Utshovঅধ্যায় 22
22.1
বাসুদেব উবাচ
এবং স পুরুষব্যাঘ্র শাল্বো রাজ্ঞাং মহারিপুঃ
যুধ্যমানো ময়া সংখ্যে বিয়দভ্যাগমত্পুনঃ
22.2
ততঃ শতঘ্নীশ্চ মহাগদাশ্চ; দীপ্তাংশ্চ শূলান্মুসলানসীংশ্চ
চিক্ষেপ রোষান্ময়ি মন্দবুদ্ধিঃ; শাল্বো মহারাজ জয়াভিকাঙ্ক্ষী
22.3
তানাশুগৈরাপততোঽহমাশু; নিবার্য তূর্ণং খগমান্খ এব
দ্বিধা ত্রিধা চাচ্ছিনমাশু মুক্তৈ;স্ততোঽন্তরিক্ষে নিনদো বভূব
22.4
ততঃ শতসহস্রেণ শরাণাং নতপর্বণাম্
দারুকং বাজিনশ্চৈব রথং চ সমবাকিরৎ
22.5
ততো মামব্রবীদ্বীর দারুকো বিহ্বলন্নিব
স্থাতব্যমিতি তিষ্ঠামি শাল্ববাণপ্রপীডিতঃ
22.6
ইতি তস্য নিশম্যাহং সারথেঃ করুণং বচঃ
অবেক্ষমাণো যন্তারমপশ্যং শরপীডিতম্
22.7
ন তস্যোরসি নো মূর্ধ্নি ন কায়ে ন ভুজদ্বয়ে
অন্তরং পাণ্ডবশ্রেষ্ঠ পশ্যামি নহতং শরৈঃ
22.8
স তু বাণবরোত্পীডাদ্বিস্রবত্যসৃগুল্বণম্
অভিবৃষ্টো যথা মেঘৈর্গিরির্গৈরিকধাতুমান্
22.9
অভীষুহস্তং তং দৃষ্ট্বা সীদন্তং সারথিং রণে
অস্তম্ভয়ং মহাবাহো শাল্ববাণপ্রপীডিতম্
22.10
অথ মাং পুরুষঃ কশ্চিদ্দ্বারকানিলয়োঽব্রবীৎ
ত্বরিতো রথমভ্যেত্য সৌহৃদাদিব ভারত
22.11
আহুকস্য বচো বীর তস্যৈব পরিচারকঃ
বিষণ্ণঃ সন্নকণ্ঠো বৈ তন্নিবোধ যুধিষ্ঠির
22.12
দ্বারকাধিপতির্বীর আহ ত্বামাহুকো বচঃ
কেশবেহ বিজানীষ্ব যত্ত্বাং পিতৃসখোঽব্রবীৎ
22.13
উপয়াত্বাদ্য শাল্বেন দ্বারকাং বৃষ্ণিনন্দন
বিষক্তে ত্বয়ি দুর্ধর্ষ হতঃ শূরসুতো বলাৎ
22.14
তদলং সাধু যুদ্ধেন নিবর্তস্ব জনার্দন
দ্বারকামেব রক্ষস্ব কার্যমেতন্মহত্তব
22.15
ইত্যহং তস্য বচনং শ্রুত্বা পরমদুর্মনাঃ
নিশ্চয়ং নাধিগচ্ছামি কর্তব্যস্যেতরস্য বা
22.16
সাত্যকিং বলদেবং চ প্রদ্যুম্নং চ মহারথম্
জগর্হে মনসা বীর তচ্ছ্রুত্বা বিপ্রিয়ং বচঃ
22.17
অহং হি দ্বারকায়াশ্চ পিতুশ্চ কুরুনন্দন
তেষু রক্ষাং সমাধায় প্রয়াতঃ সৌভপাতনে
22.18
বলদেবো মহাবাহুঃ কচ্চিজ্জীবতি শত্রুহা
সাত্যকী রৌক্মিণেয়শ্চ চারুদেষ্ণশ্চ বীর্যবান্
সাম্বপ্রভৃতয়শ্চৈবেত্যহমাসং সুদুর্মনাঃ
22.19
এতেষু হি নরব্যাঘ্র জীবত্সু ন কথংচন
শক্যঃ শূরসুতো হন্তুমপি বজ্রভৃতা স্বয়ম্
22.20
হতঃ শূরসুতো ব্যক্তং ব্যক্তং তে চ পরাসবঃ
বলদেবমুখাঃ সর্বে ইতি মে নিশ্চিতা মতিঃ
22.21
সোঽহং সর্ববিনাশং তং চিন্তয়ানো মুহুর্মুহুঃ
সুবিহ্বলো মহারাজ পুনঃ শাল্বময়োধয়ম্
22.22
ততোঽপশ্যং মহারাজ প্রপতন্তমহং তদা
সৌভাচ্ছূরসুতং বীর ততো মাং মোহ আবিশৎ
22.23
তস্য রূপং প্রপততঃ পিতুর্মম নরাধিপ
যয়াতেঃ ক্ষীণপুণ্যস্য স্বর্গাদিব মহীতলম্
22.24
বিশীর্ণগলিতোষ্ণীষঃ প্রকীর্ণাম্বরমূর্ধজঃ
প্রপতন্দৃশ্যতে হ স্ম ক্ষীণপুণ্য ইব গ্রহঃ
22.25
ততঃ শার্ঙ্গং ধনুঃশ্রেষ্ঠং করাত্প্রপতিতং মম
মোহাত্সন্নশ্চ কৌন্তেয় রথোপস্থ উপাবিশম্
22.26
ততো হাহাকৃতং সর্বং সৈন্যং মে গতচেতনম্
মাং দৃষ্ট্বা রথনীডস্থং গতাসুমিব ভারত
22.27
প্রসার্য বাহূ পততঃ প্রসার্য চরণাবপি
রূপং পিতুরপশ্যং তচ্ছকুনেঃ পততো যথা
22.28
তং পতন্তং মহাবাহো শূলপট্টিশপাণয়ঃ
অভিঘ্নন্তো ভৃশং বীরা মম চেতো ব্যকম্পয়ন্
22.29
ততো মুহূর্তাত্প্রতিলভ্য সংজ্ঞা;মহং তদা বীর মহাবিমর্দে
ন তত্র সৌভং ন রিপুং ন শাল্বং; পশ্যামি বৃদ্ধং পিতরং ন চাপি
22.30
ততো মমাসীন্মনসি মায়েয়মিতি নিশ্চিতম্
প্রবুদ্ধোঽস্মি ততো ভূয়ঃ শতশো বিকিরঞ্শরান্