Utshovঅধ্যায় 27
27.1
বৈশংপায়ন উবাচ
বসত্স্বথ দ্বৈতবনে পাণ্ডবেষু মহাত্মসু
অনুকীর্ণং মহারণ্যং ব্রাহ্মণৈঃ সমপদ্যত
27.2
ঈর্যমাণেন সততং ব্রহ্মঘোষেণ সর্বতঃ
ব্রহ্মলোকসমং পুণ্যমাসীদ্দ্বৈতবনং সরঃ
27.3
যজুষামৃচাং চ সাম্নাং চ গদ্যানাং চৈব সর্বশঃ
আসীদুচ্চার্যমাণানাং নিস্বনো হৃদয়ংগমঃ
27.4
জ্যাঘোষঃ পাণ্ডবেয়ানাং ব্রহ্মঘোষশ্চ ধীমতাম্
সংসৃষ্টং ব্রহ্মণা ক্ষত্রং ভূয় এব ব্যরোচত
27.5
অথাব্রবীদ্বকো দাল্ভ্যো ধর্মরাজং যুধিষ্ঠিরম্
সংধ্যাং কৌন্তেয়মাসীনমৃষিভিঃ পরিবারিতম্
27.6
পশ্য দ্বৈতবনে পার্থ ব্রাহ্মণানাং তপস্বিনাম্
হোমবেলাং কুরুশ্রেষ্ঠ সংপ্রজ্বলিতপাবকাম্
27.7
চরন্তি ধর্মং পুণ্যেঽস্মিংস্ত্বয়া গুপ্তা ধৃতব্রতাঃ
ভৃগবোঽঙ্গিরসশ্চৈব বাসিষ্ঠাঃ কাশ্যপৈঃ সহ
27.8
আগস্ত্যাশ্চ মহাভাগা আত্রেয়াশ্চোত্তমব্রতাঃ
সর্বস্য জগতঃ শ্রেষ্ঠা ব্রাহ্মণাঃ সংগতাস্ত্বয়া
27.9
ইদং তু বচনং পার্থ শৃণ্বেকাগ্রমনা মম
ভ্রাতৃভিঃ সহ কৌন্তেয় যত্ত্বাং বক্ষ্যামি কৌরব
27.10
ব্রহ্ম ক্ষত্রেণ সংসৃষ্টং ক্ষত্রং চ ব্রহ্মণা সহ
উদীর্ণৌ দহতঃ শত্রূন্বনানীবাগ্নিমারুতৌ
27.11
নাব্রাহ্মণস্তাত চিরং বুভূষে;দিচ্ছন্নিমং লোকমমুং চ জেতুম্
বিনীতধর্মার্থমপেতমোহং; লব্ধ্বা দ্বিজং নুদতি নৃপঃ সপত্নান্
27.12
চরন্নৈঃশ্রেয়সং ধর্মং প্রজাপালনকারিতম্
নাধ্যগচ্ছদ্বলির্লোকে তীর্থমন্যত্র বৈ দ্বিজাৎ
27.13
অনূনমাসীদসুরস্য কামৈ;র্বৈরোচনেঃ শ্রীরপি চাক্ষয়াসীৎ
লব্ধ্বা মহীং ব্রাহ্মণসংপ্রয়োগা;ত্তেষ্বাচরন্দুষ্টমতো ব্যনশ্যৎ
27.14
নাব্রাহ্মণং ভূমিরিয়ং সভূতি;র্বর্ণং দ্বিতীয়ং ভজতে চিরায়
সমুদ্রনেমির্নমতে তু তস্মৈ; যং ব্রাহ্মণঃ শাস্তি নয়ৈর্বিনীতঃ
27.15
কুঞ্জরস্যেব সংগ্রামেঽপরিগৃহ্যাঙ্কুশগ্রহম্
ব্রাহ্মণৈর্বিপ্রহীণস্য ক্ষত্রস্য ক্ষীয়তে বলম্
27.16
ব্রহ্মণ্যনুপমা দৃষ্টিঃ ক্ষাত্রমপ্রতিমং বলম্
তৌ যদা চরতঃ সার্ধমথ লোকঃ প্রসীদতি
27.17
যথা হি সুমহানগ্নিঃ কক্ষং দহতি সানিলঃ
তথা দহতি রাজন্যো ব্রাহ্মণেন সমং রিপূন্
27.18
ব্রাহ্মণেভ্যোঽথ মেধাবী বুদ্ধিপর্যেষণং চরেৎ
অলব্ধস্য চ লাভায় লব্ধস্য চ বিবৃদ্ধয়ে
27.19
অলব্ধলাভায় চ লব্ধবৃদ্ধয়ে; যথার্হতীর্থপ্রতিপাদনায়
যশস্বিনং বেদবিদং বিপশ্চিতং; বহুশ্রুতং ব্রাহ্মণমেব বাসয়
27.20
ব্রাহ্মণেষূত্তমা বৃত্তিস্তব নিত্যং যুধিষ্ঠির
তেন তে সর্বলোকেষু দীপ্যতে প্রথিতং যশঃ
27.21
ততস্তে ব্রাহ্মণাঃ সর্বে বকং দাল্ভ্যমপূজয়ন্
যুধিষ্ঠিরে স্তূয়মানে ভূয়ঃ সুমনসোঽভবন্
27.22
দ্বৈপায়নো নারদশ্চ জামদগ্ন্যঃ পৃথুশ্রবাঃ
ইন্দ্রদ্যুম্নো ভালুকিশ্চ কৃতচেতাঃ সহস্রপাৎ
27.23
কর্ণশ্রবাশ্চ মুঞ্জশ্চ লবণাশ্বশ্চ কাশ্যপঃ
হারীতঃ স্থূণকর্ণশ্চ অগ্নিবেশ্যোঽথ শৌনকঃ
27.24
ঋতবাক্চ সুবাক্চৈব বৃহদশ্ব ঋতাবসুঃ
ঊর্ধ্বরেতা বৃষামিত্রঃ সুহোত্রো হোত্রবাহনঃ
27.25
এতে চান্যে চ বহবো ব্রাহ্মণাঃ সংশিতব্রতাঃ
অজাতশত্রুমানর্চুঃ পুরংদরমিবর্ষয়ঃ