Utshovঅধ্যায় 13
13.1
বৈশংপায়ন উবাচ
ভোজাঃ প্রব্রজিতাঞ্শ্রুত্বা বৃষ্ণয়শ্চান্ধকৈঃ সহ
পাণ্ডবান্দুঃখসংতপ্তান্সমাজগ্মুর্মহাবনে
13.2
পাঞ্চালস্য চ দায়াদা ধৃষ্টকেতুশ্চ চেদিপঃ
কেকয়াশ্চ মহাবীর্যা ভ্রাতরো লোকবিশ্রুতাঃ
13.3
বনে তেঽভিয়য়ুঃ পার্থান্ক্রোধামর্শসমন্বিতাঃ
গর্হয়ন্তো ধার্তরাষ্ট্রান্কিং কুর্ম ইতি চাব্রুবন্
13.4
বাসুদেবং পুরস্কৃত্য সর্বে তে ক্ষত্রিয়র্ষভাঃ
পরিবার্যোপবিবিশুর্ধর্মরাজং যুধিষ্ঠিরম্
13.5
বাসুদেব উবাচ
দুর্যোধনস্য কর্ণস্য শকুনেশ্চ দুরাত্মনঃ
দুঃশাসনচতুর্থানাং ভূমিঃ পাস্যতি শোণিতম্
13.6
ততঃ সর্বেঽভিষিঞ্চামো ধর্মরাজং যুধিষ্ঠিরম্
নিকৃত্যোপচরন্বধ্য এষ ধর্মঃ সনাতনঃ
13.7
বৈশংপায়ন উবাচ
পার্থানামভিষঙ্গেণ তথা ক্রুদ্ধং জনার্দনম্
অর্জুনঃ শময়ামাসা দিধক্ষন্তমিব প্রজাঃ
13.8
সংক্রুদ্ধং কেশবং দৃষ্ট্বা পূর্বদেহেষু ফল্গুনঃ
কীর্তয়ামাস কর্মাণি সত্যকীর্তের্মহাত্মনঃ
13.9
পুরুষস্যাপ্রমেয়স্য সত্যস্যামিততেজসঃ
প্রজাপতিপতের্বিষ্ণোর্লোকনাথস্য ধীমতঃ
13.10
অর্জুন উবাচ
দশ বর্ষসহস্রাণি যত্রসায়ংগৃহো মুনিঃ
ব্যচরস্ত্বং পুরা কৃষ্ণ পর্বতে গন্ধমাদনে
13.11
দশ বর্ষসহস্রাণি দশ বর্ষশতানি চ
পুষ্করেষ্ববসঃ কৃষ্ণ ত্বমপো ভক্ষয়ন্পুরা
13.12
ঊর্ধ্ববাহুর্বিশালায়াং বদর্যাং মধুসূদন
অতিষ্ঠ একপাদেন বায়ুভক্ষঃ শতং সমাঃ
13.13
অপকৃষ্টোত্তরাসঙ্গঃ কৃশো ধমনিসংততঃ
আসীঃ কৃষ্ণ সরস্বত্যাং সত্রে দ্বাদশবার্ষিকে
13.14
প্রভাসং চাপ্যথাসাদ্য তীর্থং পুণ্যজনোচিতম্
তথা কৃষ্ণ মহাতেজা দিব্যং বর্ষসহস্রকম্
আতিষ্ঠস্তপ একেন পাদেন নিয়মে স্থিতঃ
13.15
ক্ষেত্রজ্ঞঃ সর্বভূতানামাদিরন্তশ্চ কেশব
নিধানং তপসাং কৃষ্ণ যজ্ঞস্ত্বং চ সনাতনঃ
13.16
নিহত্য নরকং ভৌমমাহৃত্য মণিকুণ্ডলে
প্রথমোত্পাদিতং কৃষ্ণ মেধ্যমশ্বমবাসৃজঃ
13.17
কৃত্বা তত্কর্ম লোকানামৃষভঃ সর্বলোকজিৎ
অবধীস্ত্বং রণে সর্বান্সমেতান্দৈত্যদানবান্
13.18
ততঃ সর্বেশ্বরত্বং চ সংপ্রদায় শচীপতেঃ
মানুষেষু মহাবাহো প্রাদুর্ভূতোঽসি কেশব
13.19
স ত্বং নারায়ণো ভূত্বা হরিরাসীঃ পরংতপ
ব্রহ্মা সোমশ্চ সূর্যশ্চ ধর্মো ধাতা যমোঽনলঃ
13.20
বায়ুর্বৈশ্রবণো রুদ্রঃ কালঃ খং পৃথিবী দিশঃ
অজশ্চরাচরগুরুঃ স্রষ্টা ত্বং পুরুষোত্তম
13.21
তুরায়ণাদিভির্দেব ক্রতুভির্ভূরিদক্ষিণৈঃ
অয়জো ভূরিতেজা বৈ কৃষ্ণ চৈত্ররথে বনে
13.22
শতং শতসহস্রাণি সুবর্ণস্য জনার্দন
একৈকস্মিংস্তদা যজ্ঞে পরিপূর্ণানি ভাগশঃ
13.23
অদিতেরপি পুত্রত্বমেত্য যাদবনন্দন
ত্বং বিষ্ণুরিতি বিখ্যাত ইন্দ্রাদবরজো ভুবি
13.24
শিশুর্ভূত্বা দিবং খং চ পৃথিবীং চ পরংতপ
ত্রিভির্বিক্রমণৈঃ কৃষ্ণ ক্রান্তবানসি তেজসা
13.25
সংপ্রাপ্য দিবমাকাশমাদিত্যসদনে স্থিতঃ
অত্যরোচশ্চ ভূতাত্মন্ভাস্করং স্বেন তেজসা
13.26
সাদিতা মৌরবাঃ পাশা নিসুন্দনরকৌ হতৌ
কৃতঃ ক্ষেমঃ পুনঃ পন্থাঃ পুরং প্রাগ্জ্যোতিষং প্রতি
13.27
জারূথ্যামাহুতিঃ ক্রাথঃ শিশুপালো জনৈঃ সহ
ভীমসেনশ্চ শৈব্যশ্চ শতধন্বা চ নির্জিতঃ
13.28
তথা পর্জন্যঘোষেণ রথেনাদিত্যবর্চসা
অবাক্ষীর্মহিষীং ভোজ্যাং রণে নির্জিত্য রুক্মিণম্
13.29
ইন্দ্রদ্যুম্নো হতঃ কোপাদ্যবনশ্চ কশেরুমান্
হতঃ সৌভপতিঃ শাল্বস্ত্বয়া সৌভং চ পাতিতম্
13.30
ইরাবত্যাং তথা ভোজঃ কার্তবীর্যসমো যুধি
গোপতিস্তালকেতুশ্চ ত্বয়া বিনিহতাবুভৌ
13.31
তাং চ ভোগবতীং পুণ্যামৃষিকান্তাং জনার্দন
দ্বারকামাত্মসাত্কৃত্বা সমুদ্রং গময়িষ্যসি
13.32
ন ক্রোধো ন চ মাত্সর্যং নানৃতং মধুসূদন
ত্বয়ি তিষ্ঠতি দাশার্হ ন নৃশংস্যং কুতোঽনৃজু
13.33
আসীনং চিত্তমধ্যে ত্বাং দীপ্যমানং স্বতেজসা
আগম্য ঋষয়ঃ সর্বেঽয়াচন্তাভয়মচ্যুত
13.34
যুগান্তে সর্বভূতানি সংক্ষিপ্য মধুসূদন
আত্মন্যেবাত্মসাত্কৃত্বা জগদাস্সে পরংতপ
13.35
নৈবং পূর্বে নাপরে বা করিষ্যন্তি কৃতানি তে
কর্মাণি যানি দেব ত্বং বাল এব মহাদ্যুতে
13.36
কৃতবান্পুণ্ডরীকাক্ষ বলদেবসহায়বান্
বৈরাজভবনে চাপি ব্রহ্মণা ন্যবসঃ সহ
13.37
বৈশংপায়ন উবাচ
এবমুক্ত্বা তদাত্মানমাত্মা কৃষ্ণস্য পাণ্ডবঃ
তূষ্ণীমাসীত্ততঃ পার্থমিত্যুবাচ জনার্দনঃ
13.38
মমৈব ত্বং তবৈবাহং যে মদীয়াস্তবৈব তে
যস্ত্বাং দ্বেষ্টি স মাং দ্বেষ্টি যস্ত্বামনু স মামনু
13.39
নরস্ত্বমসি দুর্ধর্ষ হরির্নারায়ণো হ্যহম্
লোকাল্লোকমিমং প্রাপ্তৌ নরনারায়ণাবৃষী
13.40
অনন্যঃ পার্থ মত্তস্ত্বমহং ত্বত্তশ্চ ভারত
নাবয়োরন্তরং শক্যং বেদিতুং ভরতর্ষভ
13.41
তস্মিন্বীরসমাবায়ে সংরব্ধেষ্বথ রাজসু
ধৃষ্টদ্যুম্নমুখৈর্বীরৈর্ভ্রাতৃভিঃ পরিবারিতা
13.42
পাঞ্চালী পুণ্ডরীকাক্ষমাসীনং যাদবৈঃ সহ
অভিগম্যাব্রবীত্কৃষ্ণা শরণ্যং শরণৈষিণী
13.43
পূর্বে প্রজানিসর্গে ত্বামাহুরেকং প্রজাপতিম্
স্রষ্টারং সর্বভূতানামসিতো দেবলোঽব্রবীৎ
13.44
বিষ্ণুস্ত্বমসি দুর্ধর্ষ ত্বং যজ্ঞো মধুসূদন
যষ্টা ত্বমসি যষ্টব্যো জামদগ্ন্যো যথাব্রবীৎ
13.45
ঋষয়স্ত্বাং ক্ষমামাহুঃ সত্যং চ পুরুষোত্তম
সত্যাদ্যজ্ঞোঽসি সংভূতঃ কশ্যপস্ত্বাং যথাব্রবীৎ
13.46
সাধ্যানামপি দেবানাং বসূনামীশ্বরেশ্বরঃ
লোকভাবন লোকেশ যথা ত্বাং নারদোঽব্রবীৎ
13.47
দিবং তে শিরসা ব্যাপ্তং পদ্ভ্যাং চ পৃথিবী বিভো
জঠরং তে ইমে লোকাঃ পুরুষোঽসি সনাতনঃ
13.48
বিদ্যাতপোঽভিতপ্তানাং তপসা ভাবিতাত্মনাম্
আত্মদর্শনসিদ্ধানামৃষীণামৃষিসত্তম
13.49
রাজর্ষীণাং পুণ্যকৃতামাহবেষ্বনিবর্তিনাম্
সর্বধর্মোপপন্নানাং ত্বং গতিঃ পুরুষোত্তম
13.50
ত্বং প্রভুস্ত্বং বিভুস্ত্বং ভূরাত্মভূস্ত্বং সনাতনঃ
লোকপালাশ্চ লোকাশ্চ নক্ষত্রাণি দিশো দশ
নভশ্চন্দ্রশ্চ সূর্যশ্চ ত্বয়ি সর্বং প্রতিষ্ঠিতম্
13.51
মর্ত্যতা চৈব ভূতানামমরত্বং দিবৌকসাম্
ত্বয়ি সর্বং মহাবাহো লোককার্যং প্রতিষ্ঠিতম্
13.52
সা তেঽহং দুঃখমাখ্যাস্যে প্রণয়ান্মধুসূদন
ঈশস্ত্বং সর্বভূতানাং যে দিব্যা যে চ মানুষাঃ
13.53
কথং নু ভার্যা পার্থানাং তব কৃষ্ণ সখী বিভো
ধৃষ্টদ্যুম্নস্য ভগিনী সভাং কৃষ্যেত মাদৃশী
13.54
স্ত্রীধর্মিণী বেপমানা রুধিরেণ সমুক্ষিতা
একবস্ত্রা বিকৃষ্টাস্মি দুঃখিতা কুরুসংসদি
13.55
রাজমধ্যে সভায়াং তু রজসাভিসমীরিতাম্
দৃষ্ট্বা চ মাং ধার্তরাষ্ট্রাঃ প্রাহসন্পাপচেতসঃ
13.56
দাসীভাবেন ভোক্তুং মামীষুস্তে মধুসূদন
জীবত্সু পাণ্ডুপুত্রেষু পাঞ্চালেষ্বথ বৃষ্ণিষু
13.57
নন্বহং কৃষ্ণ ভীষ্মস্য ধৃতরাষ্ট্রস্য চোভয়োঃ
স্নুষা ভবামি ধর্মেণ সাহং দাসীকৃতা বলাৎ
13.58
গর্হয়ে পাণ্ডবাংস্ত্বেব যুধি শ্রেষ্ঠান্মহাবলান্
যে ক্লিশ্যমানাং প্রেক্ষন্তে ধর্মপত্নীং যশস্বিনীম্
13.59
ধিগ্বলং ভীমসেনস্য ধিক্পার্থস্য ধনুষ্মতাম্
যৌ মাং বিপ্রকৃতাং ক্ষুদ্রৈর্মর্ষয়েতাং জনার্দন
13.60
শাশ্বতোঽয়ং ধর্মপথঃ সদ্ভিরাচরিতঃ সদা
যদ্ভার্যাং পরিরক্ষন্তি ভর্তারোঽল্পবলা অপি
13.61
ভার্যায়াং রক্ষ্যমাণায়াং প্রজা ভবতি রক্ষিতা
প্রজায়াং রক্ষ্যমাণায়ামাত্মা ভবতি রক্ষিতঃ
13.62
আত্মা হি জায়তে তস্যাং তস্মাজ্জায়া ভবত্যুত
ভর্তা চ ভার্যয়া রক্ষ্যঃ কথং জায়ান্মমোদরে
13.63
নন্বিমে শরণং প্রাপ্তান্ন ত্যজন্তি কদাচন
তে মাং শরণমাপন্নাং নান্বপদ্যন্ত পাণ্ডবাঃ
13.64
পঞ্চেমে পঞ্চভির্জাতাঃ কুমারাশ্চামিতৌজসঃ
এতেষামপ্যবেক্ষার্থং ত্রাতব্যাস্মি জনার্দন
13.65
প্রতিবিন্ধ্যো যুধিষ্ঠিরাত্সুতসোমো বৃকোদরাৎ
অর্জুনাচ্ছ্রুতকীর্তিস্তু শতানীকস্তু নাকুলিঃ
13.66
কনিষ্ঠাচ্ছ্রুতকর্মা তু সর্বে সত্যপরাক্রমাঃ
প্রদ্যুম্নো যাদৃশঃ কৃষ্ণ তাদৃশাস্তে মহারথাঃ
13.67
নন্বিমে ধনুষি শ্রেষ্ঠা অজেয়া যুধি শাত্রবৈঃ
কিমর্থং ধার্তরাষ্ট্রাণাং সহন্তে দুর্বলীয়সাম্
13.68
অধর্মেণ হৃতং রাজ্যং সর্বে দাসাঃ কৃতাস্তথা
সভায়াং পরিকৃষ্টাহমেকবস্ত্রা রজস্বলা
13.69
নাধিজ্যমপি যচ্ছক্যং কর্তুমন্যেন গাণ্ডিবম্
অন্যত্রার্জুনভীমাভ্যাং ত্বয়া বা মধুসূদন
13.70
ধিগ্ভীমসেনস্য বলং ধিক্পার্থস্য চ গাণ্ডিবম্
যত্র দুর্যোধনঃ কৃষ্ণ মুহূর্তমপি জীবতি
13.71
য এতানাক্ষিপদ্রাষ্ট্রাত্সহ মাত্রাবিহিংসকান্
অধীয়ানান্পুরা বালান্ব্রতস্থান্মধুসূদন
13.72
ভোজনে ভীমসেনস্য পাপঃ প্রাক্ষেপয়দ্বিষম্
কালকূটং নবং তীক্ষ্ণং সংভৃতং লোমহর্ষণম্
13.73
তজ্জীর্ণমবিকারেণ সহান্নেন জনার্দন
সশেষত্বান্মহাবাহো ভীমস্য পুরুষোত্তম
13.74
প্রমাণকোট্যাং বিশ্বস্তং তথা সুপ্তং বৃকোদরম্
বদ্ধ্বৈনং কৃষ্ণ গঙ্গায়াং প্রক্ষিপ্য পুনরাব্রজৎ
13.75
যদা বিবুদ্ধঃ কৌন্তেয়স্তদা সংছিদ্য বন্ধনম্
উদতিষ্ঠন্মহাবাহুর্ভীমসেনো মহাবলঃ
13.76
আশীবিষৈঃ কৃষ্ণসর্পৈঃ সুপ্তং চৈনমদংশয়ৎ
সর্বেষ্বেবাঙ্গদেশেষু ন মমার চ শত্রুহা
13.77
প্রতিবুদ্ধস্তু কৌন্তেয়ঃ সর্বান্সর্পানপোথয়ৎ
সারথিং চাস্য দয়িতমপহস্তেন জঘ্নিবান্
13.78
পুনঃ সুপ্তানুপাধাক্ষীদ্বালকান্বারণাবতে
শয়ানানার্যয়া সার্ধং কো নু তত্কর্তুমর্হতি
13.79
যত্রার্যা রুদতী ভীতা পাণ্ডবানিদমব্রবীৎ
মহদ্ব্যসনমাপন্না শিখিনা পরিবারিতা
13.80
হা হতাস্মি কুতো ন্বদ্য ভবেচ্ছান্তিরিহানলাৎ
অনাথা বিনশিষ্যামি বালকৈঃ পুত্রকৈঃ সহ
13.81
তত্র ভীমো মহাবাহুর্বায়ুবেগপরাক্রমঃ
আর্যামাশ্বাসয়ামাস ভ্রাতৄংশ্চাপি বৃকোদরঃ
13.82
বৈনতেয়ো যথা পক্ষী গরুডঃ পততাং বরঃ
তথৈবাভিপতিষ্যামি ভয়ং বো নেহ বিদ্যতে
13.83
আর্যামঙ্কেন বামেন রাজানং দক্ষিণেন চ
অংসয়োশ্চ যমৌ কৃত্বা পৃষ্ঠে বীভত্সুমেব চ
13.84
সহসোত্পত্য বেগেন সর্বানাদায় বীর্যবান্
ভ্রাতৄনার্যাং চ বলবান্মোক্ষয়ামাস পাবকাৎ
13.85
তে রাত্রৌ প্রস্থিতাঃ সর্বে মাত্রা সহ যশস্বিনঃ
অভ্যগচ্ছন্মহারণ্যং হিডিম্ববনমন্তিকাৎ
13.86
শ্রান্তাঃ প্রসুপ্তাস্তত্রেমে মাত্রা সহ সুদুঃখিতাঃ
সুপ্তাংশ্চৈনানভ্যগচ্ছদ্ধিডিম্বা নাম রাক্ষসী
13.87
ভীমস্য পাদৌ কৃত্বা তু স্ব উত্সঙ্গে ততো বলাৎ
পর্যমর্দত সংহৃষ্টা কল্যাণী মৃদুপাণিনা
13.88
তামবুধ্যদমেয়াত্মা বলবান্সত্যবিক্রমঃ
পর্যপৃচ্ছচ্চ তাং ভীমঃ কিমিহেচ্ছস্যনিন্দিতে
13.89
তয়োঃ শ্রুত্বা তু কথিতমাগচ্ছদ্রাক্ষসাধমঃ
ভীমরূপো মহানাদান্বিসৃজন্ভীমদর্শনঃ
13.90
কেন সার্ধং কথয়সি আনয়ৈনং মমান্তিকম্
হিডিম্বে ভক্ষয়িষ্যাবো ন চিরং কর্তুমর্হসি
13.91
সা কৃপাসংগৃহীতেন হৃদয়েন মনস্বিনী
নৈনমৈচ্ছত্তদাখ্যাতুমনুক্রোশাদনিন্দিতা
13.92
স নাদান্বিনদন্ঘোরান্রাক্ষসঃ পুরুষাদকঃ
অভ্যদ্রবত বেগেন ভীমসেনং তদা কিল
13.93
তমভিদ্রুত্য সংক্রুদ্ধো বেগেন মহতা বলী
অগৃহ্ণাত্পাণিনা পাণিং ভীমসেনস্য রাক্ষসঃ
13.94
ইন্দ্রাশনিসমস্পর্শং বজ্রসংহননং দৃঢম্
সংহত্য ভীমসেনায় ব্যাক্ষিপত্সহসা করম্
13.95
গৃহীতং পাণিনা পাণিং ভীমসেনোঽথ রক্ষসা
নামৃষ্যত মহাবাহুস্তত্রাক্রুধ্যদ্বৃকোদরঃ
13.96
তত্রাসীত্তুমুলং যুদ্ধং ভীমসেনহিডিম্বয়োঃ
সর্বাস্ত্রবিদুষোর্ঘোরং বৃত্রবাসবয়োরিব
13.97
হত্বা হিডিম্বং ভীমোঽথ প্রস্থিতো ভ্রাতৃভিঃ সহ
হিডিম্বামগ্রতঃ কৃত্বা যস্যাং জাতো ঘটোত্কচঃ
13.98
ততশ্চ প্রাদ্রবন্সর্বে সহ মাত্রা যশস্বিনঃ
একচক্রামভিমুখাঃ সংবৃতা ব্রাহ্মণব্রজৈঃ
13.99
প্রস্থানে ব্যাস এষাং চ মন্ত্রী প্রিয়হিতোঽভবৎ
ততোঽগচ্ছন্নেকচক্রাং পাণ্ডবাঃ সংশিতব্রতাঃ
13.100
তত্রাপ্যাসাদয়ামাসুর্বকং নাম মহাবলম্
পুরুষাদং প্রতিভয়ং হিডিম্বেনৈব সংমিতম্
13.101
তং চাপি বিনিহত্যোগ্রং ভীমঃ প্রহরতাং বরঃ
সহিতো ভ্রাতৃভিঃ সর্বৈর্দ্রুপদস্য পুরং যয়ৌ
13.102
লব্ধাহমপি তত্রৈব বসতা সব্যসাচিনা
যথা ত্বয়া জিতা কৃষ্ণ রুক্মিণী ভীষ্মকাত্মজা
13.103
এবং সুয়ুদ্ধে পার্থেন জিতাহং মধুসূদন
স্বয়ংবরে মহত্কর্ম কৃত্বা নসুকরং পরৈঃ
13.104
এবং ক্লেশৈঃ সুবহুভিঃ ক্লিশ্যমানাঃ সুদুঃখিতাঃ
নিবসামার্যয়া হীনাঃ কৃষ্ণ ধৌম্যপুরঃসরাঃ
13.105
ত ইমে সিংহবিক্রান্তা বীর্যেণাভ্যধিকাঃ পরৈঃ
বিহীনৈঃ পরিক্লিশ্যন্তীং সমুপেক্ষন্ত মাং কথম্
13.106
এতাদৃশানি দুঃখানি সহন্তে দুর্বলীয়সাম্
দীর্ঘকালং প্রদীপ্তানি পাপানাং ক্ষুদ্রকর্মণাম্
13.107
কুলে মহতি জাতাস্মি দিব্যেন বিধিনা কিল
পাণ্ডবানাং প্রিয়া ভার্যা স্নুষা পাণ্ডোর্মহাত্মনঃ
13.108
কচগ্রহমনুপ্রাপ্তা সাস্মি কৃষ্ণ বরা সতী
পঞ্চানামিন্দ্রকল্পানাং প্রেক্ষতাং মধুসূদন
13.109
ইত্যুক্ত্বা প্রারুদত্কৃষ্ণা মুখং প্রচ্ছাদ্য পাণিনা
পদ্মকোশপ্রকাশেন মৃদুনা মৃদুভাষিণী
13.110
স্তনাবপতিতৌ পীনৌ সুজাতৌ শুভলক্ষণৌ
অভ্যবর্ষত পাঞ্চালী দুঃখজৈরশ্রুবিন্দুভিঃ
13.111
চক্ষুষী পরিমার্জন্তী নিঃশ্বসন্তী পুনঃ পুনঃ
বাষ্পপূর্ণেন কণ্ঠেন ক্রুদ্ধা বচনমব্রবীৎ
13.112
নৈব মে পতয়ঃ সন্তি ন পুত্রা মধুসূদন
ন ভ্রাতরো ন চ পিতা নৈব ত্বং ন চ বান্ধবাঃ
13.113
যে মাং বিপ্রকৃতাং ক্ষুদ্রৈরুপেক্ষধ্বং বিশোকবৎ
ন হি মে শাম্যতে দুঃখং কর্ণো যত্প্রাহসত্তদা
13.114
অথৈনামব্রবীত্কৃষ্ণস্তস্মিন্বীরসমাগমে
রোদিষ্যন্তি স্ত্রিয়ো হ্যেবং যেষাং ক্রুদ্ধাসি ভামিনি
13.115
বীভত্সুশরসংছন্নাঞ্শোণিতৌঘপরিপ্লুতান্
নিহতাঞ্জীবিতং ত্যক্ত্বা শয়ানান্বসুধাতলে
13.116
যত্সমর্থং পাণ্ডবানাং তত্করিষ্যামি মা শুচঃ
সত্যং তে প্রতিজানামি রাজ্ঞাং রাজ্ঞী ভবিষ্যসি
13.117
পতেদ্দ্যৌর্হিমবাঞ্শীর্যেত্পৃথিবী শকলীভবেৎ
শুষ্যেত্তোয়নিধিঃ কৃষ্ণে ন মে মোঘং বচো ভবেৎ
13.118
ধৃষ্টদ্যুম্ন উবাচ
অহং দ্রোণং হনিষ্যামি শিখণ্ডী তু পিতামহম্
দুর্যোধনং ভীমসেনঃ কর্ণং হন্তা ধনংজয়ঃ
13.119
রামকৃষ্ণৌ ব্যপাশ্রিত্য অজেয়াঃ স্ম শুচিস্মিতে
অপি বৃত্রহণা যুদ্ধে কিং পুনর্ধৃতরাষ্ট্রজৈঃ
13.120
বৈশংপায়ন উবাচ
ইত্যুক্তেঽভিমুখা বীরা বাসুদেবমুপস্থিতা
তেষাং মধ্যে মহাবাহুঃ কেশবো বাক্যমব্রবীৎ