Utshovঅধ্যায় 21
21.1
বাসুদেব উবাচ
আনর্তনগরং মুক্তং ততোঽহমগমং তদা
মহাক্রতৌ রাজসূয়ে নিবৃত্তে নৃপতে তব
21.2
অপশ্যং দ্বারকাং চাহং মহারাজ হতত্বিষম্
নিঃস্বাধ্যায়বষট্কারাং নির্ভূষণবরস্ত্রিয়ম্
21.3
অনভিজ্ঞেয়রূপাণি দ্বারকোপবনানি চ
দৃষ্ট্বা শঙ্কোপপন্নোঽহমপৃচ্ছং হৃদিকাত্মজম্
21.4
অস্বস্থনরনারীকমিদং বৃষ্ণিপুরং ভৃশম্
কিমিদং নরশার্দূল শ্রোতুমিচ্ছামহে বয়ম্
21.5
এবমুক্তস্তু স ময়া বিস্তরেণেদমব্রবীৎ
রোধং মোক্ষং চ শাল্বেন হার্দিক্যো রাজসত্তম
21.6
ততোঽহং কৌরবশ্রেষ্ঠ শ্রুত্বা সর্বমশেষতঃ
বিনাশে শাল্বরাজস্য তদৈবাকরবং মতিম্
21.7
ততোঽহং ভরতশ্রেষ্ঠ সমাশ্বাস্য পুরে জনম্
রাজানমাহুকং চৈব তথৈবানকদুন্দুভিম্
সর্ববৃষ্ণিপ্রবীরাংশ্চ হর্ষয়ন্নব্রুবং তদা
21.8
অপ্রমাদঃ সদা কার্যো নগরে যাদবর্ষভাঃ
শাল্বরাজবিনাশায় প্রয়াতং মাং নিবোধত
21.9
নাহত্বা তং নিবর্তিষ্যে পুরীং দ্বারবতীং প্রতি
সশাল্বং সৌভনগরং হত্বা দ্রষ্টাস্মি বঃ পুনঃ
ত্রিসামা হন্যতামেষা দুন্দুভিঃ শত্রুভীষণী
21.10
তে ময়াশ্বাসিতা বীরা যথাবদ্ভরতর্ষভ
সর্বে মামব্রুবন্হৃষ্টাঃ প্রয়াহি জহি শাত্রবান্
21.11
তৈঃ প্রহৃষ্টাত্মভির্বীরৈরাশীর্ভিরভিনন্দিতঃ
বাচয়িত্বা দ্বিজশ্রেষ্ঠান্প্রণম্য শিরসাহুকম্
21.12
সৈন্যসুগ্রীবয়ুক্তেন রথেনানাদয়ন্দিশঃ
প্রধ্মাপ্য শঙ্খপ্রবরং পাঞ্চজন্যমহং নৃপ
21.13
প্রয়াতোঽস্মি নরব্যাঘ্র বলেন মহতা বৃতঃ
কৢপ্তেন চতুরঙ্গেণ বলেন জিতকাশিনা
21.14
সমতীত্য বহূন্দেশান্গিরীংশ্চ বহুপাদপান্
সরাংসি সরিতশ্চৈব মার্ত্তিকাবতমাসদম্
21.15
তত্রাশ্রৌষং নরব্যাঘ্র শাল্বং নগরমন্তিকাৎ
প্রয়াতং সৌভমাস্থায় তমহং পৃষ্ঠতোঽন্বয়াম্
21.16
ততঃ সাগরমাসাদ্য কুক্ষৌ তস্য মহোর্মিণঃ
সমুদ্রনাভ্যাং শাল্বোঽভূত্সৌভমাস্থায় শত্রুহন্
21.17
স সমালোক্য দূরান্মাং স্ময়ন্নিব যুধিষ্ঠির
আহ্বয়ামাস দুষ্টাত্মা যুদ্ধায়ৈব মুহুর্মুহুঃ
21.18
তস্য শার্ঙ্গবিনির্মুক্তৈর্বহুভির্মর্মভেদিভিঃ
পুরং নাসাদ্যত শরৈস্ততো মাং রোষ আবিশৎ
21.19
স চাপি পাপপ্রকৃতির্দৈতেয়াপসদো নৃপ
ময্যবর্ষত দুর্ধর্ষঃ শরধারাঃ সহস্রশঃ
21.20
সৈনিকান্মম সূতং চ হয়াংশ্চ সমবাকিরৎ
অচিন্তয়ন্তস্তু শরান্বয়ং যুধ্যাম ভারত
21.21
ততঃ শতসহস্রাণি শরাণাং নতপর্বণাম্
চিক্ষিপুঃ সমরে বীরা ময়ি শাল্বপদানুগাঃ
21.22
তে হয়ান্মে রথং চৈব তদা দারুকমেব চ
ছাদয়ামাসুরসুরা বাণৈর্মর্মবিভেদিভিঃ
21.23
ন হয়া ন রথো বীর ন যন্তা মম দারুকঃ
অদৃশ্যন্ত শরৈশ্ছন্নাস্তথাহং সৈনিকাশ্চ মে
21.24
ততোঽহমপি কৌরব্য শরাণাময়ুতান্বহূন্
অভিমন্ত্রিতানাং ধনুষা দিব্যেন বিধিনাক্ষিপম্
21.25
ন তত্র বিষয়স্ত্বাসীন্মম সৈন্যস্য ভারত
খে বিষক্তং হি তত্সৌভং ক্রোশমাত্র ইবাভবৎ
21.26
ততস্তে প্রেক্ষকাঃ সর্বে রঙ্গবাট ইব স্থিতাঃ
হর্ষয়ামাসুরুচ্চৈর্মাং সিংহনাদতলস্বনৈঃ
21.27
মত্কার্মুকবিনির্মুক্তা দানবানাং মহারণে
অঙ্গেষু রুধিরাক্তাস্তে বিবিশুঃ শলভা ইব
21.28
ততো হলহলাশব্দঃ সৌভমধ্যে ব্যবর্ধত
বধ্যতাং বিশিখৈস্তীক্ষ্ণৈঃ পততাং চ মহার্ণবে
21.29
তে নিকৃত্তভুজস্কন্ধাঃ কবন্ধাকৃতিদর্শনাঃ
নদন্তো ভৈরবান্নাদন্নিপতন্তি স্ম দানবাঃ
21.30
ততো গোক্ষীরকুন্দেন্দুমৃণালরজতপ্রভম্
জলজং পাঞ্চজন্যং বৈ প্রাণেনাহমপূরয়ম্
21.31
তান্দৃষ্ট্বা পতিতাংস্তত্র শাল্বঃ সৌভপতিস্তদা
মায়ায়ুদ্ধেন মহতা যোধয়ামাস মাং যুধি
21.32
ততো হুডহুডাঃ প্রাসাঃ শক্তিশূলপরশ্বধাঃ
পট্টিশাশ্চ ভুশুণ্ড্যশ্চ প্রাপতন্ননিশং ময়ি
21.33
তানহং মায়য়ৈবাশু প্রতিগৃহ্য ব্যনাশয়ম্
তস্যাং হতায়াং মায়ায়াং গিরিশৃঙ্গৈরয়োধয়ৎ
21.34
ততোঽভবত্তম ইব প্রভাতমিব চাভবৎ
দুর্দিনং সুদিনং চৈব শীতমুষ্ণং চ ভারত
21.35
এবং মায়াং বিকুর্বাণো যোধয়ামাস মাং রিপুঃ
বিজ্ঞায় তদহং সর্বং মায়য়ৈব ব্যনাশয়ম্
যথাকালং তু যুদ্ধেন ব্যধমং সর্বতঃ শরৈঃ
21.36
ততো ব্যোম মহারাজ শতসূর্যমিবাভবৎ
শতচন্দ্রং চ কৌন্তেয় সহস্রায়ুততারকম্
21.37
ততো নাজ্ঞায়ত তদা দিবারাত্রং তথা দিশঃ
ততোঽহং মোহমাপন্নঃ প্রজ্ঞাস্ত্রং সময়োজয়ম্
ততস্তদস্ত্রমস্ত্রেণ বিধূতং শরতূলবৎ
21.38
তথা তদভবদ্যুদ্ধং তুমুলং লোমহর্ষণম্
লব্ধালোকশ্চ রাজেন্দ্র পুনঃ শত্রুময়োধয়ম্