Utshovঅধ্যায় 25
25.1
বৈশংপায়ন উবাচ
ততস্তেষু প্রয়াতেষু কৌন্তেয়ঃ সত্যসংগরঃ
অভ্যভাষত ধর্মাত্মা ভ্রাতৄন্সর্বান্যুধিষ্ঠিরঃ
25.2
দ্বাদশেমাঃ সমাস্মাভির্বস্তব্যং নির্জনে বনে
সমীক্ষধ্বং মহারণ্যে দেশং বহুমৃগদ্বিজম্
25.3
বহুপুষ্পফলং রম্যং শিবং পুণ্যজনোচিতম্
যত্রেমাঃ শরদঃ সর্বাঃ সুখং প্রতিবসেমহি
25.4
এবমুক্তে প্রত্যুবাচ ধর্মরাজং ধনংজয়ঃ
গুরুবন্মানবগুরুং মানয়িত্বা মনস্বিনম্
25.5
অর্জুন উবাচ
ভবানেব মহর্ষীণাং বৃদ্ধানাং পর্যুপাসিতা
অজ্ঞাতং মানুষে লোকে ভবতো নাস্তি কিংচন
25.6
ত্বয়া হ্যুপাসিতা নিত্যং ব্রাহ্মণা ভরতর্ষভ
দ্বৈপায়নপ্রভৃতয়ো নারদশ্চ মহাতপাঃ
25.7
যঃ সর্বলোকদ্বারাণি নিত্যং সংচরতে বশী
দেবলোকাদ্ব্রহ্মলোকং গন্ধর্বাপ্সরসামপি
25.8
সর্বা গতীর্বিজানাসি ব্রাহ্মণানাং ন সংশয়ঃ
প্রভাবাংশ্চৈব বেত্থ ত্বং সর্বেষামেব পার্থিব
25.9
ত্বমেব রাজঞ্জানাসি শ্রেয়ঃকারণমেব চ
যত্রেচ্ছসি মহারাজ নিবাসং তত্র কুর্মহে
25.10
ইদং দ্বৈতবনং নাম সরঃ পুণ্যজনোচিতম্
বহুপুষ্পফলং রম্যং নানাদ্বিজনিষেবিতম্
25.11
অত্রেমা দ্বাদশ সমা বিহরেমেতি রোচয়ে
যদি তেঽনুমতং রাজন্কিং বান্যন্মন্যতে ভবান্
25.12
যুধিষ্ঠির উবাচ
মমাপ্যেতন্মতং পার্থ ত্বয়া যত্সমুদাহৃতম্
গচ্ছাম পুণ্যং বিখ্যাতং মহদ্দ্বৈতবনং সরঃ
25.13
বৈশংপায়ন উবাচ
ততস্তে প্রয়য়ুঃ সর্বে পাণ্ডবা ধর্মচারিণঃ
ব্রাহ্মণৈর্বহুভিঃ সার্ধং পুণ্যং দ্বৈতবনং সরঃ
25.14
ব্রাহ্মণাঃ সাগ্নিহোত্রাশ্চ তথৈব চ নিরগ্নয়ঃ
স্বাধ্যায়িনো ভিক্ষবশ্চ সজপা বনবাসিনঃ
25.15
বহবো ব্রাহ্মণাস্তত্র পরিবব্রুর্যুধিষ্ঠিরম্
তপস্বিনঃ সত্যশীলাঃ শতশঃ সংশিতব্রতাঃ
25.16
তে যাত্বা পাণ্ডবাস্তত্র বহুভির্ব্রাহ্মণৈঃ সহ
পুণ্যং দ্বৈতবনং রম্যং বিবিশুর্ভরতর্ষভাঃ
25.17
তচ্ছালতালাম্রমধূকনীপ; কদম্বসর্জার্জুনকর্ণিকারৈঃ
তপাত্যয়ে পুষ্পধরৈরুপেতং; মহাবনং রাষ্ট্রপতির্দদর্শ
25.18
মহাদ্রুমাণাং শিখরেষু তস্থু;র্মনোরমাং বাচমুদীরয়ন্তঃ
ময়ূরদাত্যূহচকোরসংঘা;স্তস্মিন্বনে কাননকোকিলাশ্চ
25.19
করেণুয়ূথৈঃ সহ যূথপানাং; মদোত্কটানামচলপ্রভাণাম্
মহান্তি যূথানি মহাদ্বিপানাং; তস্মিন্বনে রাষ্ট্রপতির্দদর্শ
25.20
মনোরমাং ভোগবতীমুপেত্য; ধৃতাত্মনাং চীরজটাধরাণাম্
তস্মিন্বনে ধর্মভৃতাং নিবাসে; দদর্শ সিদ্ধর্ষিগণাননেকান্
25.21
ততঃ স যানাদবরুহ্য রাজা; সভ্রাতৃকঃ সজনঃ কাননং তৎ
বিবেশ ধর্মাত্মবতাং বরিষ্ঠ;স্ত্রিবিষ্টপং শক্র ইবামিতৌজাঃ
25.22
তং সত্যসংধং সহিতাভিপেতু;র্দিদৃক্ষবশ্চারণসিদ্ধসংঘাঃ
বনৌকসশ্চাপি নরেন্দ্রসিংহং; মনস্বিনং সংপরিবার্য তস্থুঃ
25.23
স তত্র সিদ্ধানভিবাদ্য সর্বা;ন্প্রত্যর্চিতো রাজবদ্দেববচ্চ
বিবেশ সর্বৈঃ সহিতো দ্বিজাগ্র্যৈঃ; কৃতাঞ্জলির্ধর্মভৃতাং বরিষ্ঠঃ
25.24
স পুণ্যশীলঃ পিতৃবন্মহাত্মা; তপস্বিভির্ধর্মপরৈরুপেত্য
প্রত্যর্চিতঃ পুষ্পধরস্য মূলে; মহাদ্রুমস্যোপবিবেশ রাজা
25.25
ভীমশ্চ কৃষ্ণা চ ধনংজয়শ্চ; যমৌ চ তে চানুচরা নরেন্দ্রম্
বিমুচ্য বাহানবরুহ্য সর্বে; তত্রোপতস্থুর্ভরতপ্রবর্হাঃ
25.26
লতাবতানাবনতঃ স পাণ্ডবৈ;র্মহাদ্রুমঃ পঞ্চভিরুগ্রধন্বিভিঃ
বভৌ নিবাসোপগতৈর্মহাত্মভি;র্মহাগিরির্বারণয়ূথপৈরিব