Utshovঅধ্যায় 11
11.1
ধৃতরাষ্ট্র উবাচ
এবমেতন্মহাপ্রাজ্ঞ যথা বদসি নো মুনে
অহং চৈব বিজানামি সর্বে চেমে নরাধিপাঃ
11.2
ভবাংস্তু মন্যতে সাধু যত্কুরূণাং সুখোদয়ম্
তদেব বিদুরোঽপ্যাহ ভীষ্মো দ্রোণশ্চ মাং মুনে
11.3
যদি ত্বহমনুগ্রাহ্যঃ কৌরবেষু দয়া যদি
অনুশাধি দুরাত্মানং পুত্রং দুর্যোধনং মম
11.4
ব্যাস উবাচ
অয়মায়াতি বৈ রাজন্মৈত্রেয়ো ভগবানৃষিঃ
অন্বীয় পাণ্ডবান্ভ্রাতৄনিহৈবাস্মদ্দিদৃক্ষয়া
11.5
এষ দুর্যোধনং পুত্রং তব রাজন্মহানৃষিঃ
অনুশাস্তা যথান্যায়ং শমায়াস্য কুলস্য তে
11.6
ব্রূয়াদ্যদেষ রাজেন্দ্র তত্কার্যমবিশঙ্কয়া
অক্রিয়ায়াং হি কার্যস্য পুত্রং তে শপ্স্যতে রুষা
11.7
বৈশংপায়ন উবাচ
এবমুক্ত্বা যয়ৌ ব্যাসো মৈত্রেয়ঃ প্রত্যদৃশ্যত
পূজয়া প্রতিজগ্রাহ সপুত্রস্তং নরাধিপঃ
11.8
দত্ত্বার্ঘ্যাদ্যাঃ ক্রিয়াঃ সর্বা বিশ্রান্তং মুনিপুংগবম্
প্রশ্রয়েণাব্রবীদ্রাজা ধৃতরাষ্ট্রোঽম্বিকাসুতঃ
11.9
সুখেনাগমনং কচ্চিদ্ভগবন্কুরুজাঙ্গলে
কচ্চিত্কুশলিনো বীরা ভ্রাতরঃ পঞ্চ পাণ্ডবাঃ
11.10
সময়ে স্থাতুমিচ্ছন্তি কচ্চিচ্চ পুরুষর্ষভাঃ
কচ্চিত্কুরূণাং সৌভ্রাত্রমব্যুচ্ছিন্নং ভবিষ্যতি
11.11
মৈত্রেয় উবাচ
তীর্থয়াত্রামনুক্রামন্প্রাপ্তোঽস্মি কুরুজাঙ্গলম্
যদৃচ্ছয়া ধর্মরাজং দৃষ্টবান্কাম্যকে বনে
11.12
তং জটাজিনসংবীতং তপোবননিবাসিনম্
সমাজগ্মুর্মহাত্মানং দ্রষ্টুং মুনিগণাঃ প্রভো
11.13
তত্রাশ্রৌষং মহারাজ পুত্রাণাং তব বিভ্রমম্
অনয়ং দ্যূতরূপেণ মহাপায়মুপস্থিতম্
11.14
ততোঽহং ত্বামনুপ্রাপ্তঃ কৌরবাণামবেক্ষয়া
সদা হ্যভ্যধিকঃ স্নেহঃ প্রীতিশ্চ ত্বয়ি মে প্রভো
11.15
নৈতদৌপয়িকং রাজংস্ত্বয়ি ভীষ্মে চ জীবতি
যদন্যোন্যেন তে পুত্রা বিরুধ্যন্তে নরাধিপ
11.16
মেঢীভূতঃ স্বয়ং রাজন্নিগ্রহে প্রগ্রহে ভবান্
কিমর্থমনয়ং ঘোরমুত্পতন্তমুপেক্ষসে
11.17
দস্যূনামিব যদ্বৃত্তং সভায়াং কুরুনন্দন
তেন ন ভ্রাজসে রাজংস্তাপসানাং সমাগমে
11.18
বৈশংপায়ন উবাচ
ততো ব্যাবৃত্য রাজানং দুর্যোধনমমর্ষণম্
উবাচ শ্লক্ষ্ণয়া বাচা মৈত্রেয়ো ভগবানৃষিঃ
11.19
দুর্যোধন মহাবাহো নিবোধ বদতাং বর
বচনং মে মহাপ্রাজ্ঞ ব্রুবতো যদ্ধিতং তব
11.20
মা দ্রুহঃ পাণ্ডবান্রাজন্কুরুষ্ব হিতমাত্মনঃ
পাণ্ডবানাং কুরূণাং চ লোকস্য চ নরর্ষভ
11.21
তে হি সর্বে নরব্যাঘ্রাঃ শূরা বিক্রান্তয়োধিনঃ
সর্বে নাগায়ুতপ্রাণা বজ্রসংহননা দৃঢাঃ
11.22
সত্যব্রতপরাঃ সর্বে সর্বে পুরুষমানিনঃ
হন্তারো দেবশত্রূণাং রক্ষসাং কামরূপিণাম্
হিডিম্ববকমুখ্যানাং কির্মীরস্য চ রক্ষসঃ
11.23
ইতঃ প্রচ্যবতাং রাত্রৌ যঃ স তেষাং মহাত্মনাম্
আবৃত্য মার্গং রৌদ্রাত্মা তস্থৌ গিরিরিবাচলঃ
11.24
তং ভীমঃ সমরশ্লাঘী বলেন বলিনাং বরঃ
জঘান পশুমারেণ ব্যাঘ্রঃ ক্ষুদ্রমৃগং যথা
11.25
পশ্য দিগ্বিজয়ে রাজন্যথা ভীমেন পাতিতঃ
জরাসংধো মহেষ্বাসো নাগায়ুতবলো যুধি
11.26
সংবন্ধী বাসুদেবশ্চ যেষাং শ্যালশ্চ পার্ষতঃ
কস্তান্যুধি সমাসীত জরামরণবান্নরঃ
11.27
তস্য তে শম এবাস্তু পাণ্ডবৈর্ভরতর্ষভ
কুরু মে বচনং রাজন্মা মৃত্যুবশমন্বগাঃ
11.28
এবং তু ব্রুবতস্তস্য মৈত্রেয়স্য বিশাং পতে
ঊরুং গজকরাকারং করেণাভিজঘান সঃ
11.29
দুর্যোধনঃ স্মিতং কৃত্বা চরণেনালিখন্মহীম্
ন কিংচিদুক্ত্বা দুর্মেধাস্তস্থৌ কিংচিদবাঙ্মুখঃ
11.30
তমশুশ্রূষমাণং তু বিলিখন্তং বসুংধরাম্
দৃষ্ট্বা দুর্যোধনং রাজন্মৈত্রেয়ং কোপ আবিশৎ
11.31
স কোপবশমাপন্নো মৈত্রেয়ো মুনিসত্তমঃ
বিধিনা সংপ্রয়ুক্তশ্চ শাপায়াস্য মনো দধে
11.32
ততঃ স বার্যুপস্পৃশ্য কোপসংরক্তলোচনঃ
মৈত্রেয়ো ধার্তরাষ্ট্রং তমশপদ্দুষ্টচেতসম্
11.33
যস্মাত্ত্বং মামনাদৃত্য নেমাং বাচং চিকীর্ষসি
তস্মাদস্যাভিমানস্য সদ্যঃ ফলমবাপ্নুহি
11.34
ত্বদভিদ্রোহসংয়ুক্তং যুদ্ধমুত্পত্স্যতে মহৎ
যত্র ভীমো গদাপাতৈস্তবোরুং ভেত্স্যতে বলী
11.35
ইত্যেবমুক্তে বচনে ধৃতরাষ্ট্রো মহীপতিঃ
প্রসাদয়ামাস মুনিং নৈতদেবং ভবেদিতি
11.36
মৈত্রেয় উবাচ
শমং যাস্যতি চেত্পুত্রস্তব রাজন্যথা তথা
শাপো ন ভবিতা তাত বিপরীতে ভবিষ্যতি
11.37
বৈশংপায়ন উবাচ
স বিলক্ষস্তু রাজেন্দ্র দুর্যোধনপিতা তদা
মৈত্রেয়ং প্রাহ কির্মীরঃ কথং ভীমেন পাতিতঃ
11.38
মৈত্রেয় উবাচ
নাহং বক্ষ্যাম্যসূয়া তে ন তে শুশ্রূষতে সুতঃ
এষ তে বিদুরঃ সর্বমাখ্যাস্যতি গতে ময়ি
11.39
বৈশংপায়ন উবাচ
ইত্যেবমুক্ত্বা মৈত্রেয়ঃ প্রাতিষ্ঠত যথাগতম্
কির্মীরবধসংবিগ্নো বহির্দুর্যোধনোঽগমৎ