Utshovঅধ্যায় 12
12.1
ধৃতরাষ্ট্র উবাচ
কির্মীরস্য বধং ক্ষত্তঃ শ্রোতুমিচ্ছামি কথ্যতাম্
রক্ষসা ভীমসেনস্য কথমাসীত্সমাগমঃ
12.2
বিদুর উবাচ
শৃণু ভীমস্য কর্মেদমতিমানুষকর্মণঃ
শ্রুতপূর্বং ময়া তেষাং কথান্তেষু পুনঃ পুনঃ
12.3
ইতঃ প্রয়াতা রাজেন্দ্র পাণ্ডবা দ্যূতনির্জিতাঃ
জগ্মুস্ত্রিভিরহোরাত্রৈঃ কাম্যকং নাম তদ্বনম্
12.4
রাত্রৌ নিশীথে স্বাভীলে গতেঽর্ধসময়ে নৃপ
প্রচারে পুরুষাদানাং রক্ষসাং ভীমকর্মণাম্
12.5
তদ্বনং তাপসা নিত্যং শেষাশ্চ বনচারিণঃ
দূরাত্পরিহরন্তি স্ম পুরুষাদভয়াত্কিল
12.6
তেষাং প্রবিশতাং তত্র মার্গমাবৃত্য ভারত
দীপ্তাক্ষং ভীষণং রক্ষঃ সোল্মুকং প্রত্যদৃশ্যত
12.7
বাহূ মহান্তৌ কৃত্বা তু তথাস্যং চ ভয়ানকম্
স্থিতমাবৃত্য পন্থানং যেন যান্তি কুরূদ্বহাঃ
12.8
দষ্টোষ্ঠদংষ্ট্রং তাম্রাক্ষং প্রদীপ্তোর্ধ্বশিরোরুহম্
সার্করশ্মিতডিচ্চক্রং সবলাকমিবাম্বুদম্
12.9
সৃজন্তং রাক্ষসীং মায়াং মহারাববিরাবিণম্
মুঞ্চন্তং বিপুলং নাদং সতোয়মিব তোয়দম্
12.10
তস্য নাদেন সংত্রস্তাঃ পক্ষিণঃ সর্বতোদিশম্
বিমুক্তনাদাঃ সংপেতুঃ স্থলজা জলজৈঃ সহ
12.11
সংপ্রদ্রুতমৃগদ্বীপিমহিষর্ক্ষসমাকুলম্
তদ্বনং তস্য নাদেন সংপ্রস্থিতমিবাভবৎ
12.12
তস্যোরুবাতাভিহতা তাম্রপল্লববাহবঃ
বিদূরজাতাশ্চ লতাঃ সমাশ্লিষ্যন্ত পাদপান্
12.13
তস্মিন্ক্ষণেঽথ প্রববৌ মারুতো ভৃশদারুণঃ
রজসা সংবৃতং তেন নষ্টর্ক্ষমভবন্নভঃ
12.14
পঞ্চানাং পাণ্ডুপুত্রাণামবিজ্ঞাতো মহারিপুঃ
পঞ্চানামিন্দ্রিয়াণাং তু শোকবেগ ইবাতুলঃ
12.15
স দৃষ্ট্বা পাণ্ডবান্দূরাত্কৃষ্ণাজিনসমাবৃতান্
আবৃণোত্তদ্বনদ্বারং মৈনাক ইব পর্বতঃ
12.16
তং সমাসাদ্য বিত্রস্তা কৃষ্ণা কমললোচনা
অদৃষ্টপূর্বং সংত্রাসান্ন্যমীলয়ত লোচনে
12.17
দুঃশাসনকরোত্সৃষ্টবিপ্রকীর্ণশিরোরুহা
পঞ্চপর্বতমধ্যস্থা নদীবাকুলতাং গতা
12.18
মোমুহ্যমানাং তাং তত্র জগৃহুঃ পঞ্চ পাণ্ডবাঃ
ইন্দ্রিয়াণি প্রসক্তানি বিষয়েষু যথা রতিম্
12.19
অথ তাং রাক্ষসীং মায়ামুত্থিতাং ঘোরদর্শনাম্
রক্ষোঘ্নৈর্বিবিধৈর্মন্ত্রৈর্ধৌম্যঃ সম্যক্প্রয়োজিতৈঃ
পশ্যতাং পাণ্ডুপুত্রাণাং নাশয়ামাস বীর্যবান্
12.20
স নষ্টমায়োঽতিবলঃ ক্রোধবিস্ফারিতেক্ষণঃ
কামমূর্তিধরঃ ক্ষুদ্রঃ কালকল্পো ব্যদৃশ্যত
12.21
তমুবাচ ততো রাজা দীর্ঘপ্রজ্ঞো যুধিষ্ঠিরঃ
কো ভবান্কস্য বা কিং তে ক্রিয়তাং কার্যমুচ্যতাম্
12.22
প্রত্যুবাচাথ তদ্রক্ষো ধর্মরাজং যুধিষ্ঠিরম্
অহং বকস্য বৈ ভ্রাতা কির্মীর ইতি বিশ্রুতঃ
12.23
বনেঽস্মিন্কাম্যকে শূন্যে নিবসামি গতজ্বরঃ
যুধি নির্জিত্য পুরুষানাহারং নিত্যমাচরন্
12.24
কে যূয়মিহ সংপ্রাপ্তা ভক্ষ্যভূতা মমান্তিকম্
যুধি নির্জিত্য বঃ সর্বান্ভক্ষয়িষ্যে গতজ্বরঃ
12.25
যুধিষ্ঠিরস্তু তচ্ছ্রুত্বা বচস্তস্য দুরাত্মনঃ
আচচক্ষে ততঃ সর্বং গোত্রনামাদি ভারত
12.26
পাণ্ডবো ধর্মরাজোঽহং যদি তে শ্রোত্রমাগতঃ
সহিতো ভ্রাতৃভিঃ সর্বৈর্ভীমসেনার্জুনাদিভিঃ
12.27
হৃতরাজ্যো বনে বাসং বস্তুং কৃতমতিস্ততঃ
বনমভ্যাগতো ঘোরমিদং তব পরিগ্রহম্
12.28
কির্মীরস্ত্বব্রবীদেনং দিষ্ট্যা দেবৈরিদং মম
উপপাদিতমদ্যেহ চিরকালান্মনোগতম্
12.29
ভীমসেনবধার্থং হি নিত্যমভ্যুদ্যতায়ুধঃ
চরামি পৃথিবীং কৃত্স্নাং নৈনমাসাদয়াম্যহম্
12.30
সোঽয়মাসাদিতো দিষ্ট্যা ভ্রাতৃহা কাঙ্ক্ষিতশ্চিরম্
অনেন হি মম ভ্রাতা বকো বিনিহতঃ প্রিয়ঃ
12.31
বেত্রকীয়গৃহে রাজন্ব্রাহ্মণচ্ছদ্মরূপিণা
বিদ্যাবলমুপাশ্রিত্য ন হ্যস্ত্যস্যৌরসং বলম্
12.32
হিডিম্বশ্চ সখা মহ্যং দয়িতো বনগোচরঃ
হতো দুরাত্মনানেন স্বসা চাস্য হৃতা পুরা
12.33
সোঽয়মভ্যাগতো মূঢো মমেদং গহনং বনম্
প্রচারসময়েঽস্মাকমর্ধরাত্রে সমাস্থিতে
12.34
অদ্যাস্য যাতয়িষ্যামি তদ্বৈরং চিরসংভৃতম্
তর্পয়িষ্যামি চ বকং রুধিরেণাস্য ভূরিণা
12.35
অদ্যাহমনৃণো ভূত্বা ভ্রাতুঃ সখ্যুস্তথৈব চ
শান্তিং লব্ধাস্মি পরমাং হত্ব রাক্ষসকণ্টকম্
12.36
যদি তেন পুরা মুক্তো ভীমসেনো বকেন বৈ
অদ্যৈনং ভক্ষয়িষ্যামি পশ্যতস্তে যুধিষ্ঠির
12.37
এনং হি বিপুলপ্রাণমদ্য হত্বা বৃকোদরম্
সংভক্ষ্য জরয়িষ্যামি যথাগস্ত্যো মহাসুরম্
12.38
এবমুক্তস্তু ধর্মাত্মা সত্যসংধো যুধিষ্ঠিরঃ
নৈতদস্তীতি সক্রোধো ভর্ত্সয়ামাস রাক্ষসম্
12.39
ততো ভীমো মহাবাহুরারুজ্য তরসা দ্রুম
দশব্যামমিবোদ্বিদ্ধং নিষ্পত্রমকরোত্তদা
12.40
চকার সজ্যং গাণ্ডীবং বজ্রনিষ্পেষগৌরবম্
নিমেষান্তরমাত্রেণ তথৈব বিজয়োঽর্জুনঃ
12.41
নিবার্য ভীমো জিষ্ণুং তু তদ্রক্ষো ঘোরদর্শনম্
অভিদ্রুত্যাব্রবীদ্বাক্যং তিষ্ঠ তিষ্ঠেতি ভারত
12.42
ইত্যুক্ত্বৈনমভিক্রুদ্ধঃ কক্ষ্যামুত্পীড্য পাণ্ডবঃ
নিষ্পিষ্য পাণিনা পাণিং সংদষ্টোষ্ঠপুটো বলী
তমভ্যধাবদ্বেগেন ভীমো বৃক্ষায়ুধস্তদা
12.43
যমদণ্ডপ্রতীকাশং ততস্তং তস্য মূর্ধনি
পাতয়ামাস বেগেন কুলিশং মঘবানিব
12.44
অসংভ্রান্তং তু তদ্রক্ষঃ সমরে প্রত্যদৃশ্যত
চিক্ষেপ চোল্মুকং দীপ্তমশনিং জ্বলিতামিব
12.45
তদুদস্তমলাতং তু ভীমঃ প্রহরতাং বরঃ
পদা সব্যেন চিক্ষেপ তদ্রক্ষঃ পুনরাব্রজৎ
12.46
কির্মীরশ্চাপি সহসা বৃক্ষমুত্পাট্য পাণ্ডবম্
দণ্ডপাণিরিব ক্রুদ্ধঃ সমরে প্রত্যয়ুধ্যত
12.47
তদ্বৃক্ষয়ুদ্ধমভবন্মহীরুহবিনাশনম্
বালিসুগ্রীবয়োর্ভ্রাত্রোর্যথা শ্রীকাঙ্ক্ষিণোঃ পুরা
12.48
শীর্ষয়োঃ পতিতা বৃক্ষা বিভিদুর্নৈকধা তয়োঃ
যথৈবোত্পলপদ্মানি মত্তয়োর্দ্বিপয়োস্তথা
12.49
মুঞ্জবজ্জর্জরীভূতা বহবস্তত্র পাদপাঃ
চীরাণীব ব্যুদস্তানি রেজুস্তত্র মহাবনে
12.50
তদ্বৃক্ষয়ুদ্ধমভবত্সুমুহূর্তং বিশাং পতে
রাক্ষসানাং চ মুখ্যস্য নরাণামুত্তমস্য চ
12.51
ততঃ শিলাং সমুত্ক্ষিপ্য ভীমস্য যুধি তিষ্ঠতঃ
প্রাহিণোদ্রাক্ষসঃ ক্রুদ্ধো ভীমসেনশ্চচাল হ
12.52
তং শিলাতাডনজডং পর্যধাবত্স রাক্ষসঃ
বাহুবিক্ষিপ্তকিরণঃ স্বর্ভানুরিব ভাস্করম্
12.53
তাবন্যোন্যং সমাশ্লিষ্য প্রকর্ষন্তৌ পরস্পরম্
উভাবপি চকাশেতে প্রয়ুদ্ধৌ বৃষভাবিব
12.54
তয়োরাসীত্সুতুমুলঃ সংপ্রহারঃ সুদারুণঃ
নখদংষ্ট্রায়ুধবতোর্ব্যাঘ্রয়োরিব দৃপ্তয়োঃ
12.55
দুর্যোধননিকারাচ্চ বাহুবীর্যাচ্চ দর্পিতঃ
কৃষ্ণানয়নদৃষ্টশ্চ ব্যবর্ধত বৃকোদরঃ
12.56
অভিপত্যাথ বাহুভ্যাং প্রত্যগৃহ্ণাদমর্ষিতঃ
মাতঙ্গ ইব মাতঙ্গং প্রভিন্নকরটামুখঃ
12.57
তং চাপ্যাথ ততো রক্ষঃ প্রতিজগ্রাহ বীর্যবান্
তমাক্ষিপদ্ভীমসেনো বলেন বলিনাং বরঃ
12.58
তয়োর্ভুজবিনিষ্পেষাদুভয়োর্বলিনোস্তদা
শব্দঃ সমভবদ্ঘোরো বেণুস্ফোটসমো যুধি
12.59
অথৈনমাক্ষিপ্য বলাদ্গৃহ্য মধ্যে বৃকোদরঃ
ধূনয়ামাস বেগেন বায়ুশ্চণ্ড ইব দ্রুমম্
12.60
স ভীমেন পরামৃষ্টো দুর্বলো বলিনা রণে
ব্যস্পন্দত যথাপ্রাণং বিচকর্ষ চ পাণ্ডবম্
12.61
তত এনং পরিশ্রান্তমুপলভ্য বৃকোদরঃ
যোক্ত্রয়ামাস বাহুভ্যাং পশুং রশনয়া যথা
12.62
বিনদন্তং মহানাদং ভিন্নভেরীসমস্বনম্
ভ্রাময়ামাস সুচিরং বিস্ফুরন্তমচেতসম্
12.63
তং বিষীদন্তমাজ্ঞায় রাক্ষসং পাণ্ডুনন্দনঃ
প্রগৃহ্য তরসা দোর্ভ্যাং পশুমারমমারয়ৎ
12.64
আক্রম্য স কটীদেশে জানুনা রাক্ষসাধমম্
অপীডয়ত বাহুভ্যাং কণ্ঠং তস্য বৃকোদরঃ
12.65
অথ তং জডসর্বাঙ্গং ব্যাবৃত্তনয়নোল্বণম্
ভূতলে পাতয়ামাস বাক্যং চেদমুবাচ হ
12.66
হিডিম্ববকয়োঃ পাপ ন ত্বমশ্রুপ্রমার্জনম্
করিষ্যসি গতশ্চাসি যমস্য সদনং প্রতি
12.67
ইত্যেবমুক্ত্বা পুরুষপ্রবীর;স্তং রাক্ষসং ক্রোধবিবৃত্তনেত্রঃ
প্রস্রস্তবস্ত্রাভরণং স্ফুরন্ত;মুদ্ভ্রান্তচিত্তং ব্যসুমুত্সসর্জ
12.68
তস্মিন্হতে তোয়দতুল্যরূপে; কৃষ্ণাং পুরস্কৃত্য নরেন্দ্রপুত্রাঃ
ভীমং প্রশস্যাথ গুণৈরনেকৈ;র্হৃষ্টাস্ততো দ্বৈতবনায় জগ্মুঃ
12.69
এবং বিনিহতঃ সংখ্যে কির্মীরো মনুজাধিপ
ভীমেন বচনাত্তস্য ধর্মরাজস্য কৌরব
12.70
ততো নিষ্কণ্টকং কৃত্বা বনং তদপরাজিতঃ
দ্রৌপদ্যা সহ ধর্মজ্ঞো বসতিং তামুবাস হ
12.71
সমাশ্বাস্য চ তে সর্বে দ্রৌপদীং ভরতর্ষভাঃ
প্রহৃষ্টমনসঃ প্রীত্যা প্রশশংসুর্বৃকোদরম্
12.72
ভীমবাহুবলোত্পিষ্টে বিনষ্টে রাক্ষসে ততঃ
বিবিশুস্তদ্বনং বীরাঃ ক্ষেমং নিহতকণ্টকম্
12.73
স ময়া গচ্ছতা মার্গে বিনিকীর্ণো ভয়াবহঃ
বনে মহতি দুষ্টাত্মা দৃষ্টো ভীমবলাদ্ধতঃ
12.74
তত্রাশ্রৌষমহং চৈতত্কর্ম ভীমস্য ভারত
ব্রাহ্মণানাং কথয়তাং যে তত্রাসন্সমাগতাঃ
12.75
বৈশংপায়ন উবাচ
এবং বিনিহতং সংখ্যে কির্মীরং রাক্ষসোত্তমম্
শ্রুত্বা ধ্যানপরো রাজা নিশশ্বাসার্তবত্তদা