Utshovঅধ্যায় 20
20.1
বাসুদেব উবাচ
এবমুক্তস্তু কৌন্তেয় সূতপুত্রস্তদা মৃধে
প্রদ্যুম্নমব্রবীচ্ছ্লক্ষ্ণং মধুরং বাক্যমঞ্জসা
20.2
ন মে ভয়ং রৌক্মিণেয় সংগ্রামে যচ্ছতো হয়ান্
যুদ্ধজ্ঞশ্চাস্মি বৃষ্ণীনাং নাত্র কিংচিদতোঽন্যথা
20.3
আয়ুষ্মন্নুপদেশস্তু সারথ্যে বর্ততাং স্মৃতঃ
সর্বার্থেষু রথী রক্ষ্যস্ত্বং চাপি ভৃশপীডিতঃ
20.4
ত্বং হি শাল্বপ্রয়ুক্তেন পত্রিণাভিহতো ভৃশম্
কশ্মলাভিহতো বীর ততোঽহমপয়াতবান্
20.5
স ত্বং সাত্বতমুখ্যাদ্য লব্ধসংজ্ঞো যদৃচ্ছয়া
পশ্য মে হয়সংয়ানে শিক্ষাং কেশবনন্দন
20.6
দারুকেণাহমুত্পন্নো যথাবচ্চৈব শিক্ষিতঃ
বীতভীঃ প্রবিশাম্যেতাং শাল্বস্য মহতীং চমূম্
20.7
এবমুক্ত্বা ততো বীর হয়ান্সংচোদ্য সংগরে
রশ্মিভিশ্চ সমুদ্যম্য জবেনাভ্যপতত্তদা
20.8
মণ্ডলানি বিচিত্রাণি যমকানীতরাণি চ
সব্যানি চ বিচিত্রাণি দক্ষিণানি চ সর্বশঃ
20.9
প্রতোদেনাহতা রাজন্রশ্মিভিশ্চ সমুদ্যতাঃ
উত্পতন্ত ইবাকাশং বিবভুস্তে হয়োত্তমাঃ
20.10
তে হস্তলাঘবোপেতং বিজ্ঞায় নৃপ দারুকিম্
দহ্যমানা ইব তদা পস্পৃশুশ্চরণৈর্মহীম্
20.11
সোঽপসব্যাং চমূং তস্য শাল্বস্য ভরতর্ষভ
চকার নাতিয়ত্নেন তদদ্ভুতমিবাভবৎ
20.12
অমৃষ্যমাণোঽপসব্যং প্রদ্যুম্নেন স সৌভরাট্
যন্তারমস্য সহসা ত্রিভির্বাণৈঃ সমর্পয়ৎ
20.13
দারুকস্য সুতস্তং তু বাণবেগমচিন্তয়ন্
ভূয় এব মহাবাহো প্রয়য়ৌ হয়সংমতঃ
20.14
ততো বাণান্বহুবিধান্পুনরেব স সৌভরাট্
মুমোচ তনয়ে বীরে মম রুক্মিণিনন্দনে
20.15
তানপ্রাপ্তাঞ্শিতৈর্বাণৈশ্চিচ্ছেদ পরবীরহা
রৌক্মিণেয়ঃ স্মিতং কৃত্বা দর্শয়ন্হস্তলাঘবম্
20.16
ছিন্নান্দৃষ্ট্বা তু তান্বাণান্প্রদ্যুম্নেন স সৌভরাট্
আসুরীং দারুণীং মায়ামাস্থায় ব্যসৃজচ্ছরান্
20.17
প্রয়ুজ্যমানমাজ্ঞায় দৈতেয়াস্ত্রং মহাবলঃ
ব্রহ্মাস্ত্রেণান্তরা ছিত্ত্বা মুমোচান্যান্পতত্রিণঃ
20.18
তে তদস্ত্রং বিধূয়াশু বিব্যধূ রুধিরাশনাঃ
শিরস্যুরসি বক্ত্রে চ স মুমোহ পপাত চ
20.19
তস্মিন্নিপতিতে ক্ষুদ্রে শাল্বে বাণপ্রপীডিতে
রৌক্মিণেয়োঽপরং বাণং সংদধে শত্রুনাশনম্
20.20
তমর্চিতং সর্বদাশার্হপূগৈ;রাশীর্ভিরর্কজ্বলনপ্রকাশম্
দৃষ্ট্বা শরং জ্যামভিনীয়মানং; বভূব হাহাকৃতমন্তরিক্ষম্
20.21
ততো দেবগণাঃ সর্বে সেন্দ্রাঃ সহ ধনেশ্বরাঃ
নারদং প্রেষয়ামাসুঃ শ্বসনং চ মহাবলম্
20.22
তৌ রৌক্মিণেয়মাগম্য বচোঽব্রূতাং দিবৌকসাম্
নৈষ বধ্যস্ত্বয়া বীর শাল্বরাজঃ কথংচন
20.23
সংহরস্ব পুনর্বাণমবধ্যোঽয়ং ত্বয়া রণে
এতস্য হি শরস্যাজৌ নাবধ্যোঽস্তি পুমান্ক্বচিৎ
20.24
মৃত্যুরস্য মহাবাহো রণে দেবকিনন্দনঃ
কৃষ্ণঃ সংকল্পিতো ধাত্রা তন্ন মিথ্যা ভবেদিতি
20.25
ততঃ পরমসংহৃষ্টঃ প্রদ্যুম্নঃ শরমুত্তমম্
সংজহার ধনুঃশ্রেষ্ঠাত্তূণে চৈব ন্যবেশয়ৎ
20.26
তত উত্থায় রাজেন্দ্র শাল্বঃ পরমদুর্মনাঃ
ব্যপায়াত্সবলস্তূর্ণং প্রদ্যুম্নশরপীডিতঃ
20.27
স দ্বারকাং পরিত্যজ্য ক্রূরো বৃষ্ণিভিরর্দিতঃ
সৌভমাস্থায় রাজেন্দ্র দিবমাচক্রমে তদা