Utshovঅধ্যায় 23
23.1
বাসুদেব উবাচ
ততোঽহং ভরতশ্রেষ্ঠ প্রগৃহ্য রুচিরং ধনুঃ
শরৈরপাতয়ং সৌভাচ্ছিরাংসি বিবুধদ্বিষাম্
23.2
শরাংশ্চাশীবিষাকারানূর্ধ্বগাংস্তিগ্মতেজসঃ
অপ্রৈষং শাল্বরাজায় শার্ঙ্গমুক্তান্সুবাসসঃ
23.3
ততো নাদৃশ্যত তদা সৌভং কুরুকুলোদ্বহ
অন্তর্হিতং মায়য়াভূত্ততোঽহং বিস্মিতোঽভবম্
23.4
অথ দানবসংঘাস্তে বিকৃতাননমূর্ধজাঃ
উদক্রোশন্মহারাজ বিষ্ঠিতে ময়ি ভারত
23.5
ততোঽস্ত্রং শব্দসাহং বৈ ত্বরমাণো মহাহবে
অয়োজয়ং তদ্বধায় ততঃ শব্দ উপারমৎ
23.6
হতাস্তে দানবাঃ সর্বে যৈঃ স শব্দ উদীরিতঃ
শরৈরাদিত্যসংকাশৈর্জ্বলিতৈঃ শব্দসাধনৈঃ
23.7
তস্মিন্নুপরতে শব্দে পুনরেবান্যতোঽভবৎ
শব্দোঽপরো মহারাজ তত্রাপি প্রাহরং শরান্
23.8
এবং দশ দিশঃ সর্বাস্তির্যগূর্ধ্বং চ ভারত
নাদয়ামাসুরসুরাস্তে চাপি নিহতা ময়া
23.9
ততঃ প্রাগ্জ্যোতিষং গত্বা পুনরেব ব্যদৃশ্যত
সৌভং কামগমং বীর মোহয়ন্মম চক্ষুষী
23.10
ততো লোকান্তকরণো দানবো বানরাকৃতিঃ
শিলাবর্ষেণ সহসা মহতা মাং সমাবৃণোৎ
23.11
সোঽহং পর্বতবর্ষেণ বধ্যমানঃ সমন্ততঃ
বল্মীক ইব রাজেন্দ্র পর্বতোপচিতোঽভবম্
23.12
ততোঽহং পর্বতচিতঃ সহয়ঃ সহসারথিঃ
অপ্রখ্যাতিমিয়াং রাজন্সধ্বজঃ পর্বতৈশ্চিতঃ
23.13
ততো বৃষ্ণিপ্রবীরা যে মমাসন্সৈনিকাস্তদা
তে ভয়ার্তা দিশঃ সর্বাঃ সহসা বিপ্রদুদ্রুবুঃ
23.14
ততো হাহাকৃতং সর্বমভূত্কিল বিশাং পতে
দ্যৌশ্চ ভূমিশ্চ খং চৈবাদৃশ্যমানে তথা ময়ি
23.15
ততো বিষণ্ণমনসো মম রাজন্সুহৃজ্জনাঃ
রুরুদুশ্চুক্রুশুশ্চৈব দুঃখশোকসমন্বিতাঃ
23.16
দ্বিষতাং চ প্রহর্ষোঽভূদার্তিশ্চাদ্বিষতামপি
এবং বিজিতবান্বীর পশ্চাদশ্রৌষমচ্যুত
23.17
ততোঽহমস্ত্রং দয়িতং সর্বপাষাণভেদনম্
বজ্রমুদ্যম্য তান্সর্বান্পর্বতান্সমশাতয়ম্
23.18
ততঃ পর্বতভারার্তা মন্দপ্রাণবিচেষ্টিতাঃ
হয়া মম মহারাজ বেপমানা ইবাভবন্
23.19
মেঘজালমিবাকাশে বিদার্যাভ্যুদিতং রবিম্
দৃষ্ট্বা মাং বান্ধবাঃ সর্বে হর্ষমাহারয়ন্পুনঃ
23.20
ততো মামব্রবীত্সূতঃ প্রাঞ্জলিঃ প্রণতো নৃপ
সাধু সংপশ্য বার্ষ্ণেয় শাল্বং সৌভপতিং স্থিতম্
23.21
অলং কৃষ্ণাবমন্যৈনং সাধু যত্নং সমাচর
মার্দবং সখিতাং চৈব শাল্বাদদ্য ব্যপাহর
23.22
জহি শাল্বং মহাবাহো মৈনং জীবয় কেশব
সর্বৈঃ পরাক্রমৈর্বীর বধ্যঃ শত্রুরমিত্রহন্
23.23
ন শত্রুরবমন্তব্যো দুর্বলোঽপি বলীয়সা
যোঽপি স্যাত্পীঠগঃ কশ্চিত্কিং পুনঃ সমরে স্থিতঃ
23.24
স ত্বং পুরুষশার্দূল সর্বয়ত্নৈরিমং প্রভো
জহি বৃষ্ণিকুলশ্রেষ্ঠ মা ত্বাং কালোঽত্যগাত্পুনঃ
23.25
নৈষ মার্দবসাধ্যো বৈ মতো নাপি সখা তব
যেন ত্বং যোধিতো বীর দ্বারকা চাবমর্দিতা
23.26
এবমাদি তু কৌন্তেয় শ্রুত্বাহং সারথের্বচঃ
তত্ত্বমেতদিতি জ্ঞাত্বা যুদ্ধে মতিমধারয়ম্
23.27
বধায় শাল্বরাজস্য সৌভস্য চ নিপাতনে
দারুকং চাব্রুবং বীর মুহূর্তং স্থীয়তামিতি
23.28
ততোঽপ্রতিহতং দিব্যমভেদ্যমতিবীর্যবৎ
আগ্নেয়মস্ত্রং দয়িতং সর্বসাহং মহাপ্রভম্
23.29
যক্ষাণাং রাক্ষসানাং চ দানবানাং চ সংয়ুগে
রাজ্ঞাং চ প্রতিলোমানাং ভস্মান্তকরণং মহৎ
23.30
ক্ষুরান্তমমলং চক্রং কালান্তকয়মোপমম্
অভিমন্ত্র্যাহমতুলং দ্বিষতাং চ নিবর্হণম্
23.31
জহি সৌভং স্ববীর্যেণ যে চাত্র রিপবো মম
ইত্যুক্ত্বা ভুজবীর্যেণ তস্মৈ প্রাহিণবং রুষা
23.32
রূপং সুদর্শনস্যাসীদাকাশে পততস্তদা
দ্বিতীয়স্যেব সূর্যস্য যুগান্তে পরিবিষ্যতঃ
23.33
তত্সমাসাদ্য নগরং সৌভং ব্যপগতত্বিষম্
মধ্যেন পাটয়ামাস ক্রকচো দার্বিবোচ্ছ্রিতম্
23.34
দ্বিধা কৃতং ততঃ সৌভং সুদর্শনবলাদ্ধতম্
মহেশ্বরশরোদ্ধূতং পপাত ত্রিপুরং যথা
23.35
তস্মিন্নিপতিতে সৌভে চক্রমাগাত্করং মম
পুনশ্চোদ্ধূয় বেগেন শাল্বায়েত্যহমব্রুবম্
23.36
ততঃ শাল্বং গদাং গুর্বীমাবিধ্যন্তং মহাহবে
দ্বিধা চকার সহসা প্রজজ্বাল চ তেজসা
23.37
তস্মিন্নিপতিতে বীরে দানবাস্ত্রস্তচেতসঃ
হাহাভূতা দিশো জগ্মুরর্দিতা মম সায়কৈঃ
23.38
ততোঽহং সমবস্থাপ্য রথং সৌভসমীপতঃ
শঙ্খং প্রধ্মাপ্য হর্ষেণ সুহৃদঃ পর্যহর্ষয়ম্
23.39
তন্মেরুশিখরাকারং বিধ্বস্তাট্টালগোপুরম্
দহ্যমানমভিপ্রেক্ষ্য স্ত্রিয়স্তাঃ সংপ্রদুদ্রুবুঃ
23.40
এবং নিহত্য সমরে শাল্বং সৌভং নিপাত্য চ
আনর্তান্পুনরাগম্য সুহৃদাং প্রীতিমাবহম্
23.41
এতস্মাত্কারণাদ্রাজন্নাগমং নাগসাহ্বয়ম্
যদ্যগাং পরবীরঘ্ন ন হি জীবেত্সুয়োধনঃ
23.42
বৈশংপায়ন উবাচ
এবমুক্ত্বা মহাবাহুঃ কৌরবং পুরুষোত্তমঃ
আমন্ত্র্য প্রয়য়ৌ ধীমান্পাণ্ডবান্মধুসূদনঃ
23.43
অভিবাদ্য মহাবাহুর্ধর্মরাজং যুধিষ্ঠিরম্
রাজ্ঞা মূর্ধন্যুপাঘ্রাতো ভীমেন চ মহাভুজঃ
23.44
সুভদ্রামভিমন্যুং চ রথমারোপ্য কাঞ্চনম্
আরুরোহ রথং কৃষ্ণঃ পাণ্ডবৈরভিপূজিতঃ
23.45
সৈন্যসুগ্রীবয়ুক্তেন রথেনাদিত্যবর্চসা
দ্বারকাং প্রয়য়ৌ কৃষ্ণঃ সমাশ্বাস্য যুধিষ্ঠিরম্
23.46
ততঃ প্রয়াতে দাশার্হে ধৃষ্টদ্যুম্নোঽপি পার্ষতঃ
দ্রৌপদেয়ানুপাদায় প্রয়য়ৌ স্বপুরং তদা
23.47
ধৃষ্টকেতুঃ স্বসারং চ সমাদায়াথ চেদিরাট্
জগাম পাণ্ডবান্দৃষ্ট্বা রম্যাং শুক্তিমতীং পুরীম্
23.48
কেকয়াশ্চাপ্যনুজ্ঞাতাঃ কৌন্তেয়েনামিতৌজসা
আমন্ত্র্য পাণ্ডবান্সর্বান্প্রয়য়ুস্তেঽপি ভারত
23.49
ব্রাহ্মণাশ্চ বিশশ্চৈব তথা বিষয়বাসিনঃ
বিসৃজ্যমানাঃ সুভৃশং ন ত্যজন্তি স্ম পাণ্ডবান্
23.50
সমবায়ঃ স রাজেন্দ্র সুমহাদ্ভুতদর্শনঃ
আসীন্মহাত্মনাং তেষাং কাম্যকে ভরতর্ষভ
23.51
যুধিষ্ঠিরস্তু বিপ্রাংস্তাননুমান্য মহামনাঃ
শশাস পুরুষান্কালে রথান্যোজয়তেতি হ