অধ্যায় 16

16.1

যুধিষ্ঠির উবাচ
বাসুদেব মহাবাহো বিস্তরেণ মহামতে
সৌভস্য বধমাচক্ষ্ব ন হি তৃপ্যামি কথ্যতঃ

বাসুদেব উবাচ
হতং শ্রুত্বা মহাবাহো ময়া শ্রৌতশ্রবং নৃপম্
উপায়াদ্ভরতশ্রেষ্ঠ শাল্বো দ্বারবতীং পুরীম্

অরুন্ধত্তাং সুদুষ্টাত্মা সর্বতঃ পাণ্ডুনন্দন
শাল্বো বৈহায়সং চাপি তত্পুরং ব্যূহ্য বিষ্ঠিতঃ

তত্রস্থোঽথ মহীপালো যোধয়ামাস তাং পুরীম্
অভিসারেণ সর্বেণ তত্র যুদ্ধমবর্তত

পুরী সমন্তাদ্বিহিতা সপতাকা সতোরণা
সচক্রা সহুডা চৈব সয়ন্ত্রখনকা তথা

সোপতল্পপ্রতোলীকা সাট্টাট্টালকগোপুরা
সকচগ্রহণী চৈব সোল্কালাতাবপোথিকা

সোষ্ট্রিকা ভরতশ্রেষ্ঠ সভেরীপণবানকা
সমিত্তৃণকুশা রাজন্সশতঘ্নীকলাঙ্গলা

সভুশুণ্ড্যশ্মলগুডা সায়ুধা সপরশ্বধা
লোহচর্মবতী চাপি সাগ্নিঃ সহুডশৃঙ্গিকা

শাস্ত্রদৃষ্টেন বিধিনা সংয়ুক্তা ভরতর্ষভ
দ্রব্যৈরনেকৈর্বিবিধৈর্গদসাম্বোদ্ধবাদিভিঃ

পুরুষৈঃ কুরুশার্দূল সমর্থৈঃ প্রতিবাধনে
অভিখ্যাতকুলৈর্বীরৈর্দৃষ্টবীর্যৈশ্চ সংয়ুগে

মধ্যমেন চ গুল্মেন রক্ষিতা সারসংজ্ঞিতা
উত্ক্ষিপ্তগুল্মৈশ্চ তথা হয়ৈশ্চৈব পদাতিভিঃ

আঘোষিতং চ নগরে ন পাতব্যা সুরেতি হ
প্রমাদং পরিরক্ষদ্ভিরুগ্রসেনোদ্ধবাদিভিঃ

প্রমত্তেষ্বভিঘাতং হি কুর্যাচ্ছাল্বো নরাধিপঃ
ইতি কৃত্বাপ্রমত্তাস্তে সর্বে বৃষ্ণ্যন্ধকাঃ স্থিতাঃ

আনর্তাশ্চ তথা সর্বে নটনর্তকগায়নাঃ
বহির্বিবাসিতাঃ সর্বে রক্ষদ্ভির্বিত্তসংচয়ান্

সংক্রমা ভেদিতাঃ সর্বে নাবশ্চ প্রতিষেধিতাঃ
পরিখাশ্চাপি কৌরব্য কীলৈঃ সুনিচিতাঃ কৃতাঃ

উদপানাঃ কুরুশ্রেষ্ঠ তথৈবাপ্যম্বরীষকাঃ
সমন্তাত্ক্রোশমাত্রং চ কারিতা বিষমা চ ভূঃ

প্রকৃত্যা বিষমং দুর্গং প্রকৃত্যা চ সুরক্ষিতম্
প্রকৃত্যা চায়ুধোপেতং বিশেষেণ তদানঘ

সুরক্ষিতং সুগুপ্তং চ সর্বায়ুধসমন্বিতম্
তত্পুরং ভরতশ্রেষ্ঠ যথেন্দ্রভবনং তথা

ন চামুদ্রোঽভিনির্যাতি ন চামুদ্রঃ প্রবেশ্যতে
বৃষ্ণ্যন্ধকপুরে রাজংস্তদা সৌভসমাগমে

অনু রথ্যাসু সর্বাসু চত্বরেষু চ কৌরব
বলং বভূব রাজেন্দ্র প্রভূতগজবাজিমৎ

দত্তবেতনভক্তং চ দত্তায়ুধপরিচ্ছদম্
কৃতাপদানং চ তদা বলমাসীন্মহাভুজ

ন কুপ্যবেতনী কশ্চিন্ন চাতিক্রান্তবেতনী
নানুগ্রহভৃতঃ কশ্চিন্ন চাদৃষ্টপরাক্রমঃ

এবং সুবিহিতা রাজন্দ্বারকা ভূরিদক্ষিণৈঃ
আহুকেন সুগুপ্তা চ রাজ্ঞা রাজীবলোচন