অধ্যায় 14

14.1

বাসুদেব উবাচ
নেদং কৃচ্ছ্রমনুপ্রাপ্তো ভবান্স্যাদ্বসুধাধিপ
যদ্যহং দ্বারকায়াং স্যাং রাজন্সংনিহিতঃ পুরা

আগচ্ছেয়মহং দ্যূতমনাহূতোঽপি কৌরবৈঃ
আম্বিকেয়েন দুর্ধর্ষ রাজ্ঞা দুর্যোধনেন চ

বারয়েয়মহং দ্যূতং বহূন্দোষান্প্রদর্শয়ন্
ভীষ্মদ্রোণৌ সমানায্য কৃপং বাহ্লীকমেব চ

বৈচিত্রবীর্যং রাজানমলং দ্যূতেন কৌরব
পুত্রাণাং তব রাজেন্দ্র ত্বন্নিমিত্তমিতি প্রভো

তত্র বক্ষ্যাম্যহং দোষান্যৈর্ভবানবরোপিতঃ
বীরসেনসুতো যৈশ্চ রাজ্যাত্প্রভ্রংশিতঃ পুরা

অভক্ষিতবিনাশং চ দেবনেন বিশাং পতে
সাতত্যং চ প্রসঙ্গস্য বর্ণয়েয়ং যথাতথম্

স্ত্রিয়োঽক্ষা মৃগয়া পানমেতত্কামসমুত্থিতম্
ব্যসনং চতুষ্টয়ং প্রোক্তং যৈ রাজন্ভ্রশ্যতে শ্রিয়ঃ

তত্র সর্বত্র বক্তব্যং মন্যন্তে শাস্ত্রকোবিদাঃ
বিশেষতশ্চ বক্তব্যং দ্যূতে পশ্যন্তি তদ্বিদঃ

একাহ্না দ্রব্যনাশোঽত্র ধ্রুবং ব্যসনমেব চ
অভুক্তনাশশ্চার্থানাং বাক্পারুষ্যং চ কেবলম্

এতচ্চান্যচ্চ কৌরব্য প্রসঙ্গি কটুকোদয়ম্
দ্যূতে ব্রূয়াং মহাবাহো সমাসাদ্যাম্বিকাসুতম্

এবমুক্তো যদি ময়া গৃহ্ণীয়াদ্বচনং মম
অনাময়ং স্যাদ্ধর্মস্য কুরূণাং কুরুনন্দন

ন চেত্স মম রাজেন্দ্র গৃহ্ণীয়ান্মধুরং বচঃ
পথ্যং চ ভরতশ্রেষ্ঠ নিগৃহ্ণীয়াং বলেন তম্

অথৈনানভিনীয়ৈবং সুহৃদো নাম দুর্হৃদঃ
সভাসদশ্চ তান্সর্বান্ভেদয়েয়ং দুরোদরান্

অসাংনিধ্যং তু কৌরব্য মমানর্তেষ্বভূত্তদা
যেনেদং ব্যসনং প্রাপ্তা ভবন্তো দ্যূতকারিতম্

সোঽহমেত্য কুরুশ্রেষ্ঠ দ্বারকাং পাণ্ডুনন্দন
অশ্রৌষং ত্বাং ব্যসনিনং যুয়ুধানাদ্যথাতথম্

শ্রুত্বৈব চাহং রাজেন্দ্র পরমোদ্বিগ্নমানসঃ
তূর্ণমভ্যাগতোঽস্মি ত্বাং দ্রষ্টুকামো বিশাং পতে

অহো কৃচ্ছ্রমনুপ্রাপ্তাঃ সর্বে স্ম ভরতর্ষভ
যে বয়ং ত্বাং ব্যসনিনং পশ্যামঃ সহ সোদরৈঃ