অধ্যায় 26

26.1

বৈশংপায়ন উবাচ
তত্কাননং প্রাপ্য নরেন্দ্রপুত্রাঃ; সুখোচিতা বাসমুপেত্য কৃচ্ছ্রম্
বিজহ্রুরিন্দ্রপ্রতিমাঃ শিবেষু; সরস্বতীশালবনেষু তেষু

যতীংশ্চ সর্বান্স মুনীংশ্চ রাজা; তস্মিন্বনে মূলফলৈরুদগ্রৈঃ
দ্বিজাতিমুখ্যানৃষভঃ কুরূণাং; সংতর্পয়ামাস মহানুভাবঃ

ইষ্টীশ্চ পিত্র্যাণি তথাগ্রিয়াণি; মহাবনে বসতাং পাণ্ডবানাম্
পুরোহিতঃ সর্বসমৃদ্ধতেজা;শ্চকার ধৌম্যঃ পিতৃবত্কুরূণাম্

অপেত্য রাষ্ট্রাদ্বসতাং তু তেষা;মৃষিঃ পুরাণোঽতিথিরাজগাম
তমাশ্রমং তীব্রসমৃদ্ধতেজা; মার্কণ্ডেয়ঃ শ্রীমতাং পাণ্ডবানাম্

স সর্ববিদ্দ্রৌপদীং প্রেক্ষ্য কৃষ্ণাং; যুধিষ্ঠিরং ভীমসেনার্জুনৌ চ
সংস্মৃত্য রামং মনসা মহাত্মা; তপস্বিমধ্যেঽস্ময়তামিতৌজাঃ

তং ধর্মরাজো বিমনা ইবাব্রবী;ত্সর্বে হ্রিয়া সন্তি তপস্বিনোঽমী
ভবানিদং কিং স্ময়তীব হৃষ্ট;স্তপস্বিনাং পশ্যতাং মামুদীক্ষ্য

মার্কণ্ডেয় উবাচ
ন তাত হৃষ্যামি ন চ স্ময়ামি; প্রহর্ষজো মাং ভজতে ন দর্পঃ
তবাপদং ত্বদ্য সমীক্ষ্য রামং; সত্যব্রতং দাশরথিং স্মরামি

স চাপি রাজা সহ লক্ষ্মণেন; বনে নিবাসং পিতুরেব শাসনাৎ
ধন্বী চরন্পার্থ পুরা ময়ৈব; দৃষ্টো গিরেরৃষ্যমূকস্য সানৌ

সহস্রনেত্রপ্রতিমো মহাত্মা; ময়স্য জেত নমুচেশ্চ হন্তা
পিতুর্নিদেশাদনঘঃ স্বধর্মং; বনে বাসং দাশরথিশ্চকার

স চাপি শক্রস্য সমপ্রভাবো; মহানুভাবঃ সমরেষ্বজেয়ঃ
বিহায় ভোগানচরদ্বনেষু; নেশে বলস্যেতি চরেদধর্মম্

নৃপাশ্চ নাভাগভগীরথাদয়ো; মহীমিমাং সাগরান্তাং বিজিত্য
সত্যেন তেঽপ্যজয়ংস্তাত লোকা;ন্নেশে বলস্যেতি চরেদধর্মম্

অলর্কমাহুর্নরবর্য সন্তং; সত্যব্রতং কাশিকরূষরাজম্
বিহায় রাষ্ট্রাণি বসূনি চৈব; নেশে বলস্যেতি চরেদধর্মম্

ধাত্রা বিধির্যো বিহিতঃ পুরাণ;স্তং পূজয়ন্তো নরবর্য সন্তঃ
সপ্তর্ষয়ঃ পার্থ দিবি প্রভান্তি; নেশে বলস্যেতি চরেদধর্মম্

মহাবলান্পর্বতকূটমাত্রা;ন্বিষাণিনঃ পশ্য গজান্নরেন্দ্র
স্থিতান্নিদেশে নরবর্য ধাতু;র্নেশে বলস্যেতি চরেদধর্মম্

সর্বাণি ভূতানি নরেন্দ্র পশ্য; যথা যথাবদ্বিহিতং বিধাত্রা
স্বয়োনিতস্তত্কুরুতে প্রভাবা;ন্নেশে বলস্যেতি চরেদধর্মম্

সত্যেন ধর্মেণ যথার্হবৃত্ত্যা; হ্রিয়া তথা সর্বভূতান্যতীত্য
যশশ্চ তেজশ্চ তবাপি দীপ্তং; বিভাবসোর্ভাস্করস্যেব পার্থ

যথাপ্রতিজ্ঞং চ মহানুভাব; কৃচ্ছ্রং বনে বাসমিমং নিরুষ্য
ততঃ শ্রিয়ং তেজসা স্বেন দীপ্তা;মাদাস্যসে পার্থিব কৌরবেভ্যঃ

বৈশংপায়ন উবাচ
তমেবমুক্ত্বা বচনং মহর্ষি;স্তপস্বিমধ্যে সহিতং সুহৃদ্ভিঃ
আমন্ত্র্য ধৌম্যং সহিতাংশ্চ পার্থাং;স্ততঃ প্রতস্থে দিশমুত্তরাং সঃ