অধ্যায় 24

24.1

বৈশংপায়ন উবাচ
তস্মিন্দশার্হাধিপতৌ প্রয়াতে; যুধিষ্ঠিরো ভীমসেনার্জুনৌ চ
যমৌ চ কৃষ্ণা চ পুরোহিতশ্চ; রথান্মহার্হান্পরমাশ্বয়ুক্তান্

আস্থায় বীরাঃ সহিতা বনায়; প্রতস্থিরে ভূতপতিপ্রকাশাঃ
হিরণ্যনিষ্কান্বসনানি গাশ্চ; প্রদায় শিক্ষাক্ষরমন্ত্রবিদ্ভ্যঃ

প্রেষ্যাঃ পুরো বিংশতিরাত্তশস্ত্রা; ধনূংষি বর্মাণি শরাংশ্চ পীতান্
মৌর্বীশ্চ যন্ত্রাণি চ সায়কাংশ্চ; সর্বে সমাদায় জঘন্যমীয়ুঃ

ততস্তু বাসাংসি চ রাজপুত্র্যা; ধাত্র্যশ্চ দাস্যশ্চ বিভূষণং চ
তদিন্দ্রসেনস্ত্বরিতং প্রগৃহ্য; জঘন্যমেবোপয়য়ৌ রথেন

ততঃ কুরুশ্রেষ্ঠমুপেত্য পৌরাঃ; প্রদক্ষিণং চক্রুরদীনসত্ত্বাঃ
তং ব্রাহ্মণাশ্চাভ্যবদন্প্রসন্না; মুখ্যাশ্চ সর্বে কুরুজাঙ্গলানাম্

স চাপি তানভ্যবদত্প্রসন্নঃ; সহৈব তৈর্ভ্রাতৃভির্ধর্মরাজঃ
তস্থৌ চ তত্রাধিপতির্মহাত্মা; দৃষ্ট্বা জনৌঘং কুরুজাঙ্গলানাম্

পিতেব পুত্রেষু স তেষু ভাবং; চক্রে কুরূণামৃষভো মহাত্মা
তে চাপি তস্মিন্ভরতপ্রবর্হে; তদা বভূবুঃ পিতরীব পুত্রাঃ

ততঃ সমাসাদ্য মহাজনৌঘাঃ; কুরুপ্রবীরং পরিবার্য তস্থুঃ
হা নাথ হা ধর্ম ইতি ব্রুবন্তো; হ্রিয়া চ সর্বেঽশ্রুমুখা বভূবুঃ

বরঃ কুরূণামধিপঃ প্রজানাং; পিতেব পুত্রানপহায় চাস্মান্
পৌরানিমাঞ্জানপদাংশ্চ সর্বা;ন্হিত্বা প্রয়াতঃ ক্ব নু ধর্মরাজঃ

ধিগ্ধার্তরাষ্ট্রং সুনৃশংসবুদ্ধিং; সসৌবলং পাপমতিং চ কর্ণম্
অনর্থমিচ্ছন্তি নরেন্দ্র পাপা; যে ধর্মনিত্যস্য সতস্তবোগ্রাঃ

স্বয়ং নিবেশ্যাপ্রতিমং মহাত্মা; পুরং মহদ্দেবপুরপ্রকাশম্
শতক্রতুপ্রস্থমমোঘকর্মা; হিত্বা প্রয়াতঃ ক্ব নু ধর্মরাজঃ

চকার যামপ্রতিমাং মহাত্মা; সভাং ময়ো দেবসভাপ্রকাশাম্
তাং দেবগুপ্তামিব দেবমায়াং; হিত্বা প্রয়াতঃ ক্ব নু ধর্মরাজঃ

তান্ধর্মকামার্থবিদুত্তমৌজা; বীভত্সুরুচ্চৈঃ সহিতানুবাচ
আদাস্যতে বাসমিমং নিরুষ্য; বনেষু রাজা দ্বিষতাং যশাংসি

দ্বিজাতিমুখ্যাঃ সহিতাঃ পৃথক্চ; ভবদ্ভিরাসাদ্য তপস্বিনশ্চ
প্রসাদ্য ধর্মার্থবিদশ্চ বাচ্যা; যথার্থসিদ্ধিঃ পরমা ভবেন্নঃ

ইত্যেবমুক্তে বচনেঽর্জুনেন; তে ব্রাহ্মণাঃ সর্ববর্ণাশ্চ রাজন্
মুদাভ্যনন্দন্সহিতাশ্চ চক্রুঃ; প্রদক্ষিণং ধর্মভৃতাং বরিষ্ঠম্

আমন্ত্র্য পার্থং চ বৃকোদরং চ; ধনংজয়ং যাজ্ঞসেনীং যমৌ চ
প্রতস্থিরে রাষ্ট্রমপেতহর্ষা; যুধিষ্ঠিরেণানুমতা যথাস্বম্