Utshovঅধ্যায় 28
28.1
বৈশংপায়ন উবাচ
ততো বনগতাঃ পার্থাঃ সায়াহ্নে সহ কৃষ্ণয়া
উপবিষ্টাঃ কথাশ্চক্রুর্দুঃখশোকপরায়ণাঃ
28.2
প্রিয়া চ দর্শনীয়া চ পণ্ডিতা চ পতিব্রতা
ততঃ কৃষ্ণা ধর্মরাজমিদং বচনমব্রবীৎ
28.3
ন নূনং তস্য পাপস্য দুঃখমস্মাসু কিংচন
বিদ্যতে ধার্তরাষ্ট্রস্য নৃশংসস্য দুরাত্মনঃ
28.4
যস্ত্বাং রাজন্ময়া সার্ধমজিনৈঃ প্রতিবাসিতম্
ভ্রাতৃভিশ্চ তথা সর্বৈর্নাভ্যভাষত কিংচন
বনং প্রস্থাপ্য দুষ্টাত্মা নান্বতপ্যত দুর্মতিঃ
28.5
আয়সং হৃদয়ং নূনং তস্য দুষ্কৃতকর্মণঃ
যস্ত্বাং ধর্মপরং শ্রেষ্ঠং রূক্ষাণ্যশ্রাবয়ত্তদা
28.6
সুখোচিতমদুঃখার্হং দুরাত্মা সসুহৃদ্গণঃ
ঈদৃশং দুঃখমানীয় মোদতে পাপপূরুষঃ
28.7
চতুর্ণামেব পাপানামশ্রু বৈ নাপতত্তদা
ত্বয়ি ভারত নিষ্ক্রান্তে বনায়াজিনবাসসি
28.8
দুর্যোধনস্য কর্ণস্য শকুনেশ্চ দুরাত্মনঃ
দুর্ভ্রাতুস্তস্য চোগ্রস্য তথা দুঃশাসনস্য চ
28.9
ইতরেষাং তু সর্বেষাং কুরূণাং কুরুসত্তম
দুঃখেনাভিপরীতানাং নেত্রেভ্যঃ প্রাপতজ্জলম্
28.10
ইদং চ শয়নং দৃষ্ট্বা যচ্চাসীত্তে পুরাতনম্
শোচামি ত্বাং মহারাজ দুঃখানর্হং সুখোচিতম্
28.11
দান্তং যচ্চ সভামধ্যে আসনং রত্নভূষিতম্
দৃষ্ট্বা কুশবৃসীং চেমাং শোকো মাং রুন্ধয়ত্যয়ম্
28.12
যদপশ্যং সভায়াং ত্বাং রাজভিঃ পরিবারিতম্
তচ্চ রাজন্নপশ্যন্ত্যাঃ কা শান্তির্হৃদয়স্য মে
28.13
যা ত্বাহং চন্দনাদিগ্ধমপশ্যং সূর্যবর্চসম্
সা ত্বা পঙ্কমলাদিগ্ধং দৃষ্ট্বা মুহ্যামি ভারত
28.14
যা বৈ ত্বা কৌশিকৈর্বস্ত্রৈঃ শুভ্রৈর্বহুধনৈঃ পুরা
দৃষ্টবত্যস্মি রাজেন্দ্র সা ত্বাং পশ্যামি চীরিণম্
28.15
যচ্চ তদ্রুক্মপাত্রীভির্ব্রাহ্মণেভ্যঃ সহস্রশঃ
হ্রিয়তে তে গৃহাদন্নং সংস্কৃতং সার্বকামিকম্
28.16
যতীনামগৃহাণাং তে তথৈব গৃহমেধিনাম্
দীয়তে ভোজনং রাজন্নতীব গুণবত্প্রভো
তচ্চ রাজন্নপশ্যন্ত্যাঃ কা শান্তির্হৃদয়স্য মে
28.17
যাংস্তে ভ্রাতৄন্মহারাজ যুবানো মৃষ্টকুণ্ডলাঃ
অভোজয়ন্ত মৃষ্টান্নৈঃ সূদাঃ পরমসংস্কৃতৈঃ
28.18
সর্বাংস্তানদ্য পশ্যামি বনে বন্যেন জীবতঃ
অদুঃখার্হান্মনুষ্যেন্দ্র নোপশাম্যতি মে মনঃ
28.19
ভীমসেনমিমং চাপি দুঃখিতং বনবাসিনম্
ধ্যায়ন্তং কিং ন মন্যুস্তে প্রাপ্তে কালে বিবর্ধতে
28.20
ভীমসেনং হি কর্মাণি স্বয়ং কুর্বাণমচ্যুত
সুখার্হং দুঃখিতং দৃষ্ট্বা কস্মান্মন্যুর্ন বর্ধতে
28.21
সত্কৃতং বিবিধৈর্যানৈর্বস্ত্রৈরুচ্চাবচৈস্তথা
তং তে বনগতং দৃষ্ট্বা কস্মান্মন্যুর্ন বর্ধতে
28.22
কুরূনপি হি যঃ সর্বান্হন্তুমুত্সহতে প্রভুঃ
ত্বত্প্রসাদং প্রতীক্ষংস্তু সহতেঽয়ং বৃকোদরঃ
28.23
যোঽর্জুনেনার্জুনস্তুল্যো দ্বিবাহুর্বহুবাহুনা
শরাতিসর্গে শীঘ্রত্বাত্কালান্তকয়মোপমঃ
28.24
যস্য শস্ত্রপ্রতাপেন প্রণতাঃ সর্বপার্থিবাঃ
যজ্ঞে তব মহারাজ ব্রাহ্মণানুপতস্থিরে
28.25
তমিমং পুরুষব্যাঘ্রং পূজিতং দেবদানবৈঃ
ধ্যায়ন্তমর্জুনং দৃষ্ট্বা কস্মান্মন্যুর্ন বর্ধতে
28.26
দৃষ্ট্বা বনগতং পার্থমদুঃখার্হং সুখোচিতম্
ন চ তে বর্ধতে মন্যুস্তেন মুহ্যামি ভারত
28.27
যো দেবাংশ্চ মনুষ্যাংশ্চ সর্পাংশ্চৈকরথোঽজয়ৎ
তং তে বনগতং দৃষ্ট্বা কস্মান্মন্যুর্ন বর্ধতে
28.28
যো যানৈরদ্ভুতাকারৈর্হয়ৈর্নাগৈশ্চ সংবৃতঃ
প্রসহ্য বিত্তান্যাদত্ত পার্থিবেভ্যঃ পরংতপঃ
28.29
ক্ষিপত্যেকেন বেগেন পঞ্চ বাণশতানি যঃ
তং তে বনগতং দৃষ্ট্বা কস্মান্মন্যুর্ন বর্ধতে
28.30
শ্যামং বৃহন্তং তরুণং চর্মিণামুত্তমং রণে
নকুলং তে বনে দৃষ্ট্বা কস্মান্মন্যুর্ন বর্ধতে
28.31
দর্শনীয়ং চ শূরং চ মাদ্রীপুত্রং যুধিষ্ঠির
সহদেবং বনে দৃষ্ট্বা কস্মান্মন্যুর্ন বর্ধতে
28.32
দ্রুপদস্য কুলে জাতাং স্নুষাং পাণ্ডোর্মহাত্মনঃ
মাং তে বনগতাং দৃষ্ট্বা কস্মান্মন্যুর্ন বর্ধতে
28.33
নূনং চ তব নৈবাস্তি মন্যুর্ভরতসত্তম
যত্তে ভ্রাতৄংশ্চ মাং চৈব দৃষ্ট্বা ন ব্যথতে মনঃ
28.34
ন নির্মন্যুঃ ক্ষত্রিয়োঽস্তি লোকে নির্বচনং স্মৃতম্
তদদ্য ত্বয়ি পশ্যামি ক্ষত্রিয়ে বিপরীতবৎ
28.35
যো ন দর্শয়তে তেজঃ ক্ষত্রিয়ঃ কাল আগতে
সর্বভূতানি তং পার্থ সদা পরিভবন্ত্যুত
28.36
তত্ত্বয়া ন ক্ষমা কার্যা শত্রূন্প্রতি কথংচন
তেজসৈব হি তে শক্যা নিহন্তুং নাত্র সংশয়ঃ
28.37
তথৈব যঃ ক্ষমাকালে ক্ষত্রিয়ো নোপশাম্যতি
অপ্রিয়ঃ সর্বভূতানাং সোঽমুত্রেহ চ নশ্যতি