Utshovঅধ্যায় 19
19.1
বাসুদেব উবাচ
শাল্ববাণার্দিতে তস্মিন্প্রদ্যুম্নে বলিনাং বরে
বৃষ্ণয়ো ভগ্নসংকল্পা বিব্যথুঃ পৃতনাগতাঃ
19.2
হাহাকৃতমভূত্সার্বং বৃষ্ণ্যন্ধকবলং তদা
প্রদ্যুম্নে পতিতে রাজন্পরে চ মুদিতাভবন্
19.3
তং তথা মোহিতং দৃষ্ট্বা সারথির্জবনৈর্হয়ৈঃ
রণাদপাহরত্তূর্ণং শিক্ষিতো দারুকিস্ততঃ
19.4
নাতিদূরাপয়াতে তু রথে রথবরপ্রণুৎ
ধনুর্গৃহীত্বা যন্তারং লব্ধসংজ্ঞোঽব্রবীদিদম্
19.5
সৌতে কিং তে ব্যবসিতং কস্মাদ্যাসি পরাঙ্মুখঃ
নৈষ বৃষ্ণিপ্রবীরাণামাহবে ধর্ম উচ্যতে
19.6
কচ্চিত্সৌতে ন তে মোহঃ শাল্বং দৃষ্ট্বা মহাহবে
বিষাদো বা রণং দৃষ্ট্বা ব্রূহি মে ত্বং যথাতথম্
19.7
সূত উবাচ
জানার্দনে ন মে মোহো নাপি মে ভয়মাবিশৎ
অতিভারং তু তে মন্যে শাল্বং কেশবনন্দন
19.8
সোঽপয়ামি শনৈর্বীর বলবানেষ পাপকৃৎ
মোহিতশ্চ রণে শূরো রক্ষ্যঃ সারথিনা রথী
19.9
আয়ুষ্মংস্ত্বং ময়া নিত্যং রক্ষিতব্যস্ত্বয়াপ্যহম্
রক্ষিতব্যো রথী নিত্যমিতি কৃত্বাপয়াম্যহম্
19.10
একশ্চাসি মহাবাহো বহবশ্চাপি দানবাঃ
নসমং রৌক্মিণেয়াহং রণং মত্বাপয়াম্যহম্
19.11
বাসুদেব উবাচ
এবং ব্রুবতি সূতে তু তদা মকরকেতুমান্
উবাচ সূতং কৌরব্য নিবর্তয় রথং পুনঃ
19.12
দারুকাত্মজ মৈবং ত্বং পুনঃ কার্ষীঃ কথংচন
ব্যপয়ানং রণাত্সৌতে জীবতো মম কর্হিচিৎ
19.13
ন স বৃষ্ণিকুলে জাতো যো বৈ ত্যজতি সংগরম্
যো বা নিপতিতং হন্তি তবাস্মীতি চ বাদিনম্
19.14
তথা স্ত্রিয়ং বৈ যো হন্তি বৃদ্ধং বালং তথৈব চ
বিরথং বিপ্রকীর্ণং চ ভগ্নশস্ত্রায়ুধং তথা
19.15
ত্বং চ সূতকুলে জাতো বিনীতঃ সূতকর্মণি
ধর্মজ্ঞশ্চাসি বৃষ্ণীনামাহবেষ্বপি দারুকে
19.16
স জানংশ্চরিতং কৃত্স্নং বৃষ্ণীনাং পৃতনামুখে
অপয়ানং পুনঃ সৌতে মৈবং কার্ষীঃ কথংচন
19.17
অপয়াতং হতং পৃষ্ঠে ভীতং রণপলায়িনম্
গদাগ্রজো দুরাধর্ষঃ কিং মাং বক্ষ্যতি মাধবঃ
19.18
কেশবস্যাগ্রজো বাপি নীলবাসা মদোত্কটঃ
কিং বক্ষ্যতি মহাবাহুর্বলদেবঃ সমাগতঃ
19.19
কিং বক্ষ্যতি শিনের্নপ্তা নরসিংহো মহাধনুঃ
অপয়াতং রণাত্সৌতে সাম্বশ্চ সমিতিংজয়ঃ
19.20
চারুদেষ্ণশ্চ দুর্ধর্ষস্তথৈব গদসারণৌ
অক্রূরশ্চ মহাবাহুঃ কিং মাং বক্ষ্যতি সারথে
19.21
শূরং সংভাবিতং সন্তং নিত্যং পুরুষমানিনম্
স্ত্রিয়শ্চ বৃষ্ণীবীরাণাং কিং মাং বক্ষ্যন্তি সংগতাঃ
19.22
প্রদ্যুম্নোঽয়মুপায়াতি ভীতস্ত্যক্ত্বা মহাহবম্
ধিগেনমিতি বক্ষ্যন্তি ন তু বক্ষ্যন্তি সাধ্বিতি
19.23
ধিগ্বাচা পরিহাসোঽপি মম বা মদ্বিধস্য বা
মৃত্যুনাভ্যধিকঃ সৌতে স ত্বং মা ব্যপয়াঃ পুনঃ
19.24
ভারং হি ময়ি সংন্যস্য যাতো মধুনিহা হরিঃ
যজ্ঞং ভরতসিংহস্য পার্থস্যামিততেজসঃ
19.25
কৃতবর্মা ময়া বীরো নির্যাস্যন্নেব বারিতঃ
শাল্বং নিবারয়িষ্যেঽহং তিষ্ঠ ত্বমিতি সূতজ
19.26
স চ সংভাবয়ন্মাং বৈ নিবৃত্তো হৃদিকাত্মজঃ
তং সমেত্য রণং ত্যক্ত্বা কিং বক্ষ্যামি মহারথম্
19.27
উপয়াতং দুরাধর্ষং শঙ্খচক্রগদাধরম্
পুরুষং পুণ্ডরীকাক্ষং কিং বক্ষ্যামি মহাভুজম্
19.28
সাত্যকিং বলদেবং চ যে চান্যেঽন্ধকবৃষ্ণয়ঃ
ময়া স্পর্ধন্তি সততং কিং নু বক্ষ্যামি তানহম্
19.29
ত্যক্ত্বা রণমিমং সৌতে পৃষ্ঠতোঽভ্যাহতঃ শরৈঃ
ত্বয়াপনীতো বিবশো ন জীবেয়ং কথংচন
19.30
স নিবর্ত রথেনাশু পুনর্দারুকনন্দন
ন চৈতদেবং কর্তব্যমথাপত্সু কথংচন
19.31
ন জীবিতমহং সৌতে বহু মন্যে কদাচন
অপয়াতো রণাদ্ভীতঃ পৃষ্ঠতোঽভ্যাহতঃ শরৈঃ
19.32
কদা বা সূতপুত্র ত্বং জানীষে মাং ভয়ার্দিতম্
অপয়াতং রণং হিত্বা যথা কাপুরুষং তথা
19.33
ন যুক্তং ভবতা ত্যক্তুং সংগ্রামং দারুকাত্মজ
ময়ি যুদ্ধার্থিনি ভৃশং স ত্বং যাহি যতো রণম্