Utshovঅধ্যায় 17
17.1
বাসুদেব উবাচ
তাং তূপয়াত্বা রাজেন্দ্র শাল্বঃ সৌভপতিস্তদা
প্রভূতনরনাগেন বলেনোপবিবেশ হ
17.2
সমে নিবিষ্টা সা সেনা প্রভূতসলিলাশয়ে
চতুরঙ্গবলোপেতা শাল্বরাজাভিপালিতা
17.3
বর্জয়িত্বা শ্মশানানি দেবতায়তনানি চ
বল্মীকাংশ্চৈব চৈত্যাংশ্চ তন্নিবিষ্টমভূদ্বলম্
17.4
অনীকানাং বিভাগেন পন্থানঃ ষট্কৃতাভবন্
প্রবণা নব চৈবাসঞ্শাল্বস্য শিবিরে নৃপ
17.5
সর্বায়ুধসমোপেতং সর্বশস্ত্রবিশারদম্
রথনাগাশ্বকলিলং পদাতিধ্বজসংকুলম্
17.6
তুষ্টপুষ্টজনোপেতং বীরলক্ষণলক্ষিতম্
বিচিত্রধ্বজসংনাহং বিচিত্ররথকার্মুকম্
17.7
সংনিবেশ্য চ কৌরব্য দ্বারকায়াং নরর্ষভ
অভিসারয়ামাস তদা বেগেন পতগেন্দ্রবৎ
17.8
তদাপতন্তং সংদৃশ্য বলং শাল্বপতেস্তদা
নির্যায় যোধয়ামাসুঃ কুমারা বৃষ্ণিনন্দনাঃ
17.9
অসহন্তোঽভিয়ানং তচ্ছাল্বরাজস্য কৌরব
চারুদেষ্ণশ্চ সাম্বশ্চ প্রদ্যুম্নশ্চ মহারথঃ
17.10
তে রথৈর্দংশিতাঃ সর্বে বিচিত্রাভরণধ্বজাঃ
সংসক্তাঃ শাল্বরাজস্য বহুভির্যোধপুংগবৈঃ
17.11
গৃহীত্বা তু ধনুঃ সাম্বঃ শাল্বস্য সচিবং রণে
যোধয়ামাস সংহৃষ্টঃ ক্ষেমবৃদ্ধিং চমূপতিম্
17.12
তস্য বাণময়ং বর্ষং জাম্ববত্যাঃ সুতো মহৎ
মুমোচ ভরতশ্রেষ্ঠ যথা বর্ষং সহস্রদৃক্
17.13
তদ্বাণবর্ষং তুমুলং বিষেহে স চমূপতিঃ
ক্ষেমবৃদ্ধির্মহারাজ হিমবানিব নিশ্চলঃ
17.14
ততঃ সাম্বায় রাজেন্দ্র ক্ষেমবৃদ্ধিরপি স্ম হ
মুমোচ মায়াবিহিতং শরজালং মহত্তরম্
17.15
ততো মায়াময়ং জালং মায়য়ৈব বিদার্য সঃ
সাম্বঃ শরসহস্রেণ রথমস্যাভ্যবর্ষত
17.16
ততঃ স বিদ্ধঃ সাম্বেন ক্ষেমবৃদ্ধিশ্চমূপতিঃ
অপায়াজ্জবনৈরশ্বৈঃ সাম্ববাণপ্রপীডিতঃ
17.17
তস্মিন্বিপ্রদ্রুতে ক্রূরে শাল্বস্যাথ চমূপতৌ
বেগবান্নাম দৈতেয়ঃ সুতং মেঽভ্যদ্রবদ্বলী
17.18
অভিপন্নস্তু রাজেন্দ্র সাম্বো বৃষ্ণিকুলোদ্বহঃ
বেগং বেগবতো রাজংস্তস্থৌ বীরো বিধারয়ন্
17.19
স বেগবতি কৌন্তেয় সাম্বো বেগবতীং গদাম্
চিক্ষেপ তরসা বীরো ব্যাবিধ্য সত্যবিক্রমঃ
17.20
তয়া ত্বভিহতো রাজন্বেগবানপতদ্ভুবি
বাতরুগ্ণ ইব ক্ষুণ্ণো জীর্ণমূলো বনস্পতিঃ
17.21
তস্মিন্নিপতিতে বীরে গদানুন্নে মহাসুরে
প্রবিশ্য মহতীং সেনাং যোধয়ামাস মে সুতঃ
17.22
চারুদেষ্ণেন সংসক্তো বিবিন্ধ্যো নাম দানবঃ
মহারথঃ সমাজ্ঞাতো মহারাজ মহাধনুঃ
17.23
ততঃ সুতুমুলং যুদ্ধং চারুদেষ্ণবিবিন্ধ্যয়োঃ
বৃত্রবাসবয়ো রাজন্যথা পূর্বং তথাভবৎ
17.24
অন্যোন্যস্যাভিসংক্রুদ্ধাবন্যোন্যং জঘ্নতুঃ শরৈঃ
বিনদন্তৌ মহারাজ সিংহাবিব মহাবলৌ
17.25
রৌক্মিণেয়স্ততো বাণমগ্ন্যর্কোপমবর্চসম্
অভিমন্ত্র্য মহাস্ত্রেণ সংদধে শত্রুনাশনম্
17.26
স বিবিন্ধ্যায় সক্রোধঃ সমাহূয় মহারথঃ
চিক্ষেপ মে সুতো রাজন্স গতাসুরথাপতৎ
17.27
বিবিন্ধ্যং নিহতং দৃষ্ট্বা তাং চ বিক্ষোভিতাং চমূম্
কামগেন স সৌভেন শাল্বঃ পুনরুপাগমৎ
17.28
ততো ব্যাকুলিতং সর্বং দ্বারকাবাসি তদ্বলম্
দৃষ্ট্বা শাল্বং মহাবাহো সৌভস্থং পৃথিবীগতম্
17.29
ততো নির্যায় কৌন্তেয় ব্যবস্থাপ্য চ তদ্বলম্
আনর্তানাং মহারাজ প্রদ্যুম্নো বাক্যমব্রবীৎ
17.30
সর্বে ভবন্তস্তিষ্ঠন্তু সর্বে পশ্যন্তু মাং যুধি
নিবারয়ন্তং সংগ্রামে বলাত্সৌভং সরাজকম্
17.31
অহং সৌভপতেঃ সেনামায়সৈর্ভুজগৈরিব
ধনুর্ভুজবিনির্মুক্তৈর্নাশয়াম্যদ্য যাদবাঃ
17.32
আশ্বসধ্বং ন ভীঃ কার্যা সৌভরাডদ্য নশ্যতি
ময়াভিপন্নো দুষ্টাত্মা সসৌভো বিনশিষ্যতি
17.33
এবং ব্রুবতি সংহৃষ্টে প্রদ্যুম্নে পাণ্ডুনন্দন
বিষ্ঠিতং তদ্বলং বীর যুয়ুধে চ যথাসুখম্