অধ্যায় 15

15.1

যুধিষ্ঠির উবাচ
অসাংনিধ্যং কথং কৃষ্ণ তবাসীদ্বৃষ্ণিনন্দন
ক্ব চাসীদ্বিপ্রবাসস্তে কিং বাকার্ষীঃ প্রবাসকঃ

কৃষ্ণ উবাচ
শাল্বস্য নগরং সৌভং গতোঽহং ভরতর্ষভ
বিনিহন্তুং নরশ্রেষ্ঠ তত্র মে শৃণু কারণম্

মহাতেজা মহাবাহুর্যঃ স রাজা মহায়শাঃ
দমঘোষাত্মজো বীরঃ শিশুপালো ময়া হতঃ

যজ্ঞে তে ভরতশ্রেষ্ঠ রাজসূয়েঽর্হণাং প্রতি
স রোষবশসংপ্রাপ্তো নামৃষ্যত দুরাত্মবান্

শ্রুত্বা তং নিহতং শাল্বস্তীব্ররোষসমন্বিতঃ
উপায়াদ্দ্বারকাং শূন্যামিহস্থে ময়ি ভারত

স তত্র যোধিতো রাজন্বালকৈর্বৃষ্ণিপুংগবৈঃ
আগতঃ কামগং সৌভমারুহ্যৈব নৃশংসকৃৎ

ততো বৃষ্ণিপ্রবীরাংস্তান্বালান্হত্বা বহূংস্তদা
পুরোদ্যানানি সর্বাণি ভেদয়ামাস দুর্মতিঃ

উক্তবাংশ্চ মহাবাহো ক্বাসৌ বৃষ্ণিকুলাধমঃ
বাসুদেবঃ সুমন্দাত্মা বসুদেবসুতো গতঃ

তস্য যুদ্ধার্থিনো দর্পং যুদ্ধে নাশয়িতাস্ম্যহম্
আনর্তাঃ সত্যমাখ্যাত তত্র গন্তাস্মি যত্র সঃ

তং হত্বা বিনিবর্তিষ্যে কংসকেশিনিষূদনম্
অহত্বা ন নিবর্তিষ্যে সত্যেনায়ুধমালভে

ক্বাসৌ ক্বাসাবিতি পুনস্তত্র তত্র বিধাবতি
ময়া কিল রণে যুদ্ধং কাঙ্ক্ষমাণঃ স সৌভরাট্

অদ্য তং পাপকর্মাণং ক্ষুদ্রং বিশ্বাসঘাতিনম্
শিশুপালবধামর্ষাদ্গময়িষ্যে যমক্ষয়ম্

মম পাপস্বভাবেন ভ্রাতা যেন নিপাতিতঃ
শিশুপালো মহীপালস্তং বধিষ্যে মহীতলে

ভ্রাতা বালশ্চ রাজা চ ন চ সংগ্রামমূর্ধনি
প্রমত্তশ্চ হতো বীরস্তং হনিষ্যে জনার্দনম্

এবমাদি মহারাজ বিলপ্য দিবমাস্থিতঃ
কামগেন স সৌভেন ক্ষিপ্ত্বা মাং কুরুনন্দন

তমশ্রৌষমহং গত্বা যথা বৃত্তঃ সুদুর্মতিঃ
ময়ি কৌরব্য দুষ্টাত্মা মার্ত্তিকাবতকো নৃপঃ

ততোঽহমপি কৌরব্য রোষব্যাকুললোচনঃ
নিশ্চিত্য মনসা রাজন্বধায়াস্য মনো দধে

আনর্তেষু বিমর্দং চ ক্ষেপং চাত্মনি কৌরব
প্রবৃদ্ধমবলেপং চ তস্য দুষ্কৃতকর্মণঃ

ততঃ সৌভবধায়াহং প্রতস্থে পৃথিবীপতে
স ময়া সাগরাবর্তে দৃষ্ট আসীত্পরীপ্সতা

ততঃ প্রধ্মাপ্য জলজং পাঞ্চজন্যমহং নৃপ
আহূয় শাল্বং সমরে যুদ্ধায় সমবস্থিতঃ

সুমুহূর্তমভূদ্যুদ্ধং তত্র মে দানবৈঃ সহ
বশীভূতাশ্চ মে সর্বে ভূতলে চ নিপাতিতাঃ

এতত্কার্যং মহাবাহো যেনাহং নাগমং তদা
শ্রুত্বৈব হাস্তিনপুরং দ্যূতং চাবিনয়োত্থিতম্