Utshovঅধ্যায় 29
29.1
দ্রৌপদ্যুবাচ
অত্রাপ্যুদাহরন্তীমমিতিহাসং পুরাতনম্
প্রহ্লাদস্য চ সংবাদং বলের্বৈরোচনস্য চ
29.2
অসুরেন্দ্রং মহাপ্রাজ্ঞং ধর্মাণামাগতাগমম্
বলিঃ পপ্রচ্ছ দৈত্যেন্দ্রং প্রহ্লাদং পিতরং পিতুঃ
29.3
ক্ষমা স্বিচ্ছ্রেয়সী তাত উতাহো তেজ ইত্যুত
এতন্মে সংশয়ং তাত যথাবদ্ব্রূহি পৃচ্ছতে
29.4
শ্রেয়ো যদত্র ধর্মজ্ঞ ব্রূহি মে তদসংশয়ম্
করিষ্যামি হি তত্সর্বং যথাবদনুশাসনম্
29.5
তস্মৈ প্রোবাচ তত্সর্বমেবং পৃষ্টঃ পিতামহঃ
সর্বনিশ্চয়বিত্প্রাজ্ঞঃ সংশয়ং পরিপৃচ্ছতে
29.6
প্রহ্লাদ উবাচ
ন শ্রেয়ঃ সততং তেজো ন নিত্যং শ্রেয়সী ক্ষমা
ইতি তাত বিজানীহি দ্বয়মেতদসংশয়ম্
29.7
যো নিত্যং ক্ষমতে তাত বহূন্দোষান্স বিন্দতি
ভৃত্যাঃ পরিভবন্ত্যেনমুদাসীনাস্তথৈব চ
29.8
সর্বভূতানি চাপ্যস্য ন নমন্তে কদাচন
তস্মান্নিত্যং ক্ষমা তাত পণ্ডিতৈরপবাদিতা
29.9
অবজ্ঞায় হি তং ভৃত্যা ভজন্তে বহুদোষতাম্
আদাতুং চাস্য বিত্তানি প্রার্থয়ন্তেঽল্পচেতসঃ
29.10
যানং বস্ত্রাণ্যলংকারাঞ্শয়নান্যাসনানি চ
ভোজনান্যথ পানানি সর্বোপকরণানি চ
29.11
আদদীরন্নধিকৃতা যথাকামমচেতসঃ
প্রদিষ্টানি চ দেয়ানি ন দদ্যুর্ভর্তৃশাসনাৎ
29.12
ন চৈনং ভর্তৃপূজাভিঃ পূজয়ন্তি কদাচন
অবজ্ঞানং হি লোকেঽস্মিন্মরণাদপি গর্হিতম্
29.13
ক্ষমিণং তাদৃশং তাত ব্রুবন্তি কটুকান্যপি
প্রেষ্যাঃ পুত্রাশ্চ ভৃত্যাশ্চ তথোদাসীনবৃত্তয়ঃ
29.14
অপ্যস্য দারানিচ্ছন্তি পরিভূয় ক্ষমাবতঃ
দারাশ্চাস্য প্রবর্তন্তে যথাকামমচেতসঃ
29.15
তথা চ নিত্যমুদিতা যদি স্বল্পমপীশ্বরাৎ
দণ্ডমর্হন্তি দুষ্যন্তি দুষ্টাশ্চাপ্যপকুর্বতে
29.16
এতে চান্যে চ বহবো নিত্যং দোষাঃ ক্ষমাবতাম্
অথ বৈরোচনে দোষানিমান্বিদ্ধ্যক্ষমাবতাম্
29.17
অস্থানে যদি বা স্থানে সততং রজসাবৃতঃ
ক্রুদ্ধো দণ্ডান্প্রণয়তি বিবিধান্স্বেন তেজসা
29.18
মিত্রৈঃ সহ বিরোধং চ প্রাপ্নুতে তেজসাবৃতঃ
প্রাপ্নোতি দ্বেষ্যতাং চৈব লোকাত্স্বজনতস্তথা
29.19
সোঽবমানাদর্থহানিমুপালম্ভমনাদরম্
সংতাপদ্বেষলোভাংশ্চ শত্রূংশ্চ লভতে নরঃ
29.20
ক্রোধাদ্দণ্ডান্মনুষ্যেষু বিবিধান্পুরুষো নয়ন্
ভ্রশ্যতে শীঘ্রমৈশ্বর্যাত্প্রাণেভ্যঃ স্বজনাদপি
29.21
যোঽপকর্তৄংশ্চ কর্তৄংশ্চ তেজসৈবোপগচ্ছতি
তস্মাদুদ্বিজতে লোকঃ সর্পাদ্বেশ্মগতাদিব
29.22
যস্মাদুদ্বিজতে লোকঃ কথং তস্য ভবো ভবেৎ
অন্তরং হ্যস্য দৃষ্ট্বৈব লোকো বিকুরুতে ধ্রুবম্
তস্মান্নাত্যুত্সৃজেত্তেজো ন চ নিত্যং মৃদুর্ভবেৎ
29.23
কালে মৃদুর্যো ভবতি কালে ভবতি দারুণঃ
স বৈ সুখমবাপ্নোতি লোকেঽমুষ্মিন্নিহৈব চ
29.24
ক্ষমাকালাংস্তু বক্ষ্যামি শৃণু মে বিস্তরেণ তান্
যে তে নিত্যমসংত্যাজ্যা যথা প্রাহুর্মনীষিণঃ
29.25
পূর্বোপকারী যস্তু স্যাদপরাধেঽগরীয়সি
উপকারেণ তত্তস্য ক্ষন্তব্যমপরাধিনঃ
29.26
অবুদ্ধিমাশ্রিতানাং চ ক্ষন্তব্যমপরাধিনাম্
ন হি সর্বত্র পাণ্ডিত্যং সুলভং পুরুষেণ বৈ
29.27
অথ চেদ্বুদ্ধিজং কৃত্বা ব্রূয়ুস্তে তদবুদ্ধিজম্
পাপান্স্বল্পেঽপি তান্হন্যাদপরাধে তথানৃজূন্
29.28
সর্বস্যৈকোঽপরাধস্তে ক্ষন্তব্যঃ প্রাণিনো ভবেৎ
দ্বিতীয়ে সতি বধ্যস্তু স্বল্পেঽপ্যপকৃতে ভবেৎ
29.29
অজানতা ভবেত্কশ্চিদপরাধঃ কৃতো যদি
ক্ষন্তব্যমেব তস্যাহুঃ সুপরীক্ষ্য পরীক্ষয়া
29.30
মৃদুনা মার্দবং হন্তি মৃদুনা হন্তি দারুণম্
নাসাধ্যং মৃদুনা কিংচিত্তস্মাত্তীক্ষ্ণতরো মৃদুঃ
29.31
দেশকালৌ তু সংপ্রেক্ষ্য বলাবলমথাত্মনঃ
নাদেশকালে কিংচিত্স্যাদ্দেশঃ কালঃ প্রতীক্ষ্যতে
তথা লোকভয়াচ্চৈব ক্ষন্তব্যমপরাধিনঃ
29.32
এত এবংবিধাঃ কালাঃ ক্ষমায়াঃ পরিকীর্তিতাঃ
অতোঽন্যথানুবর্তত্সু তেজসঃ কাল উচ্যতে
29.33
দ্রৌপদ্যুবাচ
তদহং তেজসঃ কালং তব মন্যে নরাধিপ
ধার্তরাষ্ট্রেষু লুব্ধেষু সততং চাপকারিষু
29.34
ন হি কশ্চিত্ক্ষমাকালো বিদ্যতেঽদ্য কুরূন্প্রতি
তেজসশ্চাগতে কালে তেজ উত্স্রষ্টুমর্হসি
29.35
মৃদুর্ভবত্যবজ্ঞাতস্তীক্ষ্ণাদুদ্বিজতে জনঃ
কালে প্রাপ্তে দ্বয়ং হ্যেতদ্যো বেদ স মহীপতিঃ