Utshovঅধ্যায় 18
18.1
বাসুদেব উবাচ
এবমুক্ত্বা রৌক্মিণেয়ো যাদবান্ভরতর্ষভ
দংশিতৈর্হরিভির্যুক্তং রথমাস্থায় কাঞ্চনম্
18.2
উচ্ছ্রিত্য মকরং কেতুং ব্যাত্তাননমলংকৃতম্
উত্পতদ্ভিরিবাকাশং তৈর্হয়ৈরন্বয়াত্পরান্
18.3
বিক্ষিপন্নাদয়ংশ্চাপি ধনুঃশ্রেষ্ঠং মহাবলঃ
তূণখড্গধরঃ শূরো বদ্ধগোধাঙ্গুলিত্রবান্
18.4
স বিদ্যুচ্চলিতং চাপং বিহরন্বৈ তলাত্তলম্
মোহয়ামাস দৈতেয়ান্সর্বান্সৌভনিবাসিনঃ
18.5
নাস্য বিক্ষিপতশ্চাপং সংদধানস্য চাসকৃৎ
অন্তরং দদৃশে কশ্চিন্নিঘ্নতঃ শাত্রবান্রণে
18.6
মুখস্য বর্ণো ন বিকল্পতেঽস্য; চেলুশ্চ গাত্রাণি ন চাপি তস্য
সিংহোন্নতং চাপ্যভিগর্জতোঽস্য; শুশ্রাব লোকোঽদ্ভুতরূপমগ্র্যম্
18.7
জলেচরঃ কাঞ্চনয়ষ্টিসংস্থো; ব্যাত্তাননঃ সর্বতিমিপ্রমাথী
বিত্রাসয়ন্রাজতি বাহমুখ্যে; শাল্বস্য সেনাপ্রমুখে ধ্বজাগ্র্যঃ
18.8
ততঃ স তূর্ণং নিষ্পত্য প্রদ্যুম্নঃ শত্রুকর্শনঃ
শাল্বমেবাভিদুদ্রাব বিধাস্যন্কলহং নৃপ
18.9
অভিয়ানং তু বীরেণ প্রদ্যুম্নেন মহাহবে
নামর্ষয়ত সংক্রুদ্ধঃ শাল্বঃ কুরুকুলোদ্বহ
18.10
স রোষমদমত্তো বৈ কামগাদবরুহ্য চ
প্রদ্যুম্নং যোধয়ামাস শাল্বঃ পরপুরংজয়ঃ
18.11
তয়োঃ সুতুমুলং যুদ্ধং শাল্ববৃষ্ণিপ্রবীরয়োঃ
সমেতা দদৃশুর্লোকা বলিবাসবয়োরিব
18.12
তস্য মায়াময়ো বীর রথো হেমপরিষ্কৃতঃ
সধ্বজঃ সপতাকশ্চ সানুকর্ষঃ সতূণবান্
18.13
স তং রথবরং শ্রীমান্সমারুহ্য কিল প্রভো
মুমোচ বাণান্কৌরব্য প্রদ্যুম্নায় মহাবলঃ
18.14
ততো বাণময়ং বর্ষং ব্যসৃজত্তরসা রণে
প্রদ্যুম্নো ভুজবেগেন শাল্বং সংমোহয়ন্নিব
18.15
স তৈরভিহতঃ সংখ্যে নামর্ষয়ত সৌভরাট্
শরান্দীপ্তাগ্নিসংকাশান্মুমোচ তনয়ে মম
18.16
স শাল্ববাণৈ রাজেন্দ্র বিদ্ধো রুক্মিণিনন্দনঃ
মুমোচ বাণং ত্বরিতো মর্মভেদিনমাহবে
18.17
তস্য বর্ম বিভিদ্যাশু স বাণো মত্সুতেরিতঃ
বিভেদ হৃদয়ং পত্রী স পপাত মুমোহ চ
18.18
তস্মিন্নিপতিতে বীরে শাল্বরাজে বিচেতসি
সংপ্রাদ্রবন্দানবেন্দ্রা দারয়ন্তো বসুংধরাম্
18.19
হাহাকৃতমভূত্সৈন্যং শাল্বস্য পৃথিবীপতে
নষ্টসংজ্ঞে নিপতিতে তদা সৌভপতৌ নৃপ
18.20
তত উত্থায় কৌরব্য প্রতিলভ্য চ চেতনাম্
মুমোচ বাণং তরসা প্রদ্যুম্নায় মহাবলঃ
18.21
তেন বিদ্ধো মহাবাহুঃ প্রদ্যুম্নঃ সমরে স্থিতঃ
জত্রুদেশে ভৃশং বীরো ব্যবাসীদদ্রথে তদা
18.22
তং স বিদ্ধ্বা মহারাজ শাল্বো রুক্মিণিনন্দনম্
ননাদ সিংহনাদং বৈ নাদেনাপূরয়ন্মহীম্
18.23
ততো মোহং সমাপন্নে তনয়ে মম ভারত
মুমোচ বাণাংস্ত্বরিতঃ পুনরন্যান্দুরাসদান্
18.24
স তৈরভিহতো বাণৈর্বহুভিস্তেন মোহিতঃ
নিশ্চেষ্টঃ কৌরবশ্রেষ্ঠ প্রদ্যুম্নোঽভূদ্রণাজিরে