ পরা মতা
30.44
ইতি গীতাঃ কাশ্যপেন গাথা নিত্যং ক্ষমাবতাম্
শ্রুত্বা গাথাঃ ক্ষমায়াস্ত্বং তুষ্য দ্রৌপদি মা ক্রুধঃ
30.45
পিতামহঃ শাংতনবঃ শমং সংপূজয়িষ্যতি
আচার্যো বিদুরঃ ক্ষত্তা শমমেব বদিষ্যতঃ
কৃপশ্চ সংজয়শ্চৈব শমমেব বদিষ্যতঃ
30.46
সোমদত্তো যুয়ুত্সুশ্চ দ্রোণপুত্রস্তথৈব চ
পিতামহশ্চ নো ব্যাসঃ শমং বদতি নিত্যশঃ
30.47
এতৈর্হি রাজা নিয়তং চোদ্যমানঃ শমং প্রতি
রাজ্যং দাতেতি মে বুদ্ধির্ন চেল্লোভান্নশিষ্যতি
30.48
কালোঽয়ং দারুণঃ প্রাপ্তো ভরতানামভূতয়ে
নিশ্চিতং মে সদৈবৈতত্পুরস্তাদপি ভামিনি
30.49
সুয়োধনো নার্হতীতি ক্ষমামেবং ন বিন্দতি
অর্হস্তস্যাহমিত্যেব তস্মান্মাং বিন্দতে ক্ষমা
30.50
এতদাত্মবতাং বৃত্তমেষ ধর্মঃ সনাতনঃ
ক্ষমা চৈবানৃশংস্যং চ তত্কর্তাস্ম্যহমঞ্জসা